هيثم عرابي يوجه رساله قوية بعد وداع الأهلي

توجه هيثم عرابي، مدير إدارة التسويق والتعاقدات السابق بالنادي الأهلى، إلى خوض فترة معايشة ببعض الأندية الأوروبية في الإدارة الرياضية.


وكتب عرابي عبر حسابه الرسمي فيسبوك: "أنا سافرت من مصر أمس إلي أوروبا، عشان أخوض فترة معاشية مع بعض الأندية الأوروبية في الإدارة الرياضية، وكمان هيكون في تعاون رياضي بيني وبين بعض الأندية دي.. أنا جيت مصر وعشت تجربة اتعلمت منها كتير، واشتغلت في النادي الأهلي اللي كان بيمثل بالنسبة ليا حلم، وربنا أعلم وأنا في النادي اشتغلت بضمير وإخلاص واجتهدت في كل لحظة، علشان أكون قد مسؤولية اسم النادي الأهلي وجمهوره الرائع. وأكيد التجربة لها وعليها".

وأضاف عرابي: "بالتأكيد اصطدمت وسط كل دا بواقع الشغل في مصر، ومع ذلك أنا ماشي وراض تماما عن التجربة، لأن حتي في سلبيتها علمتني كتير وفادتني علي مستوي الشغل والمستوي الإنساني".

وتابع: "في مجموعة كانت حواليا وأنا في مصر وهما عارفين نفسهم كويس، بشكرهم جدا لأنهم هونوا حاجات كتير عليا، لأن مع طبيعة الشغل والجو الموجود في البلد مهم إنك تختار الناس الصح والدائرة اللي تكون حواليك وبجد حتوحشوني".

وقال عرابي: "للأسف النصيحة اللي أقدر أقولها بعد التجربة دي، أو تقدر تقول الدرس الأكبر، النجاح في مصر له حسابات أخرى مش من أولوياتها الكفاءة المهنية".


اما بالنسبة للأهلي فقال عرابي: "مفيش كلمة ممكن أكتبها تعبر عن اللي جوايا تجاه النادي، أو تشرح هو بالنسبة ليا إيه.. بالتأكيد عمر الأهلي ليا مكان محطة في حياتي وانتهت، الأهلي بالنسبة لي بيتي اللي أتمنى رجوعه في يوم من الأيام وأحرص دايما على نجاحه وأنه يكون في أحسن حال وصورة وبالتوفيق دايما للنادي ولكل شخص بينتمي أو بيشتغل للنادي أو بيساعد في رفع اسم النادي".

واختتم مدير التسويق السابق حديثه بالقول: "تمنياتي للجميع بخير ، حتي الناس اللي اختلفت معاهم .. بالتوفيق دايما لكم .. أشوفكم علي خير".