أحمد عفيفي يكتب ل«التحرير»: جدول الضرب والخسة والنطاعة !

5 × 2 =
10
عدد الشهداء لحد دلوقتي يا مرسي اللي ماتوا في اقل من اسبوعين عند محمد محمود وعند قصر الاتحادية .. وانت قاعد لسه بتحسبها .. مين معاك ومين ضدك .. ومين قال لك ومين عاد لك .. ومين اللي في الحارة او الزنقة اللي بيخططوا لقلب نظام حكمك .. ماشي يا مرسي .. اغلط كمان وكمان .. وادي ضهرك للميدان .. انت جوه في قصرك وشعبك بيندبح بره .. وانت قاعد .. والنايب بتاعك المستشار المبجل محمود مكي اللي بيقول انه عرف بالإعلان الدستوري من الجرايد والتليفزيون عاملي مؤتمر صحفي " ابن الرايقة " وبيقولك لابد من حوار .. والا حيبقى البقاء للأقوى .. مليشيات الإخوان اللي طلعوا من جحورهم ونزلوا يدافعوا عن القصر وعن الرئيس بالمطاوي والسيوف والسنج والبنادق والخراطيش.

10 ÷ 10 = واحد
هو واحد بس اللي لازم يتحاكم ويتأدب ويعرف ان الله حق .. الرئيس مرسي .. اللي مبقاش رئيس خلاص .. مادام وصلت للدم .. يبقى خلصت.. اطلع قول بقى سامحوني مكنش قصدي .. دلوقتي فهمتكم .. زي زين العابدين بن علي .. بس الكلام دلوقتي ميجبش تمنه .. قلنا لك انت رئيسنا كلنا .. عايزين نحس الإحساس ده .. وانت مصمم تبقى رئيس الجماعة والمندوب السامي لمكتب الإرشاد في قصر الرئاسة .. اخدت بدل الفرصة ميت فرصة .. احنا مش عايزينك تمشي .. عايزينك تعدل وتحكم حكم ربنا .. رحنا لك لحد قصر الاتحادية .. مسالمين محترمين وزي الفل .. خفت وهربت من الباب الخلفي .. وتاني يوم بعت البلطجية بتوعك المسلحين عشان تورينا العين الحمرا وتثبت لنا انك بالذوق بالعافية قاعد .. واللي مش عاجبه يمشي .. وفي الأخر محدش حيمشي الا انت بعد اقل من 6 اشهر .. رقم قياسي محدش جابه غيرك وممكن تدخل بيه موسوعة غينيس .. الرئيس اللي مشي بعد 6 اشهر وبعد ماجابه شعبه بانتخابات حرة ونزيهة.

10 × 10 = 100
100 يوم يا راجل مفيش حاجة واحدة نفذتها من وعودك .. صحيح الزبالة قلّت حبتين .. بس " الزبالة " التانية كترت أوي يا مرسي من جماعتك ، وملوا الفضائيات وقرفونا بقلة أدبهم وتكفيرهم لنا .. مش عارف ان كنت بتشوفهم ولا لأ .. ولا حد بيقول لك ولا لأ .. شوية زبالة ماليين الدنيا وريحتهم معفنة .. مش حا اقول اسامي ، بس معظمهم بدقون : احنا الملحدين الكفرة الزنادقة ولاد الكلب .. احنا الليبراليين والعلمانيين اللي النجاسة تشوفنا تقرف .. وحتى اللي مالوش دقن ومعتبر نفسه " بركة " راجل نتن بيدافع عنك بالباطل .. قصاد ايه .. الله اعلم.

5000 ÷ 50 = نتانة ونطاعة وغدر وقلة حيلة

يجي 5000 بلطجي إخواني دخلوا على خمسين واحد وواحدة معتصمين في الخيام وفيهم بنات .. فيهم بنات يا مرسي .. يمكن واخدين راحتهم في القاعدة .. اللي كاشفة شعرها واللي فاردة رجلها " بنات مع بعض .. عادي " .. يقوم البلطجية بتوعك يا مرسي يدخلوا عليهم ويهدوا خيمتهم ويضربوهم بافترا .. رجالتك يا مرسي اللي بشنبات بيضربوا ستات وبنات .. فيهم اللي انتخبتك وكان نفسها تنجح وتكمّل .. ودلوقتي كلهم مفيش على لسانهم غير كلمة واحدة : ارحل.

12 – 7 = 5
هما ال 5 مليون اللي انتخبوك في المرحلة الأولى .. وال 7 مليون كانوا مش عايزين شفيق .. يعني أصواتهم ليك مكنتش محبة .. بس قالوا يمكن يكون كويس ، واكيد بيعرف ربنا بما انه من الإخوان المسلمين .. فاكتشفوا ان الإخوان كلهم بلا استثناء الكذب عندهم " غيّة " .. بيكدبوا زي مابيتنفسوا .. يعني لو قالوا الحق ، يموتوا .. 7 مليون جم لحد عندك وقالوا : اصله مش من النظام القديم زي شفيق .. طلعت انت النظام القديم بحذافيره ومخالبه وضوافره وبشاعته .. وبقى اسمك محمد مرسي مبارك .. هو انت وانت هو .. واحنا اللي في الاخر بندفع التمن!
31 – 7 =
24
فاضل لك من النهارده 24 يوم ، ويمكن اقل ونبدأ سنة جديدة .. فاضل على أول يناير من السنة الجديدة 24 يوم .. عايزنها سنة حلوة.. مفيهاش كذب .. مفيهاش لعب التلات ورقات .. مفيهاش " اسمع كلامك اصدقك اشوف امورك استعجب " .. مفيهاش " في الوش مراية وفي القفا سلاية " .. مفيهاش اهلي وعشيرتي واحبابي اللي في جنينة الحيوانات .. عايزنها سنة نظيفة .. مفيهاش اخوان .. مفيهاش مرسي!