نيولوك...!! عبد العزيز محمود

كان اجتماعا ساخنا بمعنى الكلمة بعد ان كشف الزملوطي بيه على الترابيزة حقيقة الكارثة ....
-انا خلاص ح اتجنن يا رجالة المجلة توزيعها في النازل ومش عارف اعمل ايه؟؟!!
-سلامتك م الجنان ياريس!!!! الموضوع بسيط وما يستاهلش الزعل ده كله!!
-ما أزعلش ازاي بس والمجلة احتمال كبير يجيبوا ضرفها !
-يااادي النصيبة السودة، ده لو حصل فعلا كلنا ح نشحت!!!
-لازم تفكروا معايا وبسرعة ازاي نرفع التوزيع!!! دي مهمة قومية ووطنية لا يمكن تأجيلها!!!
-بصراحة يا ريس المجلة يلزمها نيولوك....مش معقولة نطلع بنفس الشكل اللي طلعنا بيه من تسعين سنة!!!
-ازاي يعني مش فاهم؟؟
-يعني شكل المجلة سعادتك لازم يتغير ...واللي بينزل في الاول ننزله في الآخر، واللي ف الآخر ننزله في الأول ...وصفحة الطبيخ نخليها اول صفحة!!!!
-وتفتكروا يا رجالة ده ممكن يعمل حاجة؟؟؟
-ح تشوف سعادتك وخصوصا بعد ما ننشر صورتك ع الافتتاحية وانت باصص وراك !!!!
-اشمعنى يعني ورايا ؟؟ ما عندكم الصورة القديمة وأنا بالعب في شنبي ؟؟؟
-ياريس دي مرحلة جديدة خالص ... كلها نيولوك!!!!
-لكن التوزيع واصل هبوطه ...
-وبعدين يارجالة!! واضح النيولوك ماجابش نتيجة !! وشكلنا كده ح نجيب ضرفها !!!
-ياريس ما تقولش كده!!! كل حاجة ماشية تمام التمام وحسب الخطة الموضوعة بس الصورة بتاعت سعادتك لازم تتغير!!!
-ايه الكلام ده!! قصدكم يعني ان صورتي هي اللي موقعة التوزيع؟؟؟؟
-مين قال كده؟؟؟ احنا قصدنا "البوووظ" اللي سعادتك واخده لازم يتغير!!
-بسيطة ح اغير البووظ واغير تسريحة شعري ولو عايزيني البس جلابية ماعنديش مانع بس المجلة توزع !!
-ياريت سعادتك كمان تحلق شنبك!!! ما هو مش معقول تفضل كده طالع على الناس بشنبك ده اللي عامل زي فردة الجزمة!
وهكذا حلق سعادته شنبه واستدعي مصورا محترفا لتصويره في بوووظات جديدة ......
-ياريت سيادتك تديني قفاك عشان آخدلك صورة من القفا!!
-حاضر!! ولو اني مش فاهم الحكاية دي ايه لازمتها؟؟
-ما تحاول سعادتك تبتسم شويه بدال ما انت مكشر كده ؟؟؟ تكونش فاكر انك بالتكشيرة دي الناس ح تحترمك !؟
-اللهم طولك ياروح!! حاضر!!!
-كمان صورة بروفيل وانت باصص لفوق كأنك بتدور على ناموسة أو عقربة قرصتك في نافوخك !!!
-ارجوك خلصني عشان أتنيل أكتب اللحاف ..قصدي المقالة بتاعتي !!!
-شايف سيادتك الغراب اللي هناك ده؟؟؟
-هوه فين!؟؟
-بس خلاص أنا أخدت الصورة اللي كنت عايزها !!
ورغم نشر صورة سيادته في البوووظ الجديد واصل التوزيع هبوطه ..
-أنا ح اتجنن يارجالة!! أكيد فيه حد عامل لي عمل!!! ايوه ده سحر سفلي وانا عارف اللي عملهولي !!!!!
-سلامتك من السحر يا ريس!! والنبي دي عين وصابتك!! اي والله عين!! ما هو ما يهبطش التوزيع غير الحسد !!!
-أنا شايف يا رجالة اننا نفرد مساحة اكبر للصور العريانة والفضايح وموضوعات الجن والسحر وتفسير الاحلام عشان نرفع التوزيع !!
