ولمَّا هى تقيلة بتشيلها ليه؟! زين العابدين خيرى

«بُص ياخويا إنت عارف إنى مابشتكيش إلا عند الشديد القوى»، هكذا تحدثت أم ترتر بصوت خفيض حزين ربما للمرة الأولى منذ عرفتها، فلديها المقدرة والجراءة لأن تقول للأعور أنت أعور فى عينه، سألتها باهتمام عما يشغلها ويدفعها للشكوى هذه المرة بهذه المرارة التى بدت فى صوتها ووجهها، فقالت: «دلوقتى بقى أنا مش قادرة ومش عارفة أعمل إيه، أنا لا بتاعت عياط ولا شحتفة ولا لف ودوران على اللى يسوى واللى مايسواش علشان يدّينى حسنة.. وشايلة الدنيا على كتافى من ساعة ما خرجْت من بطن أمى، بس دلوقتى ياخويا بقولها بصراحة أهو أنا مش قادرة».
لم أمتلك أنا من البجاحة ما يكفى لأن أدّعى أننى لا أفهم ما تتحدث عنه السيدة الفاضلة أم ترتر، وهى نفسها لم تلتفت لتعرف إن أكنت أفهم أو لا واستمرت فى كلامها: «قالولى إن الدنيا هتورد والحال هيزهزه، وأنا عارفة من الأول إن اللى أخدته القرعة تبقى تاخده أم الشعور، وعارفة إن دول لا وراهم ولا حواليهم إلا الحنجلة ولعب التلات ورقات، ولو فكرتهم، هيلاعبوك حاوريكا يا كيكا، ومش هتعرف تاخد معاهم لا حق ولا باطل.. ربنا شاهد عليا إنى قلت للجيران وجيران الجيران، وكان ناقص أكشف شعرى، وادور وراهم أجرسهم فى كل شارع وحارة، ضحكوا على الناس بتوعهم عشان ينتخبوهم، لكن ماحدش سمع ولا فهم.. دول مش بيظهروا غير فى المواسم زى النسوان اللى بتطلع توزّع قُرَص على الغلابة فى القرافة فى العيد ويرقعوا صوتين على الميّت وينزّلوا دمعتين وبعديها يروحوا ودُمتم.. ودول بقى العيد بتاعهم الأيام اللى زى دى، عيد الصندوق ياخويا.. وأنا لا باطلع القرافة ولا باعرف أمد إيدى وربنا يكفينا اللقمة اللى متغمسة ذل».
فهمت أن أم ترتر تقصد الإخوان المسلمين بكلامها، ولكن وقبل أن أقاطعها استمرت فى الحديث: «وبعدين إفرض إنى استعبطت زى بقية النسوان اللى فى الحارة ورحت خدْتلى شنطة ولْا اتنين بمناسبة مولد سيدى الصندوق، وقلت أهو حقى وحق عيالى حتى لو بناخده على إنه حسنة من أسيادنا الجُداد اللى شغالين عند أهاليهم فى الوسية، بس أهو أحسن من عينيهم برضه، وهما يعنى كانوا جابوه منين ما هو من خير بلدنا، تفتكر بقى الشنطة دى ياخويا هتكفّينى أنا وعيالى السبعة كام يوم؟ وافرض كفّونا أكل أسبوع ولّا اتنين هيدفعولنا فواتير الكهربا والمَيّة اللى بيزيدوا كل شهر.. طيب هيدفعولنا إيجار الأوضة اللى أم حرباية صاحبة البيت مابتصبرش عليا يومين وتقعدلى على الباب عشان أدفع؟!».
