كورة × كورة

هذا ليس برنامجاً جديداً فى قناة فضائية، ولكن أعتقد أنه تعبير شبه دقيق لما يحدث فى بعض البرامج الرياضية التى تطل علينا من القنوات الفضائية المختلفة بلا ضبط أو ربط.
لقائى معكم فى الكتابة لا يتعدى شهراً واحد، وخلال مقالاتى السابقة آثرت أن أكبح جماح نفسى «على غير عادتى»، وقلت الواحد يكتب فى مواضيع عامة لكن بصراحة مش قادر أمسك نفسى أكتر من كده.
نفتح التليفزيون ونقول نتفرج على شوية رياضة، تلاقى حظك وقع قدام مقدم برنامج زى سواق التاكسى، يركّب اللى على مزاجه، ويمنع الركوب على الزبون اللى مش عاجبه، يعنى بلغة التاكسجية عمّال يحط ويشيل الفوطة الصفراء حسب هواه، واللى يركّبه مش مهم يحاسبه ولا على الحساب ويا سوء بخت إلا مش راضى عليه ينكل به بدءاً من عدم ركوبه لغاية ما يمكن يدوس على واحد بالأربع عجلات بتوع التاكسى.
الغريب إن السواق ده مش هو صاحب التاكسى «قصدى مش صاحب القناة» ما هو لو صاحب التاكسى هو حر فى ماله.
ولكن يا عينى ده صاحب التاكسى قاعد فى بيته أو مشغول بشغله، والغريب إنه مبسوط أصل الناس كل شوية تكلمه وتقوله إحنا شوفنا التاكسى بتاعك ما شاء الله بيلف على كل شوارع العاصمة، وواضح مش مهم عنده مين اللى راكب ومن اللى زعلان، وكمان موضوع الحصيلة مش فى دماغه،
المهم التاكسى شغال أربعة وعشرين ساعة، مفيش مانع طبعاً إنه يدفع تمن التلفيات والبنزين بتاع التاكسى، والراجل مش همه ومش فارق معاه كام واحد السواق بتاعه فوته ولا شتمه وهو راكب بيلف، وممكن قوى يكون ضربه وكسر دماغه، لأن السواق كل اللى يهمه رضا الزبون اللى راكب معاه وما سوف يستفيد منه.
وفيه نقطة أنا محتار فيها، هل يا ترى ضعف حصيلة بعض التاكسيات سببها إيه، هل يا ترى أن بعض السائقين مجاملين قوى وبيركبوا حبايبهم ببلاش، ولا برضه مش رحمينهم ومش مكفيهم ال..... اللى بقبضوها، وبيعصروا الركاب خصوصاً السمان منهم، وطبعاً يحطوا الغنائم فى جيوبهم.
والشىء العجيب إن بعض مقدمى البرامج الرياضية «آسف بعض سائقى التاكسيات» مش ثابتين على زبائن، يعنى اللى يحبوه ويرضوا عنه يركبوه النهارده، وممكن تانى يوم على طول لو شافوه واقف فى الشمس وطالع عينه، يسبوه وياريت كده وبس عادى عندهم جداً إنهم يشتموه ويسيبوه ويزنقوا عليه ويطرطشوا عليه ميه قذرة. وطبعاً أصحابنا دول بيغيروا الضيوف زى تغيير الركاب حسب المصلحة والحاجة والأهواء.
وحياة سيدنا النبى تصدق الكلام اللى جاى، وهو إن أصحابنا مقدمى هذه البرامج «آسف سائقى التاكسى» تلاقيهم بعد يومين أو ثلاثة، مش عايز أقول أقل، وهما ماشيين بالتاكسى، وهوب فرامل جامدة قوى، مش مهم تؤذى حد ولا لأ، لكن لازم يقف لأنه شاف واحد من اللى سابهم فى الشمس من يومين ويروح نازل واخده بالحضن والبوس وكأن مفيش حاجة حصلت من يومين، ويقعد يصالحه ويوصله المكان اللى هو عايزه، لكن ضرورى يقلبه فى السكة، ويقنعه أنه ما يزعلش منه وأن مصلحته معاه، والمهم يطلع منه بسبوبة كويسة وهو كله رزق الأولاد.
الحاجة اللى تخوف إن أصحاب بعض هذه التاكسيات «القنوات» ممكن قوى يلاقى نفسه فى المحكمة متهم بقضية ضرب أو كسر إشارة أو سب وقذف عسكرى مرور، مصيبة من المصائب اللى عملها سواق التاكسى لكن المشكلة إن القضية تلبس صاحب القناة، وقبل حتى المحكمة مايطلع حكمها تلاقى السواق هوب نط على تاكسى تانى، بس طبعاً لازم يكون تاكسى جديد علشان يبرطع به ويسوق على مزاجه، وهو عقبال ما المالك الجديد يفوق ويعرف يخلص منه يكون عمل شوية غنائم حلوة، خصوصاً إنه خلاص بقى محترف، عرف الشوارع وصنّف الزبائن، وممكن قوى يكون تسلل إلى نقابة السواقين، وهو كله مصلحة.
يا سادة يا أصحاب مثل هذه التاكسيات «الفضائيات» بالله عليكم ماينفعش تتركوا المواضيع كده، مش علشان تكسبوا الملايين وأشك فى ذلك، لأن بعض السائقين آسف بعض مقدمى البرامج هما اللى بيكسبوا، وأنتم لا تربحون غير إزدراء المجتمع لمثل هذه البرامج هو ما ينفعش يا سادة يا محترمين أن تتحول بعض البرامج للنيل من أعراض الآخرين، ولتصفية الحسابات وفتح النار مع من يعارض أو يختلف فى الرأى مع السائق «مقدم البرنامج» ولا داعى للمعلومات الخاطئة والمغلوطة لتخفيف أغراض شخصية، يا سادة يا مالكى هذه التاكسيات «الفضائيات» ارحمونا من المنافقين الذين هم إذا خاصموا فجروا وليس لديهم مبدأ أو منهج ولا يهمهم ما يخسرون لأنهم خسروا كل شىء حتى أنفسهم.
نجانا الله منهم وأنقذنا من شرورهم وللأسف نحن المشاهدين «الركاب» المغلوبين على أمرنا سنضطر آسفين إلى الرجوع إلى المواصلات العامة «القنوات الأرضية» وللأسف نارها أرحم من جنتهم.
نلتقى الأسبوع القادم بإذن الله.
Kkordy@koraxkora.net