خفوا علينا شوية

خف علينا شوية يا جدو الموضوع كده زاد عن حده
ده اللى بناه جدنا رمسيس من غير أسمنت ولا مصيص
بقى يتقصقص ليه قصاقيص والفلاحيس نازلين بيهده
أنا مش ح أدفع تانى ضريبة إرحمنا يا جدو من الهليبة
يوم ورا يوم فيه جايه مصيبة بينقلونا من خيبة لخيبة
وكل يوم فيه فكرة غريبة وياريت ساعة الجد يسده
كل شوية يغلو علينا سعر الغاز والنور والمية اللى بنشربها
هو أنا يعنى ماليش سهمين ف السد العالى اللى مكهربها
ناس بتفكر ف خراب بيتنا ياخدوا ف مال يتعبوا من عده
كله بينبش أرضها نبش ونص الناس عايشين ع الهبش
وباقى الناس بتقوله مالكش بيوتها صفيح بتطير م الريح
وأنا بيتى هناك فى قلعة الكبش فيها كام بيت عندنا يتعدوا
ومصانع بتصرف ف النيل والانتخابات مليانة تزوير
وندور فين نزرع صحارينا ونبنى فيها لعيالنا مدينة
تراب الأرض بيصرخ فينا مجبرين وغصب علينا بيتحدوا
يتحكم فينا بالحجة وزير لسانه حلو وكلامه كتير
فقدنا القدرة على التطوير ولفين رايحين ولأى مصير
وبقينا عايشين ناكل بالدين والدين بيزيد وازاى ح نسده؟!