صدور الجزء الثالث من"حكايات حصاوي"للينين الرملي

عن دار نهضة مصر صدر مؤخرا الجزء الثالث من كتاب "حكايات حصاوي" للينين الرملي.
الكتاب الصادر في 270 صفحة، هو مجموعة من المشاهد المسرحية يكتبها لينين في هيئة "حكاوي" ، وتدور كلها حول حسن حصاوي الشخصية الدرامية التي تتميز بالبراءة والتواضع والمسالمة، ولكنه يعاني سوء أحواله المعيشية وإهمال الآخرين له.
حيث يتخيل المؤلف وفق صحيفة "اخبار الأدب" الإسبوعية المصرية أن حصاوي قد أغشي عليه لعدة سنوات، ثم أفاق فلم يفهم ما حدث من تغيرات في المجتمع أثناء غيبوبته، وأصبح كل ما يراه يحدث حوله يصيبه بدهشة صاعقة لا يتحملها عقله، فيغشي عليه من جديد، ولكن لدقائق قليلة، ما يكاد يفيق بعدها حتي يفاجئه ما هو أغرب، وهكذا يحكي الرملي مغامرات حصاوي من خلال ثلاثين مشهدا كوميديا قوامه الحوار، حيث يكاد كل مشهد أن يكون مسرحية قصيرة جدا، وقد نشرت هذه الحواديت مسلسلة في جريدة الأهرام قبل صدورها في كتاب.
ومن يوميات حصاوي نقرأ:
(‏لاحظ حصاوي بعض الشبان يجلسون بالمقهي لساعات طويلة يدخنون الشيشة وينظرون لساعتهم في ضيق‏)‏
حصاوي‏:‏ أنتم منتظرين حد‏.‏
شاب‏1:‏ أيوه منتظرين مصلحة‏.‏
حصاوي‏:‏ مصلحة؟ اسم غريب قوي‏..‏ دا واحد صاحبكم؟
شاب‏2:‏ لا يا عمي‏..‏ مصلحة يعني شغل‏..‏ واحنا مستنيين الشغل‏..‏ فهمت؟
حصاوي‏:‏ وأنتم بتشتغلوا إيه؟
شاب‏3:‏ يوه‏..‏ دا ما بيفهمش‏..‏ يا عمي احنا ما بنشتغلش‏..‏ وعشان كده مستنيين حد ييجي يشغلنا‏.‏
حصاوي‏:‏ هو قالكم جاي الساعة كام؟
شاب‏4:‏ يا ساتر عليك‏..‏ ما حدش قالنا إنه جاي‏.‏
حصاوي‏:‏ أمال مستنيين إيه بالظبط؟
شاب‏1:‏ عشان يمكن ييجي حد ويطلبنا للشغل‏.‏
حصاوي‏:‏ واللي يمكن ييجي ده‏..‏ يعرف منين إنكم ما بتشتغلوش؟
شاب‏2:‏ لأن دي معروفة‏..‏ أغلب الشباب مش لاقيين شغل‏.‏
حصاوي‏:‏ واللي عايز موظفين يعرف منين إنكم قاعدين ع القهوة؟
شاب‏3:‏ أمال هنقعد فين؟
حصاوي‏:‏ يعني حصل قبل كده إن حد جه القهوة وطلب زمايل لكم للشغل؟
شاب‏4:‏ لأ‏..‏ احنا بقى لنا ثلاث سنين‏..‏ كل يوم نقعد في قهوة شكل ولا حد عبرنا‏.‏
حصاوي‏:‏ ولما ما حدش عبركم‏..‏ لسه بتقعدوا ع القهاوي ليه؟
شاب‏1:‏ ما احنا قعدنا سنتين في بيوتنا وبرضه ما حدش عبرنا‏.‏
حصاوي‏:‏ طب ما حاولتوش تروحوا تدوروا بنفسكم علي شغل؟
شاب‏2:‏ احنا عندنا كرامة‏..‏ واللي عنده كرامة عيب يدور يشحت الشغل‏.‏
حصاوي‏:‏ الجرايد فيها إعلانات عن طلب وظائف خالية‏.‏
شاب‏3:‏ ساعات بنتصل بالتليفونات اللي مكتوبة فيها‏..‏ أول ما نسألهم هتدفعوا لنا مرتب كام؟‏..‏ يقفلوا السكة في وشنا علي طول‏.‏
حصاوي‏:‏ طب مش تعرفوا الأول هتشتغلوا إيه قبل ما تسألوا عن المرتب؟
شاب‏1:‏ وإذا كان المرتب قليل يبقي إيه فايدة المعرفة‏..‏ هو احنا بنشتغل ليه‏..‏ مش عشان ناخد مرتب؟
حصاوي‏:‏ وأهاليكم مرتاحين لوضعكم ده؟
شاب‏2:‏ احنا عملنا لهم اللي علينا وخدنا لهم الشهادة‏..‏ نعمل إيه أكتر من كده؟
حصاوي‏:‏ وتفتكروا إيه سبب أزمة البطالة دي؟
شاب‏3:‏ معروفة‏..‏ كوندوليزا رايس بتاعت أمريكا طبعا‏..‏ أنا شفت دكتور اقتصاد في قناة فضائية بيقول إنها هي السبب في كل مصيبة‏.‏
شاب‏4:‏ طبعا‏..‏ أصلها ست شكلها وحش‏..‏ يبقي أكيد معقدة نفسيا‏..‏ وعشان كده واقفة مع إسرائيل ضد فلسطين‏..‏ وطبعا من غير ما تتحل مشكلة فلسطين مش هتتحل أي حاجة ودا سبب البطالة اللي احنا فيها‏.‏
حصاوي‏:‏ أنتم خريجين إيه؟
شاب‏1:‏ احنا من كليات مختلفة‏..‏ هندسة وعلوم وآداب وزراعة‏.‏
حصاوي‏:‏ طب ما تفكروا تستغلوا دراستكم في شغل تعملوه بنفسكم‏.‏
شاب‏2:‏ بس ما حدش فينا بيفهم في الهندسة ولا العلوم ولا الزراعة ولا الأدب‏.‏
حصاوي‏:‏ طب ما تفكروا تتعلموا حاجة مفيدة‏..‏ وتعملوا مشروع سوا وتشغلوا نفسكم‏.‏
شاب‏3:‏ لسه هنتعلم؟ احنا ما صدقنا خلصنا‏.‏
شاب‏4:‏ وبعدين مين له نفس يشتغل واحناكل ما نبص حوالينا نلاقي مظاهر الكفر‏.‏
حصاوي‏:‏ فين ده؟
شاب‏1:‏ التماثيل اللي حاطينها في كل ميدان‏..‏ ما سمعتش الفتوي اللي بتقول إنها أصنام؟
حصاوي‏:‏ طب ما تشتغلوا بالفتوي‏.‏
(الكل‏‏ ينظرون لبعضهم البعض ويصيحون بحماس‏)‏ والله فكرة‏..‏ ينصر دينك يا أستاذ حصاوي‏.‏
‏
(‏حصاوي يغشي عليه في الحال‏)‏
‏(‏ستار‏)‏