الشاطر "بيهيس": هنأخونها هنأخونها .. ومرسى تخصص حوادث !!

لم يكن فنجان القهوة هذه المرة بطعمه المعتاد .. فقد بدا لى وكأنه فنجان حلبة حصى.. حتى البن أصبح مختلفًا فى زمن الإخوان المسلمين.. نهضت متثاقلة ونزعت هاتفى المحمول من الشاحن وطلبت رقم خيرت الشاطر الذى رد بسرعة: أهلًا ياخالة سطوطة.. قلت له: لا أهلًا ولا سهلًا بيك ياسيدى.. أنتم بهدلتم البلد ياخيرت وأصبحت صفحة الحوادث نقرؤها طيلة الأربعة وعشرين ساعة حتى طعم الأشياء مررتموه!! .. قال: إيه بس اللى جرا لك ياخالة سطوطة.. بتقولى كده ليه هو احنا عملنالك حاجه؟ .. قلت: هو أنت عايز تعمل أكثر من كده؟..أنت عارف إنى مدمنة قهوة ولا أستطيع أن أبدأ يومى بدون فنجان القهوة إلا أننى وجدتها بطعم الحلبة الحصى!! .. قال: دى أنواع بن جديدة نزلت السوق ياخالة قد استوردناها من تركيا بطعم الحلبة الحصى وبطعم العرق سوس والخروب وكل هذه المشروبات عربية أصيلة!! .. قلت: ياسلام على الغلاسة.. كل هذه المشروبات موجودة فى السوق لكنى أريد طعم البن الأصلى!!.. قال: البن الأصلى حرام ياخالة ومضر بالصحة ويسبب القولون للشعب.. قلت: والله لا يسبب القولون إلا أنتم وأفكاركم هذه التى ستقتلنا ناقصى عمر.. عمومًا أنا هكلم مرسى اللى سايب لكم البلد سداح مداح .. قال: مرسى تخصص حوادث ومش فاضى من تقديم العزاء لأهالى ضحايا حوادث القطارات وانهيار العمارات!! .. قلت: وأنت طبعًا تخصص صفقات يبوظوا القطارات علشان تعمل حوادث ويسخنوا الشباب علشان يعملوا مظاهرات ويحرضوا القبائل علشان تقتل بعضها ويشتمونا على الفضائيات لدرجة أنهم دفعوا مبلغًا ضخمًا لسواق تاكسى علشان يعبر مزلقان أرض اللواء أمام القطار المقبل من الصعيد فمات الرجل ولم يدفعوا المبلغ للورثة وكل هذا علشان يقال إن مرسى وشه نحس على البلد.. دا حتى مرسى كان بيزور مصاب فى المستشفى وسأل المصاب نفسك فى ايه نعملهولك يا إبنى؟ فراح المصاب رد عليه: نفسى تسيبوا البلد وتخلونا فى حالنا.. طب لو مرسى وشه نحس يبقى إيه ذنب الإخوان المسلمين؟.. طب إيه ذنب السلفيين ياخالة؟!.. قلت: ألستم أنتم من رشح لنا مرسى؟!.. قال: غصب عننا.. أنت عارفة إنى أنا اللى كنت مرشح للرئاسة لكن ولاد الأبالسة طلعوا فيا القطط الفاطسة.. فرشحت لهم مرسى علشان يتعلموا الأدب .. يشربوا بقى حوادث وزعابيب!!.. قلت: لكنك قدمت لنا مرسى على أنه حامل مشروع النهضة لمصر.. قال: طب وانتو عايزين نهضة أكتر من كده؟.. خلاص الدورة الجاية نجيب لكم العريان رئيسا!!.. قلت: والله طلع لك حس ياشاطر وبتوزع الأدوار وتختار رئيس مصر على مزاجك!!.. قال: علشان تعرفوا إن البلد دى ليها أصحاب ياخالة!!.. قلت: ولماذا لا تظهر للناس وتخاطبهم وجهًا لوجه طالما أنك صاحب البلد أم أنك اعتدت على العمل خلف الكواليس والأسوار والغرف المغلقة منذ أن كنت سجينًا طول عهد مبارك؟!.. قال: ربنا يمسيه بالخير.. مبارك ترك لنا البلد مهلهلة نفعل بها مانشاء وإن شاء الله سوف نشكلها على مزاجنا وهنأخونها هنأخونها حتى لو شرب الشعب من البحر!!.. قلت: ياعم الشاطر ارحمنا أنت وجماعتك دا نص الشعب مات فى الحوادث بتاعتكوا.. قال: طب مش انتوا بتقولوا نموت نموت وتحيا مصر؟ اشربوا بقى!!.. قلت: أنا ألاحظ أنك هادى فى ردودك ومش عايز تبادلنى النرفزة.. وعمال تقول ياخالة ياخالة.. ممكن أعرف إيه سر البرود اللى أنت فيه ده؟!.. قال: أصل أنا لسه شارب قهوة بطعم النعناع .. علشان كده أعصابى هادية.. بس مفعولها ممكن ينتهى حالًا.. فلمى الليلة ياسطوطة.. من غير خالة.. وإياكى أن تنشرى هذا الحوار الذى دار بيننا.. أنا كنت بهيس معاكى مش أكتر!!.. قلت: ماتخافش.. بس ابعتلى شوية بن بطعم القهوة وحياة أبوك!!.. قال: حاضر ياستى هبعت لك بن برازيلى من اللى بيحبه قلبك!!.. ولم تمر نصف ساعة حتى جاءنى شاب بلحية خفيفة وقدم لى كيس البن البرازيلى فقلت فى نفسى: أنا بقى هعلمك إزاى تهيس معايا ياشاطر.. وجلست لأكتب لكم هذا الحوار الذى يأبى أن أنشره!!