مش فاهمين فيه إيه

جيبيها على بلاطة
بكرة شكله أيه
جاى حلو جاى مر
عرفينا عليه
اختصرى الطريق
اغتصبى كرامتنا
ما عدش فاضل حاجة
غيرها فى حياتنا
اللقمة وطعمها سم
الضحكة ونهايتها غم
والأخ بيضرب أخوه
والأرض رواها الدم
والكرسى أغلى من الدين
والشعب فى أرضه سجين
وكلنا أتفرقنا وبقينا
ع الواحدة لبعضنا ماسكين
لا جمال فى الشمس ظاهر
ولا فيه آمان فى الليل
الدنيا صبحت مظاهر
والشر أوضح م الدليل
قرفنا بس مش قادرين
لا نفارقك ولا نخاصمك
مش عارف بنحبك
ولا كدابين وبنرقصلك
ولو بنحبك ودا حالنا
لو كرهنا مصيرنا أيه
إنتِ عارفه أيه جرارنا
ولا أحكيلك عليه
أجمل ورودك
فى الغربة متهانة
وبيوتنا صبحت
خزانه وأجزخانة
وشاشاتك فى بيوت العالم
بتقدم عفانة
وشيوخك إلِ كانوا منارة
سابوا المنبر وفتحوا سلخانة
وكأن الدين كان سلم
يوصل لخزنة مليانة
كل بيت بقى فيه شهيد
أو قاتل أو جريح
أو باب مكهرب من حديد
بعد ما كان صفيح
كل بيت بقى حلمة الآمان
رغم الآمان فيكِ آية
آية موجودة فى القرآن
صلحه لمالا نهاية
العيب فى مين
فينا ولا فيكِ
ولا حد غيرنا
قدم مهر ليكِ
قبلتى المهر ونسيتينا
ولا الحكاية أيه
أصل بجد تعبنا
ومش فهمين فيه أيه