الأهلي نيوز : زوجة أحمد فتحي تكشف رحلتها في مواجهة كورونا

الأهلي نيوز : أكدت نورا إسماعيل، زوجة أحمد فتحي ظهير أيمن الفريق الأول لكرة القدم بالنادي الأهلي، أنها مستد للتبرع بالبلازما بعد شفائها من فيروس "كورونا" المستجد، والذي أصابها هي وبناتها.
وكتب زوجة أحمد فتحي عبر صفحتها الشخصية على موقع التواصل الاجتماعي "فيس بوك": "الحمد لله رب العالمين على نعمة الصحة بشكر كل الناس حبايبي اللي اطمنوا عليًا بأي طريقة وآسفة جدًا اني مكنتش ملاحقة على التليفون ولا الرسايل لأني كنت في ابتلاء شديد ربنا ما يكتبها على حد".
وتابعت: "القلق إنك مسؤول عن كل اللي حواليك وبيتقالك انزل شوف مستشفى وأنا بنتي كانت تعبانة جدا وماما وبابا كنت خايفة عليهم جدًا لأني كنت بشوفهم كل يوم تقريبا كان عندي إحساس مسيطر عليا إني هموت وإحساس بالذنب اني أكون عديت حد حوليا وما بين دكاترة عايزه تساعد ودكاترة مش عايزه تجازف وتشوفنا عشان خايفين وده حقهم طبعًا ومعامل تطلع نتايج كويسه ونتايج وحشه".
الأهلي نيوز : زوجة أحمد فتحي توجه نصائح
وأوضحت: "النصيحة بقى مني إن أنا كنت بعمل كل حاجة صح معاد إني ألبس mask وأنا مع قرايبي وأصحابي القريبين، وكنت بلبسه وأنا خارجة من البيت بس، لازم كل الناس تلبس mask وهي مع أي حد وفي اي مكان حتي لو في البيت وكمان غسل الادين كل شويه والأكل الصحي والشمس والنفسية تكون كويسه لان انا وجوزي كنا هنموت من الخوف رغم اننا مؤمنين بالله وقدره".
وأتمت:"لو حد شك ان عنده مايقلقشي خالص ولا يروح يعمل مسحه ولا اي حاجه يتعالج في البيت ويعزل نفسه أسبوعين مع الڤيتامينات والأدوية وان شاء الله هيبقى زي الفل ولو حس بوجع في الصدر يعمل اشاعه CT ولو حد عايز اي استفسار او مساعده يتواصل معايا من غير تردد وأنا كمان ممكن اتبرع بالبلازما بتاعتي لأي حد وربنا يخليكوا ليا انا عرفت انا غاليه عند الناس كلها، ربنا يحفظكوا جميعا بحبكوا اوي اوي".