-عين العقل ياريس!! وياريت كمان نكتب عن الرجالة اللي بيتحولوا ستات ..والولية الالمانية اللي بقت راجل بعشر رجلين!!!!
-ايوه كده انا عايز اقتراحات جامدة !!! لازم العدد الجاي يكسر الدنيا؟؟؟!!!
-طيب ما نزود ياريس موضوعات الهشك بشك عشان الناس تنبسط واعصابها تهدا!!! سعادتك شايف الاعتصامات والاحتجاجات المشعللة في كل حتة!!!
-وماله !!! دا انا ملك الهشك بشك!! وبالمرة نطلع ملحق اعلاني أمسكه لحبايبي والمخبرين بتوعي!!!
لكن التوزيع واصل الهبوط ....
-وبعدين يا رجالة ؟؟؟انا خلاص جاني اكتئاب ومش عارف اتصرف !!؟؟؟
-سلامتك من الاكتئاب ياريس!! طيب ايه رأيك لو وزعنا مع كل عدد ساندوتشين فول وطعمية أو حبة فياجرا هدية!!!
-لااااااااا فكرة الهدايا دي مش مضمونة ! انا باقول يا رجالة نحول المجلة جورنال يمكن تتحل عقدتنا !! امبارح بهلول صاحبي بتاع تحضير الارواح نصحني أغير العتبة!!!
-وتفتكر يازملوطي بيه المجلة لو بقت جورنال ح توزع كويس ؟؟؟!!!
-والله اللومانجي مدير التوزيع بيقول اننا لو غيَرنا الصنف الأمور ح تمشي!!!
-طيب والتمويل ياريس!! ده مشروع كبير ويلزمه ملايين!!!!!!
-ماتقلقوش يا رجالة الباشوات بتوع شركة المستقبل ح يشيلوا الجورنال على كتافهم!!!! اصلهم عشمانين اليومين اللي جايين يمسكو كل حاجة !!!!!!
وبعد تحويل المجلة الى جورنال اسبوعي..
-ايه اخبار التوزيع يا لومانجي؟؟ !!!
-والله الارقام يا زملوطي بيه ما تطمنش!!واضح ان العمل المعمول لسعادتك جامد أوي !!
-ايوه يعني وزعنا كام ؟؟؟!!! انا من امبارح قلقان وما نمتش وطول الليل حاطط ايدي على كبدي !!!
-أبدا همه كلهم ميتين نسخة عمي وزعناهم بالعافية!!
-وبعدين يارجالة !! شكلنا كده بقا زبالة والجورنال الجديد باينه ح يروح في ابو نكلة !!!!
-لازم نيولوك وتطوير تاني ياريس!! ما فيش حاجة ح تجيب داغ التوزيع الواقع غير التطوير!!!!
-خلاص يارجالة انا ح اعمل تطوير تاني للتطوير الاولاني!! وانا حاسس النوبة دي ان ربنا ح يكرمنا!! بس قولوا يارب!!!!
وبعد اسبوعين رن جرس التليفون الاحمر بتاع المصايب السودة....
-وآخرتها يا زملوطي!!! هوه احنا بنصرف ع الجورنال عشان يتكوم ع الارصفة ويرطرط؟؟؟!! يا بني آدم احنا عندنا مشروع يلزمه دعاية وانت كده ماعادلكش لازمة!!!!
-عليا الطلاق بالتلاتة سعادتك دي مؤامرة!!! اي والله مؤامرة!! واضح ان فيه ناس عايزة الجورنال ما يوزعش ومشروع المستقبل مايبقالوش مستقبل!!!
-ما تبطل هرتلة يا زملوطي وتفهمني!! انا مش فاهم حاجة !!
-يا باشا م الآخر كده فيه ناس بيرشوا جامد على بتوع الجرايد عشان يخبوا الجورنال ومايتوزعشي!!
-خلاص الجورنال من الاسبوع الجاي ح يطلع يومي وشركة التوزيع ح تتغير وبتوع الجرايد ح نربيهم والفلوس مالكمش دعوة بيها !!! هوه احنا بنصرف حاجة من بيت ابونا!!!!
-يخليكم لينا يا باشاوات الحاضر والمستقبل... يا كايدينهم!!!
