محمد ناقد يكتب: حد فاهم حاجة ؟

بذمتكم حد فاهم حاجة .....والله ما حد فاهم حاجة .
مقولة رنت في آذني أثناء عبوري أحدي طرق شوارع القاهرة أطلقها ذي ما نقول عابر سبيل ليه قالها أمامي مش عارف ، هل هي مقصودة بردة مش عارف ، طيب هو عايز آيه منها ،وآيه هو اللي عايز يفهمه ، برده مش عاف ،ولما حاولت أستوقفه وأسأله ،رد عليا رد المصريين المعتاد يا عم " سيبها علي الله " .
سيبها علي الله ،هي ديه كانت بداية ونهاية انشغالي بمقولة "حد فاهم حاجة" ، وهل لازم نفهم كل حاجة ، وهل لازم نفهم كل حاجة في حينها ، ونصر ونلح علي فهمها، وهل في حاجات ما ينفعش أي حد يفهمها ،هنا تذكرت قول الله عز وجل بكتابه الحكيم " ياأيها الذين آمنوا لا تسألوا عن أشياء إن تبد لكم تسؤكم " صدق الله العظيم .
وبدأت أفكر لما وزارة الإسكان تطرح أراضي مميزة في أحدي بقاع أرض مصر بسعر المتر يصل 4800 جنية كاملة المرافق اللي هي من ضرائبنا واموالنا ، وتطرح عدد 4022 قطعة فى 14 مدينة جديدة، وصل عدد المتقدمين لها إلى 18 ألفا و850 حاجز بإجمالى مقدمات حجز 3 مليارات و898 مليونا و900 ألف جنيه ،جاءت مدينة القاهرة الجديدة على رأس المدن التى تم حجز الأراضى بها، حيث وصلت أعداد المتقدمين إلى 11 ألفا و348 حاجزا، على عدد 622 قطعة ، بمقدمات حجز 2 مليار و837 مليون جنيه، ولما تطرح شقق لمتوسطي الدخل يصل ثمنها إجمالي 850 ألف جنيه ما يقرب من مليون يعني صاحبها مليونير يبقي الدولة تعترف ضمنيا أن متوسطي الدخل عندها مليونير وطبعا كالمعتاد تحصيل مقدمات بالمليارات ووضعهم بالبنوك بالشهور لحين تشكيل لجنه لإجراء القرعة وتشكيل لجنه عليا للمراقبة علي اللجنة التي تقوم بإجراء القرعة "حد فاهم حاجة".
لما يتأجل مؤتمر أصدقاء مصر ويلح ويصر الشعب علي إنه يفهم حاجة وطلعت الحكومة وقالت إن التأجيل لن أعياد الكريسماس في الصين في شهر مارس والحمد الله إن ما كنش التأجيل عشان يعاصر احتفالات مصر بعيد الأم ، حد فاهم حاجة .
لما في يوم وليله يتم اختيار الدكتورة فايزة ابو النجا مستشارا للرئيس الجمهورية للأمن القومي واللواء أحمد جمال الدين مستشار للرئيس لمكافحة الإرهاب ، حد فاهم حاجة وهو لازم نفهم كل حاجة ، ولما مجموعة إرهابية تقتحم الحدود البحرية والإقليمية لنا وتتعامل معهم قواتنا المسلحة ويتم القبض علي البعض منهم ويجري التحقيق معهم ، لازم نفهم كل حاجة طيب حد فاهم حاجة.
لما يصدر قرار بقانون من رئيس الجمهورية يجيز له تسليم المتهمين الأجانب في جرائم وقعت علي أرض مصرية لبلادهم لمحاكمتهم بها وقضاء مده العقوبة بها ، طبقا لمتطلبات الامن القومي ، دوافع هذا القانون وتوقيت اتخاذه حد فاهم حاجة .
عذرا سيدي الرئيس نحن نحبك من قبل اختيارك لمنصب رئيس الجمهورية ،ونثق في قدراتك في إدارة شئون البلاد ، بس لينا عندك طلب ياريت تقولنا آيه اللي لازم نعرفه وأمتي ،وآيه اللي مش لازم نعرفه وأمتي نعرفه ، عشان محدش يطلع يفهمنا حاجة غير اللي سيادتكم عايز يفهمها لينا وفي الأخر ماحدش من اللي بيتكلم في كل حاجة فاهم حاجة مش بقولكم بذمتكم حد فاهم حاجة .