والدة زين يوسف: السرطان يهاجم طفلي للمرة الرابعة

رحلة زين مستمرة في مكافحة المرض اللعين.. هكذا أعلنت والدة الطفل زين يوسف، الذي كافح السرطان على مدى نحو عامين، بمتابعة ودعوات من ملايين المصريين عقب عرض قصته على شاشات التليفزيون.
والدة زين، كتبت على صفحته الشخصية بموقع التواصل الاجتماعي "فيسبوك": "متابعين زين و حبايبه في كل مكان.. بعد أسبوع جميل بدأ بإجازة عائلية طال انتظارها في الطبيعة وبعدها الماراثون السنوي اللي بنشترك فيه ضد سرطان الأطفال، بدأنا التحاليل الدورية والفحوصات لزين.. بدأنا يوم الاثنين الصبح وفي نفس اليوم بليل جالي مكالمة من الدكتورة، رقم الدكتورة على التليفون علامة إن في حاجة مش كويسة للأسف".
وأضافت: "لو متابعين قصة زين من زمان حتعرفوا أنه قاوم السرطان 3 مرات.. مرتين منهم كان سرطان الخلايا الجذعية من المرحلة الرابعة والثالثة كانت من قريب بعد ما تعافي بقاله كتير، ولكن نوع تاني بسبب الكيماوي والإشعاع اللي أخده في الكلية اليمين، وبفضل الله أولا ودكاترة مخلصين ودعواتكم زين قدر يكسب وانتصر ورجع لحياته الطبيعية في المدرسة.. تخيلنا أن بعد ما اتشال جزء من كليته خلاص بقى نفوق شوية وتاريخنا مع السرطان يتلخص في فحوصات كل 3 شهور وخلاص.. بس ربنا كان له حكمة تانية وخطة تانية".
وتابعت: "المسح الذري المرة دي وضح أن فيه ورم جديد ظهر ولكن المرة دي في منطقة المثانة، إزاي وامتي وفين؟.. كلها اسئلة اتعلمنا إن ملهاش إجابات في دنيتنا.. دنيا السرطان.. احنا معندناش سيطرة على أي حاجة إلا حاجة واحدة وهي إيماننا وصلاتنا ودعائنا.. فيه حاجة واحدة بس مؤكدة وهي إن ربنا كبير قوي ومعانا. هو عمره ما سابنا وحنفضل ندعي ونصلي ونترجي كرمه ورحمته. أنا مش حكدب عليكو.. إحنا خايفين ومهزوزين ومكسورين.. امنيتنا أن بكرة حنقوم إن شاء الله أحسن. دي رابع مرة نتحط في الموقف ده. بس إن شاء الله نقوي ونقف تاني".