وعلى الفور عقد الزملوطي بيه اجتماعا جديدا ....
-خلاص يارجالة من السبت الجاي الجورنال ح يطلع يومي!!! الباشوات أمروا بكده عشان نكيد العزال ونقول اللي ما عمره اتقال!!!
-يومي ازاي بس يا ريس اذا كان الاسبوعي ما بيوزعش؟؟؟؟
-انشا الله ما عن اهله اتوزع!!! احنا مهمتنا نطلع الجورنال والباشوات يكعوا ويدفعوا !!!!!
وهكذا صدر الجورنال بشكل يومي بعد حملة اعلانية ضخمة لكن المشكلة ظلت قائمة..
-التوزيع في النازل يا زملوطي بيه والخساير بالملايين!!! والباشوات قلقانين ع الآخر ع المشروع بتاعهم وبيكلموني ليل نهار !!!
-ارجوك يا زناتي بيه تهديهم شوية !! انا النوبة دي عامل مشروع تطوير ح يرفع التوزيع في السما السابعة!!!
-تطوير تاني ما انت لسه عامل تطوير الشهر اللي فات وبرضه مافيش فايدة!!؟؟
-يا زناتي بيه التطوير النوبة دي انا عامله بنفسي وكله نيولوك!!!
-طيب شد حيلك يا زملوطي الجماعة بقت روحهم في مناخيرهم!!!!
ومع استمرار هبوط التوزيع عقد الزملوطي بيه اجتماعا طارئا ....
-يارجالة أنا من بكرة ح اعمل تطوير جديد وتغييرات في المناصب القيادية!!! وصفحة الوفيات ح تكون تاني صفحة!!! والمقالات كلها ح تتلغي ما حدش ح يكتب مقالات غيري!!!
-والله يا ريس الجورنال فعلا كان محتاج هزة !! يخليك لينا يا زملوطي بيه ومايحرمناش من مخك!!!
-من بكرة عايزكم تكتبوا أكتر عن الانجازات اللي الناس مش شايفاها !!! انا عايز الجورنال من اوله لآخره يتكلم عن الانجازات!! عايزكم تقلعوا النضارات السودة وتلبسوا النضارات الفوشيا !!!!
لكن التوزيع وصل الى نقطة اللاعودة .....
-وبعدين يا رجالة احنا امبارح ما وزعناش غير عشرين نسخة!!!
-ما عدش قدامنا سعادتك غير المعلم طمبورة بتاع الروبابكيا ييجي ياخد المرتجع كله ويخلصنا!!!!!!
-معقولة يعني ح نبيع الجورنال بالكيلو!!؟؟؟
ده الحل الوحيد سعادتك عشان نخفي آثار الجريمة!!!! وبعدين كل الجرايد بتعمل كده يعني جات علينا ؟؟؟!!
-واضح ان ده الحل الوحيد عشان الباشوات الكبار يهمدوا عننا شويه !!! قوم يا لومانجي كلم لنا المعلم طمبورة خلينا نخلص !!!
وهنا رن جرس التليفون الاحمر ...
-عامل ناصح يا زملوطي وعايز تستكردنا !!! يا حيوان انت مكتبك كله مترشق كاميرات واجهزة تصنت!!
-عليا الطلاق بالتلاتة يا باشا انا والرجالة كنا بنهزر!!! اي والله بنهزر!!!
-رايقين أوي وقاعدين تهزروا والجورنال واقع ومرطرط ومشروع المستقبل بيضيع قدام عينيكم وانتو ولا على بالكم!!!
-يا باشا هوه احنا ورانا حاجة غير مشروع المستقبل!!! دا هوه الامل والمني والجنة والاحلام!!!
-من بكرة الجورنال ح يطلع طبعتين صباحية ومسائية وبالألوان !!!! وانت من بكرة يا زملوطي ح تروح على بيتكم !
-ارجوك يا باشا تديني فرصة أخيرة ! ده انا النوبة دي عامل مشروع تطوير جامد وما يخرش المية!!!
-معلهش يا زملوطي المشروع ده تبقا تعمله في البيت مع العيال والست الوالدة!!!! من بكرة مهيطل ح يستلم مكانك ووقعة أبوه سودة لو الجورنال رطرط !!!!!!