مقال محمد فتحى السيسى بيقول لكم: اخشعوا

كخ يا بابا كخ..
عيب يا شاطر إنت وهو..
العبوا مع بعض كويس بدل ما آخد الكورة ومفيش لعب بعد كده.
حبوا بعض عشان خاطر مصر..
اختشوا شوية ده انتو كبار.. سبتوا إيه للعيال الصغيرة...
اتفقوا على حاجة عشان بلدنا.
هتنزلوا كلكم يوم 30، ودول يضربوا دول، ودول يقتلوا دول، وفى الآخر إحنا اللى بنشيل قرفكم، وإحنا اللى حيهتف لنا الناس، بس الغلابة هما اللى بيدفعوا التمن.
وانتو كلكم بتوع مصالحكم، مش بتوع مصلحة الغلابة.
وهو انتو لو بتوع مصلحة الغلابة كنتو خليتونا نوصل للى احنا فيه دلوقت؟
ما تنساش نفسك يا حاج..
احنا محترمين نفسنا عشان الشرعية، وماسكين نفسنا عشان ماحدش يفتكرنا عايزين نعمل انقلاب. احنا بتوع حرب ومعارك ومش عاوزين ولا نحكم ولا نتعاص بالقرف ده تانى، فماتنساش نفسك.
احنا محترمين مع المحترم.. ومؤدبين مع المؤدبين.. انما مش عشان ساكتين هنتركب.
الدكر فيكم يفكر يقرب للجيش، ولّا يعمل اللى عملتوه مع طنطاوى ومشّيناه بمزاجنا.
الألاضيش بتوعكم لو عايزين نلمّهم.. حنلمّهم. ولو مش عاوزين حد يتكلم علينا نص كلمة هنعلّمه الأدب.. إنما عشان خاطر مصر بنلعب يوجا وماسكين أعصابنا ومستحملين.
وانتو كمان يا كباتن.. أخد الحق صنعة.. عايزين تمشّوه مش هيمشى.. عارفين ليه؟؟
عشان لازم (الناس) هى اللى تمشّيه.. وانتو مش لوحدكم (الناس)
عايزين تعدلوه.. تعالوا نقعد نتكلم كده، ونشوف مين زعلان من مين، ونراضى دول ونراضى دول، وبوس يا ابنى راسه ويبوس هو كمان راسك وهى كانت دخلة شيطان.
وكله عشان خاطر مصر
احنا سبناكم كل ده عشان الناس تشوف شغلكم
وكل واحد يشيل شيلته
مش انتو اللى خليتوهم يقولوا يسقط يسقط حكم العسكر
أهو انتو برضه اللى خليتوهم يرجعوا ويقولوا الجيش والشعب إيد واحدة
(هكذا فهم مليجى بيان الفريق أول عبدالفتاح السيسى وزير الدفاع)
ثم إنه استطرد:
ده ماطلعش سيسى يا باشا.. طلع تعلب.
عارف فيلم الراس الكبيرة بتاع بروسلى؟؟
أهو السيسى ده راسه أكبر منه!!