هل هناك علاقة بين حادث الاسكندرية وصفحة "اول حادث انتحار في 2011"؟!

من التفاهة والسطحية انى اربط حادث مؤثر وأليم بحجم حادث الاسكندرية الذى راح ضحيته الكثير من الأبرياء بصفحة على "الفيسبوك"، ومن السذاجة ايضاً ان اقوم بهذا الربط بعد ساعات قليلة من الحادث ووجود الكثير من الخيوط المتداخلة بين الجهات الداخلية والخارجية المشكوك فيها!!
صفحة "اول حادث انتحار في 2011" هى صفحة على الفيسبوك لايعلم احد اى شئ موثوق به عنها وهى تدار من قبل شخص قال انه سينتحر فى اول العام الجديد وقام بعمل هذه الصفحة حتى لا يتهمه احد بأى سمعة سيئة ويعرف الناس اسباب انتحاره "كما قال".
فقط، اريد ان اضع بعض النقاط على الحروف بخصوص صفحة "اول حادث انتحار في 2011" على الفيسبوك واطرح بعض استفساراتى التى اثارت شكوكى:
اول بوست تم وضعها على الصفحة يوم الاربعاء الماضى اى قبل الحادث بيومين وكانت بالنص "انا بحب مصر اوي وبحب اهلي وكان نفسي اخدمهم اوي بس مبقاش ينفع اي حاجه ولا هينفع اي حاجه زي ما انتم عارفين مفيش حرية مفيش شغل مفيش جواز مفيش سعادة مفيش حياة كريمة انا يمكن الحاجه الوحيدة اللي هقدر اعملها إني بموتي احرك المية الراقدة حتي لو حاجة بسيطة سعدوني ومضيعوش عليا الفرصة اني اموت ويقولوا دا انتحر عشان قصة حب فاشلة معادنا ليلة رأس السنة
Wednesday at 1:12am"
صاحب الصفحة "قال" انه قرر فى اللحظة دى الانتحار ليلة رأس السنة..
بعدها قرر صاحب الصفحة انه مش عايز يتجسس على بلده زى ما غيره بيعملوا وانه ينتحر افضل من انه يعمل حاجة غلط بقوله "انا عاوز اريح نفسي وعمر ما الشغل الحرام ولا ان الواحد يتجسس علي بلده دا هيريحني بالعكس كل الغلط متوفر بس انا مش عاوز الغلط دا"..
وبعدها قرر تماماً انه مش هيرجع عن فكرة الانتحار وان الأمل عنده مات وعمل بوست "غريبة" جايب فيها معنى كلمة الانتحار على ويكيبديا وكاتب "اللي ميعرفش عن الانتحار يريت ياخد فكرة المقال دا محترم جدا وخالي من العواطف"..
وبعدها كتب وسيلته للانتحار وقال "بصوا انا فكرت كتير في كيفية الانتحار ولقيت الوسائل كتيرة وبعدين اكتشفت ان الواحد ينتحر علي حسب شخصيتة يعني البنات بتنتحر بقطع الشرايين المهم انا سبت نفسي تفكر ازاي اعمل كدا واحس الموضوع وكان النتيجة اني هاخد مخدر ومعاه سم وهطلع علي مكان علي النيل انا عارفه وهحرق نفسي في نفس اللحظة اللي من السهل اقع فيها طبعا المكان هيتعرف لكن اثناء الحادثة هتبقي علي عينك يا تاجر وطبعا هيكون في اول ساعات اليوم الجديد من السنة الجديدة"!!
ولا يعلم الا الله ما اذا كان هذا الكلام صحيحاً ام هو مجرد صدفة ان يحدد الزمان الصحيح لكن المكان الخاطئ ؟!
