ناصر فرغلي يكتب: (لأ)، وجمعها (لآلئ)

تعب الهتاف مننا، تعبت ببان م الدق
والحق فات من هنا، واتدارى منا ف شق
عايزة ابن عمه بقى، ولا انتي عايزة الحق؟
عشان بحبك قوي مضطر اقوللك : لأ

يا (لأ) يا كلمة السر اللي في روحي
لولاكي انا صرختي لا تقول ولا توحي
وانتي اللي وردة تعب، يا وردتي فُوحي
وانتي اللي طلقة غضب، يا طلقتي: ُروحي

سنين نغني ف(آهات)، ونسينا غنوة (لا)
نِغْمس ف ملح السكات عيشنا بلا مبالاه
بس النهارده اكتبي يا مصر باسم الله:
لأه عشان النبي، لأه عشان الحياه

شوفوا لا يمكن أعود جوا الوطن لاجئ
أو ننتهي ع الحدود متعلقة وعالق
يا كل مين اهتدى للشعب والخالق
إرفعها (لأ) مفردة، واجمعها بلآلئ

(لأ) اللي تفرق، (نعم) أبد ماهيش فارقه
إمتى جابت لك (نعم) الشغل والشقه؟
حتى ولي النعم خلى (نعم) سرقه
قول للكرامة نعم، يعني تقول: لأه.