أصغر وأول دي جي بنت في مصر ل«التحرير»: نفسي ألف العالم بالموسيقى بتاعتي

بسنت رفعت: قدرت أثبت نفسي في مجال كل اللي بيتشغلوا فيه ولاد وصعب لأي بنت في مجتمعنا الشرقي
ابتديت وأنا عندي 15 سنة.. وواجهت صعوبات عشان سني الصغير بس حبي للموسيقى خلاني استمر
"بسنت رفعت" كان حلمها تدخل مجال الموسيقى وتبقى دي جي وفعلا قدرت تكون "أصغر وأول دي جي بنت في مصر"! بسنت قالت في حوارها مع "التحرير" إنها حصلت على الثانوية من بودابست، وبعدها رجعت مصر وانضمت للجامعة الألمانية ودرست تكنولوجيا إعلام لمدة عامين، وهناك كانت بدايتها في مجال الموسيقى وتحديدا عام 2003. ده بالإضافة إلى أنها اتخرجت من كلية الألسن جامعة عين شمس، قسم اللغة الإنجليزية في 2009، وحصلت على ماجيستير في اللغة الإنجليزية والمجرية.
بسنت أضافت أن أخوها طارق كان سبب حبها في الدي جي لأن هو من صغره في مجال الدي جي والتلحين والغناء. ولفتت: "عرفني على كل ما يتعلق بعالم الدي جي. أول حفلة عملتها كانت في الجامعة الألمانية، وكنت سعيدة جدا بالتجربة دي وحسيت أن هي دي الحاجة اللي أنا نفسي فيها. وطبعا عشان أطور من نفسي كنت بقعد لساعات كتير عشان أتمرن على أجهزة الدي جي عشان أوصل للمستوى اللي أنا عايزاه.
قررت أني أسجل أول ميكس ليت وبعته لراديو نايل اف أم وكانت دي الخطوة الأولى في مشواري الفني. أول مكان اشتغلت فيه كان فندق ماريوت مع فريق غنائي معروف، وساعتها عملت لنفسي اسم كأصغر وأول دي جي بنت في مصر. وطبعا الفضل في ده يرجع لماما وبابا كانوا دايما بيشجعوني على أني اعمل الحاجة اللي بحبها وإخواتي أحمد وطارق كانوا بيشجعوني في كل ما يتعلق بشغلي".
وتابعت بسنت: "أول حفلة ليا من الحفلات مش ممكن هانساها، الخطوة الأولى في عالم الدي جي، كانت تجربة ممتعة جدا ورد فعل الناس كان رائع ومشجع. الحمد لله ما تعرضتش لأي مضايقات في أي حفلة من حفلاتي على مدار السنين اللي فاتت دايما الناس بتشجعني وبتحفزتي على الاستمرار وبيعبرولي عن إعجابهم بيا لأني قدرت أثبت نفسي في مجال كل اللي بيتشغلوا فيه ولاد وده عن طريق عملي الجاد ودخولي مجال صعب على بنت في مجتمعنا الشرقي، وكمان كنت بحرص على تقاليدنا وعاداتنا.
أنا ابتديت عندي 15 سنة وأكيد الموضوع كان فيه صعوبات عشان سني الصغير بس حبي للموسيقى والدي جي خلاني استمر وأحط هدفي قدامي وأحققه رغم أي صعوبات".
واختتمت بسنت حوارها مع "التحرير" ب"أنا سعيدة باللي وصلتله وحققته ودائما بسعى لمزيد من النجاحات في مجال الموسيقية، عملت حفلات في القاهرة والاسكندرية وشرم الشيخ والغردقة، وتم اختياري في 2008 لتمثيل حملة صانسيلك كأصغر دي جي بنت في مصر.
بعد كدة عملت حفلات في أوروبا والخليج واشتغلت في إف أم كدي جي ودخلت مجال الانتاج الموسيقي في نايل إف أم وكمان دخلت مجال هندسة الصوت وعملت حفلات رياضية كتير منها الدوري المصري لألعاب القوة وفي أول السنة دي السنة دي سجلت أول أغنية من تلحيني وأدائي ودلوقتي بشتغل على ميني البوم.
بعد حفلاتي في مصر وأوروبا وآسيا والخليج وبعد نجاحي في مجال التلحين والموسيقى الالكترونية وهندسة الصوت أسعى أن اتعمق في مجال التلحين الموسيقى الالكترونية واشتغل مع فنانين مصريين واني الف العالم بالموسيقى بتاعتي وامثل مصر في العالم باحسن صورة واتمنى يكون لي برنامج في التليفزيون والراديو لاعرف الناس على بعد الآخر لعالم الدي جي والموسيقى الإلكترونية والتلحين في الموسيقى هي حياتي".