عايزة حبيبي ينسى إني سبته واتخطبت

بجد باشكركم على الموقع الجميل ده، بس يا ريت تساعدوني يا ريت.. أنا بحب واحد جدا وهو كمان بيحبني أوي؛ بس حصل ظروف وانفصلنا عن بعض وبعدنا لفترة، ففي الفترة دي أنا اتخطبت لواحد تاني؛ بس ماطلعش كويس؛ ضحك عليّ بكلامه وماكنتش أعرفه كويس، ولا سألت حتى عنه، واللي أنا بحبه بعد خطوبتي بكام شهر هو كمان خطب، وبرضه ماطلعتش كويسة.
أنا أنهيت خطوبتي وهو كمان أنهى خطوبته، ورجعنا لبعض تاني وبقينا نكلم بعض؛ بس هو مش قادر ينسى إني سبته ورحت لحد تاني، وفاتح عمه في الموضوع إنه ييجي يتقدم لي لكن عمه رفض، وقال له اللي تستغنى مرة تستغنى تاني؛ بس أنا والله ما استغنيت عنه، وبحبه أوي أوي لدرجة إني لو ماكلمتهوش يوم بابقى هاتجنن وعمري ما نسيته، ويوم لما عرفت إنه هيخطب وأنا كنت لسه مستمرة في خطوبتي ومع خطيبي كنت باعيط بدل الدموع دم.
يا ريت تقولوا لي أعمل إيه؟!! أخليه ينسى إزاي، وأخلي عمه ينسى الموضوع إزاي؟؟ وإزاي أخلي عمه يشوفني بصورة حلوة زي ما كان يعرفني الأول؛ لأني حاسة إني نزلت من نظره. ساعدوني أعمل إيه.
Fancy.girl

لو عايز تفضفض لنا دوس هنا