جميلة وحاسة إني كتير على أي حد يتقدم لي

أنا عندي مشكلة كبيرة أوي، أنا هابدأ كلامي بسرعة عشان ماطوّلش عليكم.. طول عمري بيقولوا عليّ أمورة وحلوة وعقلي كبير يفوق سني، ويمكن الكلام ده من كتر ما أنا باسمعه بقى عندي شوية غرور حتى ولو بيني وبين نفسي.. أنا باحس إني مستكترة نفسي على أي حد؛ يعني مافيش حد مالي عيني، واللي حواليا كمان حاسين.

اتخطبت مرتين وسيبتهم؛ عشان نفس السبب إني حاسة إني كتير عليهم، بس مع الأسف أنا مع إني عارفة مشكلتي إلا إني مش عارفة أحلها، ولا عارفة أقلل من نفسي أدام نفسي؛ عشان أرضى بأي حاجة وخلاص، ولا عارفة إني أفضل في الوضع اللي أنا فيه؛ لأنه مسبب لي مشكلات كتير لأن كل اللي حواليا بيقولوا لي إنك مش عايشة عيشة أهلك، يعني عشان بالبس كويس وباعرف ناس كويسة وباقعد في أماكن كويسة؛ دا طبعا لأني باشتغل وأكيد ليّ علاقاتي، وعندي خلل كبير جدا ما بين علاقاتي الخارجية وعلاقاتي بين عائلتي؛ هما شايفين طول نظري وطموحي حاجة وحشة، وأصحابي والناس اللي يعرفوني شايفين دي حاجة كويسة.

مش عارفة مين الصح ومين الغلط؟ وعلى فكرة أنا عندي مشكلات تانية، بس أحب أسمع الرد على المشكلة دي الأول.. شكرا.

dooda

صديقتي أهلا بكِ.. وأتمنّى إنك دايما تبعتي لموقع "بص وطل" كل اللي إنتِ عايزاه.

الثقة في النفس من المميزات الجيّدة جدا، وأيضا من الرائع أن يعرف كل إنسان مقدار نفسه ويشعر بقيمته في الحياة.

والثقة في النفس من المميزات في أي شخصية، لكن لو وصلت لغرور بتكون مشكلة؛ لأنها بتأثر على علاقة الفرد بالأشخاص اللي بيتعامل معاهم وبتبعد الناس عنك.

ومش معنى كلامي إنك تقللي من قيمة نفسك أو تقبلي بشخص أقل منك على الأقل فكريا، ولكن خير الأمور الوسط، ولازم تدّي نفسك فرصة للتفكير في أي حد يتقدّم لك، وتعرفيه أكتر عشان موقفك ده مش صح، وإنتي كمان ماقلتيش إيه أسباب انفصالك، وهل أسباب انفصالك عن خطيبك الأول هي نفس أسباب انفصالك عن خطيبك التاني؟!

لازم تتعوّدي تتعاملي مع كل الأشخاص، صديقتي يجب أن تعرفي كيفية التعامل مع الآخرين، وأن كل شخص يوجد لديه مميزات وعيوب، وبالرغم من كل المميزات اللي إنتي بتقوليها، أكيد فيكي عيوب لكن مافيش شخص يقدر يحدد إيه عيوبه.

ويا ريت تفكّري مع نفسك، وتكتبي كمان بالقلم والورقة ما هي أسباب انفصالك في كل خطوبة؛ عشان تحاولي تحددي إيه الأسباب وتعالجي مشكلة الغرور.

وكمان تفكّري إيه مشكلتك مع أصدقائك، وليه بتحسّي مع بعض الأشخاص إنك أفضل منهم؟ وهل إنتي فعلا أفضل منهم؟ ولا ده رأيك إنتي؟

صديقتي.. إذا كنتي حاسة إنك حلوة وعقلك كبير اعرفي إنه فيه بنات كتير عقلهم كبير وحلوين، ويا ريت تفكّري كويس مع نفسك إنك تتعلّمي إزاي تتعاملي مع الناس، حتى لو حاسة إنك بتتعاملي مع حد أقل منك.

وفي نفس الوقت أنا مش باطلب منك إنك تقللي من نفسك أو من قدراتك، ولكن يجب أن تعلمي إن هناك اختلافات بين البشر جميعا.

صديقتي.. فكّري جيدا أنك تريدين التغيير، وأيضا تريدين الأشخاص من حولك بجميع مستوياتهم وتفكيرهم. وطموحك ده مش غلط؛ بالعكس أنا أشجعك بالتمسك به، وأتمنّى مِن الله أن يُوفّقكِ.

لو عايز تفضفض لنا دوس هنا