شلاليت

فيتو بقي لها سنة بتضربنا بالشلاليت
ونازلة فينا ياريس بهدلة وتبكيت
وإن قلت إيه ده.. تقول لي.. بطلوا تنكيت
مش رايحة أسيبكم كده.. طول ما أحنا في تفتيت
هي البلد ناقصة نسكت بعد ثورتها والكل عايش وعارف إيه حكايتها وكلكم بالقلم كاتبين روايتها..
فبلاش بقي تسكتوا وتطربقوا بيتها
اكتب بقلمك في «فيتو».. قول علي الحاصل واشرح لنا ليه بقي صوتك ماهوش واصل
لسلطة متسلطنة وبينا فيه فاصل
من كتر قرف العباد مش قادرة تتواصل
وحقول لك إيه واللا إيه.. ما هو كلكم كتاب ماسكين قلم والجرايد.. عاملة ليكوا حساب
وكل ما حد يخطب إنه مش نصاب..
يطلع كلامكم بقول له.. اسحبها يا كداب
راح تضحكوا من كلامي وكلكم عارفين
إني مع الحق ما بروحش شمال ويمين
وقلمي من قلب «فيتو» في كل حرف أمين
وتصدقوا بإيه بقي.. ما في جيبي غير قرشين
بس المبادئ مبادئ وأنتو أصحابها
وكل كلمة لكم تفتح لنا بابها..
علشان نعيش باحترام دايما علي ترابها والتضحية بتعرفوا إيه سر أسبابها