"جالك كلامى يا وطن" قصيدة للشاعر أشرف عتريس

أنا اللى طول عمر عينى بتقدر تميز
بين غنوة صبر معقودة تريد تنحل
وطرف عدودة فى حنك الأرامل
نفسها تدوب زغاريط
بس النهاردة ....
مين اللى رايح للجنة ..
ومين اللى نازل للبحر ..
يا هلترى ....
الدنيا هتعيش من بعدينا قد إيه....؟!
الليل كان صعبان عليه يرحل
والقمر مش مبطل عياط ولا نهنهة
الضنا غالى والوطن بينا بيتعاجب
بس الليل خاين والنهار شاهد عيان
حتى الأرض بتطرح دود فوق التراب
يلقى الدم والخلا خيمة وسكن
اَه يا قلب العيال...
يا متحزم فى الميدان والليل بياكل فيك
لو تزعق بالغضب ...
يجرى الزمن قدامك زى الريح
ما يهمكش صفير الحنش الباغي
أبو الجلد خشن ...
مدام بتعزم بالقسم ..
!!!!!!!
جالك كلامى يا وطن ..
البحر النهاردة غير كل يوم .. البحر
إخطبوط والموج دراعاته عفية..
البحر ....
جوفه غويط اللى ينزل جواه
ما يطلع غير بشهقه
مهمن غالب قوة الغرق
مهمن عافر وسط العشمانين
ينشف حواليهم... البحر
شبرين يادوب بينى وبين جنة حلمك
يا وطن مسكون بالغريب ولا تعرف الواجب
ماشى على راسى وعنيا مرغرغة
على خلق بتلف حوالين روحها
والكعب داير ....
تتعب وتشقى وبرضو ترجع من غير ماتتراضى
أنا اللى بقول:
الحزن له مطرح وناس تسكن جواه
مهمن يجور عليها الزمن ويخطف فرحتهم
عشان خاطرهم....
عنيا تبوس الشمس وصابحة بتغني
عشان خاطرهم وخاطر ربنا
من غير ما تزعل منى...
الدنيا هتعيش من بعدينا قد إيه....؟!
انطق يا وطن ..
الدنيا هتعيش ... قد ايه..؟!
بعدينا!!