أحمد عفيفي يكتب: يخرب بيوتكم .. والبيوت اللي جنب بيوتكم!!!

قالك تعرف الراجل الجدع من إيه؟ .. قالك من عقله .. وتعرف " المرة " الوسخة من إيه ؟ قالك من لسانها وقلة أدبها .. وقالك ان المرة الشرشوحة أجدع الف مرة من الراجل " المنسّون " .. يعني الاسم راجل ، والفعل ست .. واللي حصل بعد مقالي الأخير " احمد يا ابن مرسي .. العب بعيد " دليل قاطع على ان ماكينة الإخوان الالكترونية " النسوانجية " شغّالة ، الله ينور .. بس انت قول كلمة عن حد إخواني ومش عاجباهم .. حتلاقي ردح حواري ، وبتوع قال الله وقال الرسول ، لا عمرهم عرفوا الله ولا عرفوا الرسول .. هما بس يعرفوا ان اللي ميزغرتش في فرحنا يبقى ابن كلب ، وعايز الدبح .. وهما دلوقتي عندهم فرح ، واللي يجي ع العريس أو حد من عياله تبقى ليلة اللي خلفوا أمه سودا.

عارفين عدد التعليقات على المقال الأخير كام ؟ حوالي 500 في الموجز والدستور والتحرير وعلى المواقع الأخرى .. وانا بابقى سعيد جدا بردود الفعل ، لكن ان تكون بهذا الحجم من البذاءات وقلة الأدب والخروج عن المألوف في الاختلاف والاتفاق بين وجهات النظر .. يبقى كده عيب .. وعيب كبير كمان.. والله العظيم كنت بحاول اشوف من وسط ال 500 تعليق ..10 بس اللي بيتكلموا بعقل ومش مهم يكونوا معايا او المقال عاجبهم .. فقط بيتكلموا بالعقل .. فكأنني انتقى 10 بيضات سليمة من قفص بيض " ميمشش " ريحته أعفن من البكابورت.

اللي معندوش دم ويقوللي : يا عفيفي يا ابن المرة الوسخة .. اى والله العظيم .. كده خبط لزق .. واللي يقوللي : ابوك ابو 21 جنيه ازاى حيعرف يربيك وهو بياخد المبلغ ده؟ .. والخفيف حبتين يقولك : يا ريتها كانت بركت عليك وهى بتولدك وكنت مت وريّحتنا منك .. واللي مصمم اني لسه غاوي شهرة وكتب أنني نلتها خلاص وأصبحت بمقالي القذر أشهر من ذهب إلى مزبلة الإعلام.

لكن لفت نظري حاجة غريبة في التعليقات .. ان معظم اللي بيشتموا من الشباب الإخوانجية - ودي مصيبة .. وحاقول ليه - وثانيا ان عندهم جهل عجيب بأمور السياسة والإعلام بصفة عامة لدرجة واحد بيعلق ويقول : انت صحفي .. مالك انت بقى ومال السياسة .. يعني الافندي مش مدرك أبدا ضرورة انك ما دمت صحفي فلابد لك والتحدث في السياسة .. وان لم تتحدث في السياسة وتشغلك أمورها .. فأنت لست بصحفي من الأساس .. أما كونهم من الشباب فقد كنت أظن ان شباب الإخوان - وكثيرين منهم كان في الميدان في ثورة 25 يناير - أكثر وعيا وعلما وتفهما وانفتاحا وإدراكا من الكبار .. لكن ثبت لي العكس .. حيث فتحوا عليا ماسورة مجاري لمجرد مقال عن ابن الرئيس محمد مرسي.. ده كان مقال كده ع الماشي .. يمكن ماكنش في بالي أساسا اكتبه ، اقوم اتشتم عليه الشتيمة دي كلها .. ياليلة كوبي.

هو انا عشان انصح ابن الرئيس مرسي بكلمتين كأنه إبني ، تقوم عليا قومة الإخوان السودا دي .. وعلى رأى حسن مصطفى ناظر " مدرسة المشاغبين " : يخرب بيوتكم والبيوت اللي جنب بيوتكم .. يا إخوان يا للي مش مسلمين.. بس بشرط تكون البيوت اللي جنب بيوتكم ناس زيكم لسانها طويل وعايز القص .. يا عالم ياغجر يا للي عقلكم في رجليكم .. انا قلت ايه عشان تفتحوا عليا ماسورة مجاري معفنة وترموا عليا كل وساختكم .. مكنتش كلمة قلتها لابن الرئيس مرسي .. صحيح فيها سخرية - ودي طريقتي في الكتابة عندما يستلزم الأمر- الاقيكم جيش مجيش للرد بالنيابة عن صاحب الشأن .. طب تصدقوا وتأمنوا بالله .. لو احمد ابن مرسي رد بنفسه، قسما بالله ليكون أكثر أدبا منكم!