التقطت أم ترتر أنفاسها قليلا قبل أن تطلق مرة أخرى فى حديثها الموجع: «دا أنبوبة البوتاجاز مابقتش أقدر أشتريها يا خويا، مرة بعشرين ومرة بخمسة وعشرين، وكل مرة يطلع تلاتين عين أهلى عشان أعرف آخدها.. والنبى استغنيت عنها وقلت أعيش عيشة أهلى اللى اتربّيت عليها، وأطبخ على البابور القديم بس يا ريتنى حتى بالاقى الجاز، كل فين وفين لما عمك فتحى المسلْوع يعدى بالعربية، ولما بيتأخر بابعت حد من العيال يقف طابور طويل قدام بنزيمة الجاز بالجركن ويا يدّيله يا مايدّيلوش فى الآخر، وآخرة المتمّة الواد بقلظ قفشوه فى الطابور من يومين بجركن لترين، وقال إيه عايزين يلبّسوه قضية سوق سودة.. بس ليلة أبوهم هى اللى كانت سودة، إنت عارفنى ماسكتش على الافترا أبدا ورحت خرّجت الواد مِ القسم، بس الواد الأمين المعفن ابن سنية الدلّالة لهف خمسين جنيه نوبة واحدة، عشان يمشّيلى الواد من غير ما يعمله المحضر، وقال إيه عشان يراضى بيهم الباشا».
«أنا عارفة إن اللى قبليهم كانوا حرامية ولاد ستين فى سبعين، وعارفة إنهم سايبين البلد خرابة تعشش فيها الغربان، بس هو أنا ياخويا كنت ضربتهم على إيديهم عشان يتنيلوا يقولوا خلاص إحنا هنهش الغربان ونخليلكم الخرابة جنينة؟!».. هكذا استمرت أم ترتر فى حديثها دون توقف: «عمرك شفت ياخويا راجل مديون وطلعان عين اللى خلفوه وعياله رايحين يتخانقوا على التركة؟! والنبى لو حلفوا لى على المَيّة تجمد ما صدق، لما هى تركة معفنة وتقيلة زى ما هما بيقولوا كانوا ليه رايحين يموّتوا نفسهم عشان يلهفوها ويشيلوها لوحدهم وكمان يبلطجوا على أى حد يجيب سيرتها؟ بلاش كده، أفهمهالك بطريقة تانية: دلوقتى أبونا كان فلاتى وبتاع نسوان ومضيّع الفلوس اللى ورثها هو راخر فى الحرام والكلام الفاضى، ومش عارف لا يشغّلها ولا يأكلنا، ومعيّشنا فى الفقر والقرف، فقلنا نحجر عليه، ورحنا اشتكينا فى المحكمة واتخانقنا كلنا قدام المحكمة مين فينا اللى يشيل الشيلة مكان أبونا وتبقى الفلوس دى فى رقبته، قامت المحكمة حكمت إن الشيلة يشيلها أخونا اللى عمل فيها ملاك قدامها، وقالت ده هو اللى يبقى وَصِى عليكو عشان بيعرف ربنا وبيصلى، يعنى هيتقى ربنا فيكم، قام إيه بقى أخونا دا كل ما نقول له عايزين من اللى اتحرمنا منه، يقول لنا: منين؟ هاجيبلكم منين؟ مانتو عارفين أبوكو سايب كل حاجة خربانة.. نقول له: طيب صلّح بلّاعة الحمام اللى عمّالة تطفح علينا قرف، يقول لنا: السباكة كلها بايظة وعايزة تتغير ومافيش فلوس أغيرها.. نقول له: طيب السقف بيقع علينا، يقول لنا: البيت كله عايز يتهدّ وماعنديش فلوس أبنيه من جديد.. نقول له: طيب داخلين على الشتا وعايزين نجيب لبس، يقول لنا: وأنا يعنى أرحم من ربنا استحملوا قضاه ولّا هتكفروا؟!، نقول له: مش لاقيين أكل، يقول لنا: مانتو بتاكلوا كتير ومافيش حاجة بتكفيكم ولو عايزين هاتوا أشترى لكم!، نقول له: طيب غور فى داهية وسيبها وامشى واحنا هنتصرف، يقول لنا: أبدا هوّ انتو اللى كنتو جبتونى دا حكم محكمة ولازم تحترموه غصب عن عينكم.. يبقى بذمتك ياخويا فاضلنا إيه تانى نعمله؟ صحيح أنا خلاص مابقتش قادرة، بس وحياة خالتك أم ترتر ما هسيبه يتهنى بيها وحقى هاخده يعنى هاخده».