من كل بستان.. «الدواير»

بِنْلِفّ فْ دواير
والدنيا تِلفّ بينا
ودايمًا ننتهِى
لمَطْرَح ما ابْتَدينا
طيور الفَجْر تايهة
فى عتمة المدينة
بتْدُور!!
■ ■ ■
ما بنكتْبش الرسايل
ما بننتظرش رد
لا حد ف يوم سمعنا
ولا بنسمع حد
طيور الحلم تايهة
فى عتمة المدينة
بِتْدوُر!!
■ ■ ■
عايشين فى عالم يعشق الخطر
فيه الطيور بتهرب م الشَّجَر
وتهرب النجوم من القمر
وتهرب الوجوه من الصُّور
بنلفّ فى دواير
ندوَّر عَ الأمان
ونلاقينا رجعنا
تانى لنفس المكان
بِنْدُور!!
■ ■ ■
ولا حاضر ولا ماضى
تروس بِتْلفّ عَ الفاضى
ولا فينا شباب زعلان
ولا فينا شباب راضى
مافيش غير إننا..
بِنْدُور
ندُور
ندُور!!