ده انا لما كتبت عن الرئيس مرسي ذات نفسه " مرسي ابن المعلم الزناتي بيعك يا رجالة .. محدش " اتحمأ " بنفس الدرجة لما قلت لابنه العب بعيد .. وده ان دل على شىء انما يدل على ان الشباب بيتحمس لبعضه .. وانه شباب إخواني مغيّب.. وعندهم جهل ثقافي وفكري محصلش .. القطار بتاعهم اتجاه واحد .. يروح ميرجعش .. مع ان كل القطارات تروح اسكندرية وترجع .. واسوان وتعادود تاني .. ده الطبيعي .. انما دماغكم محشية زلط .. اللي مش معايا يبقى عليا .. واللي يجي علي " الوالايا " .. مش حنسيبه لربنا .. لأ حنطلع دين أمه الأول ، وبعدين في الآخرة ياخد حسابه تمام التمام.

رجعت للمقال اللي اثار الضجة دي كلها على مواقع التواصل الاجتماعي .. والله العظيم مالقيت اني تطاولت ابدا على ابننا احمد ابن مرسي .. كلام عادي جدا وعقلاني جدا.. ابعد يا ابني يا حبيبي عن سكة السياسة ومالكش دعوة بالسيد والدك .. ومش ناقصين جمال مبارك تاني .. واحنا عارفين ان اول الرقص حنجلة .. واحنا اتحنجل علينا لما قلنا يا بس .. ومفيش حد حيقدر يتحنجل تاني .. مالكش دعوة باللي يتقال عن السيد والدك .. احنا مش في خناقة ولازم نروح القسم ونشوف مين اللي غلطان .. ومين اللي ابتدى ومين اللي قل أدبه الأول .. ابوك رئيس جمهورية مصر العربية .. من حقنا كلنا اننا نقول له ده غلط وده صح .. ومن حقنا عليه انه يسمعنا ، واذا مسمعناش .. حنمشيه .. وكتاب الله حنمشيه .. اياكم تكونوا فاكرين ان د مرسي عشان إخواني مثلا مش حيمشي .. لأ حيمشي ، ولو اكبر منه ، برضه حيمشي مادام مش عاجبنا .. إخوان على نفسكم مش علينا.

وبعدين فيه سؤال غبي لازم فعلا نبطل نسأله : كنت تقدر تقول الكلام ده أيام مبارك ؟ .. وكأن أخونا اللي بيسأل زعلان اني بقيت اقدر أتكلم وازعق واصرخ بعد كتمة 30 سنة .. وكأنه يلومنا أننا قمنا بثورة بعد 30 سنة من المذلة والهوان .. واذا كنت بتلومني اني بقيت اقدر أتكلم ، يبقى اجري كمان عاتب الثوار : كان لازم تستنوا 30 سنة عشان تقوموا بالثورة؟ .. كنتوا فين من اول ما بدأت خطة التوريث .. وبعد تصدير الغاز لإسرائيل .. و" عد يا عدّاد ".

هو انا لو سكت ابقى جبان وابن كلب .. ولو قمت بثورة تقوللي .. قمت بيها ليه .. وايه اللي كان كاتم بقك المدة دي كلها ؟ ايه الغباء ده .. ؟ بقى بدل ما نفرح اننا بقينا نقدر نقول ونتكلم ، حنقعد نرمّي على بعض بكلام " النساوين " ده؟.

عموما واضح ان شباب الاخوان واخدين حقنة في العضل من أهم نتائجها انها تخليك تشتم وتقل أدبك ع الكبير والصغير .. ومادام هما غاويين حقن .. فنصيحتي ليهم ياخدوا حقنة " شيح " .. يعني حقنة شرجية .. " زمان كانوا بيقولوا عليها حقنة شيح " .. والحقنة دي بتنضف اللي في المعدة من وساخات وقاذورات .

وفي حالتهم ، لابد من قوة الدفع بتعليق " قربة المحلول " في أعلى مكان عشان قوة الدفع تزيد .. وتوصل للمخ من تحت .. فتنضفه هو كمان من القرف اللي فيه .. ياتكم الهم منك له .. له .. له .. خلتوني اقفل المقال بكلام مقرف .. بس بيني وبينكم لايق عليكم خصوصا حقنة الشيح دي .. بس على فكرة محدش ياخدها عمال على بطال " مش تسلية هى " .. لازم تكون معدتك قالبة ودماغك وسخة عايزه تنضف.

اديني خلصت .. ومستني .. البهوات اللي بدقون حيعملوا ايه؟
.