طرائف الصباع البمبي ونتيجة الاستفتاء

كالعادة، كان الفيس بوك ساحة لتبادل الآراء والقفشات بعد أن أتم المصريون تجربتهم الديمقراطية "الحقيقية" الأولى بنجاح غير مسبوق، حيث عمدوا إلى التعليق على عملية التصويت في الاستفتاء على التعديلات الدستورية أول أمس، وفور إعلان نتيجة الاستفتاء مساء أمس، حرص الجميع على التعبير عن رأيهم عبر فضاء الحرية الافتراضي من خلال تدوينات قصيرة أو تعليقات طريفة حفلت بها العديد من الصفحات الشخصية لزوار الموقع أو للصفحات المخصصة للكوميديا السياسية مثل: الست اللي ورا القذافي، political alsh، الراجل اللي ورا عمر سليمان، يا حلاوة الصباع البمبي.
كما قام العديد من المشاهير بالتعليق على هذا الظرف الاستثنائي من تاريخ مصر عبر صفحاتهم الشخصية، مثل الكاتب الساخر عمر طاهر الذي كتب: "ارفع صباعك فوق .. انت مصري - اليوم كان ناقصله بس صلاة جماعة الصبح أو قداس امبارح بالليل علشان يبقى عيد - تحيا مصر .. بنعم و لا.. شكرا للشهداء على هذا اليوم الجميل".
كذلك كتب المطرب اللبناني ماهر زين على صفحته التي يقترب عدد روادها من 2 مليون فرد، معلقا: "مبروك للشعب المصري مشاركته القوية في التجربة الديمقراطية الحقيقية الأولى منذ 60 عاما.. طعم الحرية عذب.. أتطلع إلى سماع أخبار سعيدة أخرى عن تدشين الحرية في ليبيا واليمن وسورية. اللهم بارك في هذه الأمة. آمين"
بينما جاءت التعليقات الطريفة من شباب الفيس بوك كالتالي:
ربنا يرحم أيام مبارك.. مكنش بيخلينا نحمل هم التصويت
حسني مبارك: أيامي الناس كانت بتستفتي قلبها وهي قاعده في البيت، وأنا وحكومتي الذكيه كنا بنعرف لوحدنا الناس عايزه ايه ... وهو ده التطور.. مش تقوللي طوابير وزحمه... يا راجل كبر مخك
وكالعاااااااادة :- ينتقل الشعب المصرى من مرحلة الى مرحلة جديدة خاااااااالص " من مرحلة التصوير مع الدبابة , إلى مرحلة التصوير مع صباعه
للمرة الاولى في تاريخ مصر يتم حرمان المصريين المتوفين من التصويت في الاستفتاء .. فين بقى الديمقراطية
سألت قهوجى هتعمل ايه فى الاستفتاء؟ قال هاقول "لا" طبعا بقوله ليه طبعا؟ قاللى يعنى أنا لو عملتلك كوباية الشاى دى على التفل هتشربها؟
أنا مش سلبي.. وصباعي بمبي
اني جلت لع والف لع بس مكانش في وقت اكتب الالف لع كلهم كتبت واحده بس مؤقتاً
أصابع المصريين بقى لونها بمبي :)))
اغنيه ما بعد الاستفتاء : خلي الصوباع صاحي صاحي صاحي
عاجل | تقرر مد فتح لجان الاستفتاء إلى حين التأكد أن كل المواطنين لونوا صباعهم بينك و إتصورو معاه و اللون واضح في الصورة
الشعب يريد...اسقاط الطابور
ويخرب بيت اللي حيقول لأ ، وهو من جواه بيقول لأ ، وواحد واقف جنبه بيقول نعم
يا جماعة من هنا و رايح .......صوباعنا بقى له قيمة.......بلاش نبهدله
وأخيرا انتقل الختم من قفانا إلى أصابعنا
ايه التشابه بين نتيجه الانتخابات ونتيحه المدارس والجامعات؟ الاتنين بيظهروا بعد ما يتم تصحيح الورق
ازاي ترضيلي حبيبتي ....صباعي مايبقاش بمبي ..... أنا قلب كان بيوجعني ومنتيش حسه بوجعي ازاي
يا جماعة بطلوا طفاسة ,,,,,هو صوباع واحد مش تستحمى بالحبر
الصوبع اللى على حق يقول للاستفتاء لأ.. والصوبع اللي حبناه يقول للاستفتاء آه
أنا مصري أحترم نتيجة الاستفتاء أيا كان ..و إلا أبقى عيل فاكس
حملة تجميع مليون صباع مصرى شاركوا في التصويت..
تمت عمليه التصويت بنجاح حيث ادلى مصريين كتير اوى بصوتهم ..وكانت الاسئلة متوقعة وجايه من الورق اللى كان بيتوزع قبل الاستفتاء بيومين ولم ترصد اية حالة غش... وسيعلن المجلس الاعلى للقوات اللى هما عندهم صفحة عدت نص مليون عن العشرة الاوائل غدا.. والله الموفق والمستعان
طرائف نتيجة الاستفتاء:
وبعد الاعلان عن نتيجة الاستفتاء بموافقة نحو 78% ممن قاموا بالتصويت على التعديلات الدستورية، في مقابل 22% قالوا لا، كتب أما الاعلامي والناشط السياسي احمد العسيلي: "على فكرة على فكرة أنا مُتفائل جدًّا، مش متأكد ليه، يمكن عشان مش عايز اتشاءم، بس غالبًا لإن الناس دول كلّهم اللي ماسكين في خناق بعض عشان الوطن، شيء يدعو في النهاية للتفاؤل. فاضل بس نتعلّم كلّنا نتخانق بالأفكار مش بالألسنة".
بينما جاءت أطرف التعليقات عبر صفحات الفيس بوك الساخرة كالتالي:
أول بيان من الجيش إلى الشعب بعد ظهور نتيجة الاستفتاء: من المجلس الأعلى للقوات المسلحة الى الشعب المصري العظيم: لأه تلوئك
محمد حسنى مبارك يربى ذقنه .. وينضم لجماعة الاخوان "المحظوظة"
عارفين اللي قال "لا" بيفكرني بايه.. بالزمالك بيلعب كوره حلوه بس مش بيكسب
مش مهم مين قال لأ أو مين قال نعم .. المهم اننا كلنا حطينا صوبعنا في نفس البرطمان .. وهي دي الديمقراطية
بيقولك احمد مكى هيعمل الجزء التانى من فيلم لا تراجع ولا استسلام بس هيكون عن الاستفتاء الى حصل .. بس الراجل الى هيمثل معاه هيقول: أين أصواتي؟
البلطجية يطالبون بإعادة الاستفتاء والا سيعتبروا النتيجة لا
الناس اللي قالت نعم للتعديلات: من انتم؟؟ من انتم؟؟ ثورة ثورة.. لا رجوع
ياثورة ماتمت ......خدها الاستفتاء وطار