أبين زين

الرمل بيقول ياريس.. فيه شيء ماهوش مظبوط.. وفيه خلاف فى الآراء غير اللى كان محطوط.. وكنا عايشين عشانه وفى الكتاب مخطوط.. الشعب عايش فى ضيقة بخنقته مربوط.. وكل يوم تصريحات.. حتنفذوا المشروط.. وبالكلام مش حتوصل مصر أى شُطوط.. وكل واحد بيحلم يوم يكون مبسوط.. وإنت بتوعد ولكن ناس كتير بتشوط.. وحتعمل إيه واللا إيه.. وكل شيء له شروط.. مش كل حبة حيفضل جرحنا ملطوط.. ياريس الناس خلاص من غُلبها بتشوط.. وحتعمل إيه فى القرف وحلمها مبطوط.. ونقاش عَويْص واختلاف وكلام كتير مربوط.. والناس ماهش عارفة فين الصح م المغلوط.. ياريس الدفة حاسب فيه صعود وهبوط.. والمركبة ليه بطيئة وعقدها مفروط.. وكل حزب عامل لى فى الميدان قرموط.. والدنيا هايصة ما بين ثابت وبين مكشوط.. وكل واحد ظهر لابس بها زعبوط.. ياريس الشعب نفسه يعيش بقى مبسوط.. الشعب أصبح خلاص وسط العذاب محطوط.. سايق عليك النبى حيط البلد منطوط.. والدنيا هايصة ما بين باطل وبين عطعوط.. ولحد إمتى حيفضل دخلنا مشفوط.. والرمل بيقول ياناس.. الخط مش مظبوط.. وأنا فى انتظار ردكم ونصحح المغلوط.