إبني بيعايرني علشان شريفة

صباح الخير .. أنا أرملة ومتعلمة تعليم عالي، رزقني الله بأربعة أبناء 3 بنات وولد، وللأسف لما توفى جوزي كان سايب مبلغ بسيط جدا كان مستلفه من أخوه فمن الطبيعي اني لازم ساعتها ابدأ افكر في اني اشتغل علشان أسدد الدين ده , المهم فضلت مدة طويلة أدور على شغل لكن للأسف اتسدت كل الطرق علشان دي أول مرة اشتغل ومفيش خبرة ده غير إن سني كان معظم الشركات بترفضه.

انا عندي 51 سنة صحيح سني مش صغير لكن صحتي كويسة والحمد لله , مش هطول عليكي يا أستاذة .. أنا اختصرت الطريق وقعدت مع شوية من صديقاتي واقترحوا علية أعمل أكلات جاهزة في مطبخي الخاص وهمه هيساعدوني في التسويق وبالفعل عملت كدة وهمة كتر خيرهم جابولي زباين ستات بيوت لكن مستواهم الإجتماعي مرتفع جدا وبشوية اجتهاد الحمد لله الفكرة نجحت وبكسب كويس ومع الوقت ابتديت اتعاقد مع كذا سوبر ماركت كبير لتسويق حاجتي ومنها اتعرفت على ناس عجبهم انتاجي فطلبوا مني اشتغل معاهم بإنتظام في الحفلات الخاصة اللي همة بيعملوها ودي شغلتهم أصلا , بيني وبين نفسي قلت الف حمد وشكر يارب هسدد دين جوزي واقدر كمان اربيهم كويس واعلمهم كويس , لكن للأسف طلعلي ابني في البخت معترض على شغلتي الجديدة اللي البيه بيخرج ويلبس من خيرها.

ابني حاسس بالعار من أمه ؟!!!
أمال لو لا قدر الله كنت بشتغل حاجة فيها شبهة حرام كان ايه الوضع ؟ ابني محسسني إني بعمل مصيبة وبيقوللي شغلتك دي اكنك طباخة على نضيف .. رديت عليه وقلت : طيب هوة اللي بيشتغل طباخ ده راجل بطال يعني ولا ايه .. هوة الشغل الحلال والنافع بقى عار من وجهة نظر الجيل ده ؟ بصراحة انا خاب املي في ابني وحسسني ان ربايتي له راحت على الفاضي بكلمة منه حسر قلبي عليه وعلى نفسي مع ان اخواته اتخانقو معاه ووبخوه جامد وبالعكس بناتي بيساعدوني بالرغم من انهم لسة طالبات ومحتاجين لأي وقت عشان يذاكره الا انهم حاسين بية .. للأسف انا قلت بعد وفاة جوزي ابني هوة اللي هيبقى ضهري وهيحميني انا واخواته لقيت اخواته همة اللي في ضهري مش هوة .. ياريت لو حد يقرأ رسالتي ويقوللي نصيحة لوجه الله انا حزينة على ابني انه بيفكر بالأسلوب ده وان الحال انحدر بيه للمستوى ده .. انا آسفة للإطالة بس بجد قلبي واجعني وكنت محتاجة لمشورة .
حنان

فضفضة
محررة الصفحة نيفين حجازي
سيدتي الفاضلة .. ما فعلتيه بعد وفاة زوجك تكرمين عليه وبارك الله لك فيه وفي بناتك الفاضلات .. بينما ابنك فهو يحتاج لإعادة تربية بما يتناسب مع سنه , بمعنى انك ستدخلين معه في حوار به نوع من القسوة والضغط على منطقة تمس رجولته وكرامته ليفهم الفارق بين دوره كرجل ودور أخواته الإناث وأن العار ما هو عليه وليس ما انت عليه الآن , العار بعينه أن يوبخ أمه ثم يأخذ مصروف يده ليتسكع على المقاهي مع أصدقائه .. العار أن يفقد الشعور بالرحمة والتقدير تجاه أمه , قولي لإبنك : انت معترض على مهنتي الشريفة إذن أين دورك ؟ .. وعلميه ان لا تتعدى أحلامه إمكانياته كي يتفادى الفشل فيما بعد , أعانك الله على مصيبتك .