وبعدها يوم الخميس قرر انه يكتب "هام جدا : اقسم بالله قضيتي في رقبة كل انسان شريف
بعد موتي انشروا كلامي دا وقولوا لأي ادعاء علي اني اخدت جرعة مخدر زيادة او انتحرت عشان قصة حب او مشكلة جنسية قولوا لا قولوا 80مليون لا
الحقيقه يا سادة اني شاب مصري سني بيكبر ومفيش جواز ومفيش شغل محترم ومؤهلي عالي وكتبت تفاصيل علي الوول امبارح هعمل كدا بعد اول دقيقة في السنة الجديدة بالسم ثم الحرق والسقوط في النيل
وهدف الصفحة تحريك المجتمع بعدي وعدم المساس بسمعتي"....!!
ثم حدد المكان والزمان "انا جهزت شنطتي وحطيت فيها كل الصور بتعتي
والسم والمخدر في جيبي وجيركن البنزين هنزل املاه
وطبعا من بنزينة بعيدة اوي وحطيت كل كتاباتي اصلي نسيت اقول اني بعرف اكتب كويس اوي وحاجات صغيرة كانت ذكري عندي من ناس عارفين
الشنطة دي لو حد هيشتريها بكنوز الدنيا انا مش موافق
بعد ما اجيب البنزين هرجع عشان اقعد شوية مع اهلي وهكتب اخر رسالة
وبعدين هنزل عشان محتاج ازور كام مكان بكرة بعد الجمعة لاني خلاص حددت المكان والزمان"؟!!!!
وبعدها حط نوت اسمها "عنوان حكاية اول حادث انتحار في 2011 بس مش كل الحكاية"
وبعدها وقبل الحادث بحوالى 3 ساعات قال "نفتح حوار وبعدين امسحه قبل ما اقوم انا في سيبر وكلامي هيكون قليل بس ارجوكم عاوزين نتفق ان قراري مش هرجع فيه ودا اللي بحاول اقوله من ساعة ما اتكلمت بس اقدر اجاوبكم علي سؤال عاوزين تعرفوه انا حاسس بايه بفكر ازاي يعني اي سؤال يكون فيه تطفل صدقوني انا عاوز اردلكم ذرة من مشاعركم النبيله عشان كدا دخلت واتكلمت قولتوا ايه ؟ هتستحملوني نص ساعه"!!!!!!!!!!!
وكمان لازم تشوفوا الصور مكتوب فيها ايه من تعليقات لصاحب الصفحة !!
مش هدفى انى اربط بين الحادث والصفحة لكن هل من السهل اوى كدة ان واحد يقرر انه يقتل ابرياء فى الساعة الأولى من ايام السنة الجديدة وانه ينتحر وانه عنده مشاكل وحدوث حادث فعلاً فى الاسكندرية ؟؟
هل من السهل ان اى حد يعرف معاد الحادث قبل حدوثه حتى لو كان بيهزر ؟؟
هل من السهل اننا نلاقى حد كاتب الكلام دا فعلاً قبل الحادث ويقول ان فيه حاجة هتحصل وتحصل عادى كدة ؟؟
فيه جوانب كتير جداً للموضوع وأكيد مش لازم نبصله من الجهة دى بس لكن لازم جداً اننا ناخد بالنا من الكلام دا..
وحتى اذا كانت هذه الصفحة بالكامل "أى كلام" ازاى قال صاحبها ان فيه حاجة هتحصل الساعات الأولى من اول السنة ؟؟
والله أعلم بكل شئ
اقرأ ايضاً:
حادث عنصري مؤسف جدا ضد كل المصريين في الإسكندرية
التقديرات الأولى لحادث الاسكندرية المؤسف: 7 قتلى و 12 جريح!!
صورة احد السيارات المتسببة فى الحادث المؤسف وسقوط افراد من حراسة الكنيسة
سيطرة الأمن على المنطقة واقوال الشهود عكس التصريحات الرسمية
بعض الصور لموقع الحادث المؤسف بالاسكندرية
لمن يحتاج اى مساعدة لضحايا حادث الاسكندرية المؤسف
خاص: أحد المواقع الالكترونية حث على التفجيرات منذ اسبوعين!!