القارئة امال سامي تكتب : انا اللي خرمت عجلة الأنتاج .. انتا مين ؟؟

الصراحة في مشوارنا الطويل لخرم عجلة الانتاج اتعرفت على ناس محترمة جدا كلها كان ليها نفس الهدف جمعنا هدف واحد
ومبدأ واحد
وهو اننا " نفَّسي " اقتصاد البلد دي
ونروع الآمنين
وعشان كدا تظاهر بعضنا واعتصم البعض الآخر
واستحمل الرصاص والنموس والذباب وقذارات الألسنة البشرية وهو نائم امام كليته يتحدى البرد والحر والمطر
حيث اختلفت الفصول بينما نحن صامدون
وكل دا عشان نخرم عجلة الانتاج
وفي اثناء عملية الخرم ، اتعرفت على ناس محترمين كتير
منهم اللي كان مصر انه يخرم العجلة على طول
ومنهم اللي كان بيقول نقعد عليها قعدة رجل واحد فهي هتفسي لوحدها
ومنهم اللي كان بيقول حرام عليكو فسوها واحدة واحدة
المتظاهرين في قنا بردو هدفهم مش طائفي على فكرة
ولا عشان المحافظ دا فل من الفلول ولا حاجة
ولا انه ديل من ديول النظام السابق
لأ
الناس دي بتتظاهر وتعتصم عشان تخرم معانا عجلة الانتاج
والمتظاهرين في الاسكندرية بردو
عارفين كمان ؟؟ الناس اللي بتتمشى على الكورنيش دي
مش عشان بيحبوا بعض لأ
ولا عشان ياكلوا درة - سمعاك انا - ولا ترمس بردو
لأ
كل دا عشان يفكروا بهدوء ورواقة ازاي يخرموا عجلة الانتاج
فاكرين كريم عبد العزيز اما قال انا اللي كلت الجبنة ؟؟؟
اهو دا بقى كان شرارة الثورة المهببة اللي خربت عجل الانتاج في مصر كلها
دا كان " السييم " اللي بين كريم وبين باقي الثورجية
ومعناه انا اللي خرمت العجلة
فهمتوا بقىىىى ؟؟؟
اه يا شعب من غير عجلاااااتي
مهو لو كان في عجلاتي محترم في البلد دي مكنش دا بقى حالنا
يلا
شعب مقزز لا يستحق الحرية فعلا
بلد بتاعت مظاهرات صحيح
روحوا كدا كتكم القرف وانتوا محترمين
آمال تهيب بالقوات المسلحة
أرجوكم اعيدوا لنا مباارك
إحنا آسفين يا ريس
إحنا ولاد تيت يا ريس
أرجع يا ريس كنا بنهزر معاك
ارجع اقرفنا تاني عشان الناس تفتكر ان ااساسا مكنش في عجلة عشان تتخرم