مش فاهمين فيه ايه

جيبيها على بلاطه
بكرة شكله أيه
جاي حلو جاي مر
عرفينا عليه
اختصري الطريق
اغتصبي كرامتنا
ما عدش فاضل
غيرها في حياتنا
اللقمة وطعمها سم
الضحكة ونهايتها غم
والأخ بيضرب أخوه
والأرض رواها الدم
والكرسي أغلى من الدين
والشعب في أرضه سجين
وكلنا أتفرقنا وبقينا
ع الواحدة لبعضنا ماسكين
لا جمال في الشمس ظاهر
ولا فيه آمان في الليل
الدنيا صبحت مظاهر
والشر أوضح من سواد الليل
قرفنا بس مش قادرين
لا نفارقك ولا نخاصمك
مش عارف بنحبك
ولا كدابين وبنرقصلك
ولو بنحبك ودا حالنا
لو كرهنا مصيرنا أيه
إنتِ عارفه أيه جرالنا
ولا أحكيلك عليه
أجمل ورودك
في الغربة متهانة
وبيوتنا صبحت
خزانه وأجزخانة
وشاشاتك في بيوت العالم
بتقدم عفانة
شيوخك اللي كانوا منارة
سابوا المنبر وفتحوا سلخانة
وكأن الدين كان سلم
يوصلهم لخزنة مليانة
والشيخ اللي كان بيعلم
الكل فيه عزانه
الجنيه كان بكام دولار
وصبح عليه السلامة
إتخرم بقى دبلة في ودن حمار
مش قيمة دا مجرد علامة
كل بيت بقى فيه شهيد
أو قاتل أو جريح
أو باب مكهرب من حديد
بعد ما كان صفيح
كل بيت بقى حلمه الآمان
رغم الآمان فيكِ آية
آية موجودة في القرآن
صالحه لما لا نهاية
العيب في مين
فينا ولا فيكِ
ولا في حد غيرنا
قدم مهر ليكِ
قبلتي المهر ونسيتينا
ولا الحكاية أيه
أصل بجد تعبنا
ومش فاهمين فيه أيه
------------------------
elwasef2007@yahoo.com