هنأخونها هنأخونها..

ومرسى تخصص حوادث
لم يكن فنجان القهوة هذه المرة بطعمه المعتاد.. فقد بدا لى وكأنه فنجان حلبة حصى .. حتى البن اصبح مختلفا فى زمن الإخوان المسلمين .. نهضت متثاقلة ونزعت هاتفى المحمول من الشاحن، وطلبت رقم خيرت الشاطر الذى رد بسرعة : أهلا ياخالة سطوطة .. قلت له :لا اهلا ولاسهلا بيك ياسيدى .. انتم بهدلتم البلد ياخيرت واصبحت صفحة الحوادث نقرؤها طيلة الاربعة وعشرين ساعة, حتى طعم الاشياء مررتموه .. قال : إيه بس اللي جرا لك ياخالة سطوطة.. بتقولى كده ليه هو احنا عملنا لك حاجة ؟ قلت : هو انت عايز تعمل اكتر من كده .. انت عارف انى مدمنة قهوة، ولا استطيع ان أبدأ يومى بدون فنجان القهوة, إلا اننى وجدتها بطعم الحلبة الحصى.. قال : دى أنواع بن جديدة نزلت السوق ياخالة استوردناها من تركيا بطعم الحلبة الحصى، وبطعم العرق سوس، والخروب, وكل هذه المشروبات عربية اصيلة !! قلت : ياسلام على الغلاسة .. كل هذه المشروبات موجودة فى السوق.. لكننى اريد طعم البن الاصلى !! قال : البن الأصلى حرام ياخالة ومضر بالصحة ويسبب القولون للشعب .. قلت : والله لا يسبب القولون إلا انتم وأفكاركم هذه التى ستقتلنا ناقصى عمر .. عموما انا هكلم مرسى اللى سايب لكم البلد سداح مداح .. قال : مرسى تخصص حوادث ومش فاضى من تقديم العزاء لأهالى ضحايا حوادث القطارات وانهيار العمارات.
قلت : وانت طبعا تخصص صفقات واستيراد كل مايؤذى الشعب وينغص حياته .. قال : انتى شايفة ياخالة حال البلد, والجماعة بتوع جبهة الإنقاذ عمالين يبوظوا القطارات علشان تعمل حوادث ويسخنوا الشباب علشان يعملوا مظاهرات ويحرضوا القبائل علشان تقتل بعضها ويشتمونا على الفضائيات لدرجة انهم دفعوا مبلغا ضخما لسواق تاكسى علشان يعبر مزلقان أرض اللواء امام القطار القادم من الصعيد, فمات الرجل ولم يدفعوا المبلغ للورثة.. وكل هذا علشان يقال إن مرسى وشه نحس على البلد..دا حتى مرسى كان بيزور مصاب فى المستشفى, وسأل المصاب نفسك فى إيه نعملهولك يا ابنى؟ فراح المصاب رد عليه : نفسى تسيبوا البلد وتخلونا فى حالنا .. طب لو مرسى وشه نحس, يبقى إيه ذنب الإخوان المسلمين .. طب إيه ذنب السلفيين ياخالة ؟!.. قلت : ألستم انتم من رشح لنا مرسى ؟! قال : غصب عننا ..انتى عارفة انى انا اللي كنت مرشح للرئاسة.. لكن ولاد الأبالسة طلعوا فيا القطط الفاطسة.. فرشحت لهم مرسى علشان يتعلموا الأدب .. يشربوا بقى حوادث وزعابيب !!
قلت : لكنك قدمت لنا مرسى على أنه حامل مشروع النهضة لمصر .. قال : طب وانتو عايزين نهضة أكتر من كده ؟ خلاص الدورة الجاية نجيب لكم العريان رئيسا !! قلت : والله طلع لك حس ياشاطر وبتوزع الأدوار وتختار رئيس مصر على مزاجك !! قال : علشان تعرفوا إن البلد دى ليها أصحاب ياخالة !! قلت : ولماذا لاتظهر للناس وتخاطبهم وجها لوجه طالما انك صاحب البلد أم انك اعتدت على العمل خلف الكواليس والغرف المغلقة منذ ان كنت سجينا طول عهد مبارك ؟! قال : ربنا يمسيه بالخير .. مبارك ترك لنا البلد مهلهلة نفعل بها مانشاء, وإن شاء الله سوف نشكلها على مزاجنا وهنأخونها هنأخونها حتى لو شرب الشعب من البحر !! قلت: ياعم الشاطر ارحمنا انت وجماعتك دا نص الشعب مات من الحوادث !! .. قال: طب مش انتوا بتقولوا نموت نموت وتحيا مصر؟ اشربوا بقى !! .. قلت : انا ألاحظ إنك هادى فى ردودك ومش عايز تبادلنى النرفزة.. وعمال تقول ياخالة ياخالة.. ممكن اعرف إيه سر البرود اللى انت فيه ده ؟! .. قال : اصل أنا لسه شارب قهوة بطعم النعناع ..علشان كده اعصابى هادية.. بس مفعولها ممكن ينتهى حالا.. فلمى الليلة ياسطوطة.. من غير خالة.. وإياكى تنشرى الحوار الذى دار بيننا.. انا كنت بهيس معاكى مش اكتر !! قلت : ماتخافش ..بس ابعت لى شوية بن بطعم القهوة وحياة ابوك !! قال : حاضر ياستى هبعت لك بن برازيلى من اللى بيحبه قلبك !! ولم تمر نصف ساعة حتى جاءنى شاب بلحية خفيفة وقدم لى كيس البن البرازيلى.. فقلت فى نفسى: انا بقى هعلمك ازاى تهيس معايا ياشاطر.. وجلست لأكتب لكم هذا الحوار الذى يأبى أن أنشره !!