ربنا ما خلقناش نتألّم.. عادي بنغلط وبنتعلّم

أحب أن أقدّم كل الشكر لكل القائمين على الموقع لما يُقدّمونه من مساعدات لنا.
مشكلتي هي إني كنت مرتبطة بإنسان كان بالنسبة ليّ كل حياتي؛ لكن هو باعني وسابني، وتعبت أوي من غيره، وفي الوقت اللي كنت تعبانة فيه نفسياً دخل في حياتي شخص ما يعرفش عني حاجة، وحبني أوي وإداني اهتمام كنت محتاجة له، وإداني مشاعر جميلة لحد ما اتعلّقت بيه، وكان بالنسبة لي حد مهم أوي، اتعودت على وجوده أوي في حياتي، وإني متأكدة وواثقة في مشاعره تجاهي، أنا فعلاً بحبه بجنون وحب صادق.
وغيّرني وحببني في نفسي وإداني ثقة فيها؛ لحد ما قلت له إني بحبه؛ لكن جوايا حاسة إني مش بحبه حب؛ لكن حب تعوّد.
يعني لو بس حسيت إنه مش بيكلّمني بابقى هاتجنن؛ ده غير إني بقيت أغير عليه أوي، وغير إني باستنى اللحظة اللي هيكلّمني فيها؛ بس مش عارفة المشاكل بيننا كتيرة أوي مش عارفة ليه، بدأت أحس بملل وخنقة من الدنيا، والمشكلة إن المشاكل دي صغيرة يعني يتصل وأنا ما ردتش أنا خرجت واتأخرت وكده.
المهم إنه جه اتقدّم ليّ، وكنت فاكرة بكده إن المشاكل هتهدى؛ بالعكس كترت أوي لدرجة مش قادره أتحمّلها خالص؛ لأنها تافهة أوي من وجهة نظري؛ لكن هو عقله كبير وبيدقق على كل حاجة أوي، وأنا ما باقيتش قادرة أتحمّل وفي نفس الوقت عارفة ومقدّرة إنه بيحبني، وإني خلاص ما باقيتش أقدر على بُعده؛ يعني مش هتحمّل لو انفصلنا.
إحنا مخطوبين آه؛ بس مش مرتاحين لا أنا ولا هو، هو شايف إني غلطاتي بتزيد مع إنها صغيّرة، هو كمان عصبي جداً، وما بيعديش حاجة؛ لأنه تعب من كتر ما حاول يغيّرني، عايزة أعرف أعمل إيه؟ أستمر ويمكن الحياه تتغيّر بعد الزواج ولا أسيبه مش عارفة؟!!
أرجوكم ساعدوني بحلّ سليم؛ مع العلم إني لو سيبته هاتعب أوي، وكمان هو هيتعب أوي؛ لأنه فعلاً حبني بجد وبصدق وبإخلاص.
dody

