صاحبي اللي مش مسطول: «الرئيس مبارك مش هوه الرئيس مبارك»

بالبلدى

كنت قاعد برضه مع صاحبي المسطول ومجموعة من المساطيل نتكلم في السياسة والمرشحين للرئاسة في مصر.
ورأي الأخوة المسطولين مهم جداً لأن حزب الحشاشين في مصر هو الحزب الحقيقي الوحيد بعد وفاة الحزب الوطني الله يرحمه «مات ومش حتقوم له قومه» وحزب الحشاشين فيه عشرات الملايين المصريين ولو جمعت الحزب الوطني قبل وفاته مع باقي أحزاب المعارضين الوهميين سيتفوق عليهم حزب الحشاشين قبل الثورة وبعد الثورة برضه، المهم كنت وصاحبي المسطول وأصحابي المسطولين قاعدين بنضرب صواريخ حشيش وفجأة كان قاعد معانا صديق صحفي مابيدخنش وما بيضربش أي حاجة مضرة بالصحة ده أكتر حاجة بيضربها «شاي بحليب» وفجأة قال لنا صاحبنا اللي مش مسطول علي فكرة هأقول لكم علي سر فقلنا له قول فقال: انتم عارفين إن الرئيس مبارك ده مش الرئيس مبارك فقلنا له معلهش احنا مسطولين ومش فاهمين يعني إيه الرئيس مبارك ده مش الرئيس مبارك فقال صاحبنا اللي ما بيحشش وما بيضربش غير الشاي أبو لبن قال صاحبنا: إن الرئيس بدلوه أو غيروه وكمان كل المحبوسين في سجن مزرعة طرة بدلوهم وغيروهم وواصل صاحبنا الفايق وسط المسطولين كلامه وتخاريفه وتهيؤاته فيقول صاحبنا موجهاً سؤال لنا: انتم ما شفتوش فيلم جيمس بوند ومسرحية الزعيم اللي عملها النجم الكبير عادل إمام وواصل صاحبنا كلامه انه يوجد في أمريكا وأوروبا جراحين تجميل ممكن يعملوا واحد شكلك عن طريق ماسك بيحطوه علي وشهم واللي حصل مع الرئيس السابق مبارك اللي مفروض أنه مش الرئيس مبارك لأن الرئيس مبارك خارج مصر دلوقتي والموجود ده البديل بتاعه وبالبلدي ممكن تقولوا إنه الشبيه والبديل للرئيس الأصلي السابق مبارك فجأة بصينا لبعضنا أنا واصحابي المسطولين وقلنا طيب احنا نبطل نضرب حشيش ونضرب شاي بحليب زي صاحبنا مادام دماغ الشاي أبوحليب خلت صاحبنا يقول كلام لا يصدقه ولا يقوله المسطولين ولا حتي المجانين.