صديقتي العزيزة.. أشكرك على هذه الكلمات الرقيقة، كما أتمنى أن تجدي في كلامي حلاً لهذه المشكلة إن شاء الله.
أولاً اسمحي لي قبل أن أتطرّق للكلام عن خطيبك أن أترك لنفسي المجال لكي أرجع بك قليلاً للخلف، للحظة التي أحببت فيها شخصاً بجد وبصدق، وكل اللي عمله إنه باعك وسابك، سابك للأسف بعد كل الحب ده، سابك محطّمة ومكسورة ودي أول غلطة عملتيها.. تعرفي ليه؟ لأن كان عندك مشاعر جميلة سمحتي لواحد ما يستاهلهاش إنه يكسّرها جوّاكِ، وبعد لما ملأ عليكِ حياتك سابك في وحدة وفراغ، ولو كان أي حد جه اتعرّف عليك وقال لك إنه بيحبك كنتِ حبيتيه.
وده تفسيره عندي إنك وقتها كان عندك فراغ عاطفي، وكنتِ محتاجة لحد يملأ لك الفراغ ده، أنا عارفة إنه مش عيب تعملي كده؛ بس كان هيبقى أفضل لو انتظرتِ فترة بين العلاقة السابقة والحالية، وأعطيتِ لنفسك وقتاً من أجل التفكير في هدوء على اللي إنتِ عاوزاه؛ ولكن اللي حصل إنك لقيتِ حد مهتم بكِ، وبيقول لكِ إنه بيحبك وعوّضك عن المشاعر اللي كنتِ مفتقداها، ومين ما يحبش يدخل علاقة فيها كل الحب ده.
طب وابتديتِ تتعرّفي عليه ولقيت نفسك منجذبة له؛ بس يعني إيه غيّرك وإداكِ ثقة بنفسك؟ ممكن أفهم إنه إداكِ ثقة في نفسك يعني بحبه لك رجّع لك الأمل، وإن الدنيا لسه بخير، وإنه فيه ناس لسه قادرة تحب وتتحب كل ده كويس؛ بس غيّرك ليه؟ كان فيكِ إيه عاوز يتغيّر؟ سألتِ نفسك التغيير ده في مصلحة مين أو إنه أحسن منك أو زود حياتك مشاكل؟!!
تعرفي.. ساعات لما بنتغيّر كل حاجة حوالينا بتتغير، وساعات ما بنرجعش زي الأول عشان إحنا بقينا أحسن؛ بس لو ده فعلاً اللي حصل يبقى دي نقطة كويسة لخطيبك من ناحيته ليك.
لكن رجعتِ وقلتِ إنك مش بتحبيه؛ ولكن بتحبي إنه يكلّمك ويهتم بيك؛ ولكن سألتِ نفسك لو حد تاني عمل كده؛ يعني اهتم وسأل، وعرف أخبارك وحسيتِ إنك مرتاحة له، هيبقى نفس الشعور لأنه لو كده هيبقى إحنا بندور في دايرة ما لهاش نهاية.
كل اللي بنعمله إننا بنملأ فراغ، وما بنحلش المشكلة أو كأننا بناخد دواء مسكن وما بنعالجش المشكلة.
صديقتي... دعيني أسترجع بعض النقاط التي ذكرتِها؛ وهي:
- بدأتِ تحسين بملل وخنقة من الدنيا؛ بسبب المشاكل الكتيرة، المشاكل دي من وجهة نظرك إنتِ؛ بس صغيرة.. طب حاولتي تعرفي هي عنده كبيرة ليه؟ مش يمكن لما ما بترديش على التليفون هو بيقلق عليكِ، والمفروض إنك لما تشوفي إنه اتصل تهتمي وتتصلي تقولي له، السبب ده هيحسسه إنك مهتمة وبتقدّري اهتمامه في نفس الوقت، وقيسي عليها الخروج والرجوع متأخرة؛ من الواضح إنه مش متضايق إنك خرجتِ؛ ولكن إنك اتأخرتِ، مش هيجرى حاجة لو قلتِ له إنك اتأخرتِ؛ وخاصة إنك شايفة إن عقله كبير يعني بيفهم وبيقدّر.
- اعتقادك إن الخطوبة هتقلل من المشاكل اسمحي لي أقول لك إن المبادئ ما بتتجزأش؛ يعني قبل أو بعد مش هتفرق كتير طالما إن وجهة النظر مختلفة من الأول.
- هو شايف إن غلطاتك بتزيد وإنه تعب، ومش عارف يغيّرك، هارجع تاني وأقول لك هو عاوز يغيّرك ليه، وهل إنتِ فعلاً محتاجة تتغيّر فيك حاجة؛ لأن لو ده صح لازم تتكلّمي معاه وتعرّفيه إن لما يتعصّب، ده مش هيغيّر من الوضع حاجة، ده هيزوّدها، ولو هو مهتم فعلاً هيساعدك إنك تتغيّري بالطريقة المناسبة لكِ اللي تريحك إنتِ؛ لأن إنتِ لما هتتغيّري ده هينفعك إنتِ الأول قبل أي حد، وهينفعه لما يتعامل معاكِ.
صديقتي.. اعذريني حقاً،لم أقرأ كلمة واحدة تقول إنك تحبيه؛ ولكن أسمع منك أنه مهتم وبيحبك، ومش هيقدر يبعد عنكِ، وإنك هتتعبي لو سيبتيه، طب ده معناه إيه؟
إنك عاوزاه وتتجوزيه وخلاص، وأهو ظل رجل ولا ظل حيطة، مين قال إن الجواز هيحلّ حاجة؛ طالما الخطوبة ما عملتش ده يبقى الجواز هيعملها؟! اسمعي لو قلبك بيقول لك كده أو ده كلام الناس؛ فلا أنصحك أن تتتبعي أياً منهما.
كل اللي أنا طالباه منكِ إنك تقعدي مع نفسك شوية؛ فكّري في كل اللي حصل لك، واسألي نفسك إنتِ بجد عاوزاه وشايفة نفسك معاه بعد سنين مرتاحة في بيتك، ولا إنتِ خايفة لو سيبتيه إنك إنتِ اللي هتتوجعي وهتتكسري تاني وهتبقي من غير حياة عاطفية؟
لو عرفتِ إنتِ عاوزة إيه اتكلّمي معاه، وما تلغيش شخصيتك، قولي كل اللي مضايقك وحاولي تفهميه.. لو عاوزة تكمّلي معاه مع كل اللي إنتِ بجد محتاجة له، هو أكتر واحد هيفهمك لأنه بيحبك؛ ولكن مش معنى كده إنه عشان بحب أعمل اللي في نفسي، حطي حدود بسيطة في التعامل وتكون مريحة لك وله، وابتدي امشي عليها إنتِ وهو.. وجرّبي لو ده حصل يبقى المركب بينكم هتمشي للآخر.
ولكن لو شايفة إنك مش هتقدري تكمّلي معاه؛ يبقى الأحسن إنك أما تطلبي فترة لك وله؛ تفكروا فيها.. كل واحد عاوز إيه؟ أو تحاولي بهدوء إنك تنهي الموضوع، إحنا ما بنتعاملش مع ملايكة.. إحنا بشر، بنغلط وبنتعلّم، والصح إني أبقى عارفة أنا ماشية إزاي.
هتتعبي آه، لكن في الآخر هتكوني أخدتِ قرار لما ترجعي تفتكريه مش هتندمي عليه؛ لأنك هتبقي عارفة وقتها إنك أخدتِ القرار الصح.
وأتمنّى لك التوفيق وأتمنّى أن تراسلينا دوماً..
والسلام عليكم ورحمة الله وبركاته،،،،

لو عايز تفضفض لنا دوووس هنا