عشر أمنيات «لمسطول» سنة 2010

بالبلدى

مع نهاية ألفين وتسعة وبداية ألفين وعشرة مالقيتش أحسن من صديقي المسطول لأسمع امنياته لسنة ألفين وعشرة وهمه بالمناسبة عشر أمنيات
الأمنية الأولي عمل مشروع قومي لإعادة الغُرز «جمع غرزة» وده المشروع الوحيد اللي هتلاقي المؤيدين فيه بالملايين وده لأن حزب الحشاشين «الضريبة» المشاركين فيه أكتر من أعضاء الحزب الوهمي «الوطني» الذي يحكم مصر بالتزوير.
الأمنية الثانية لصديقي المسطول محاكمة وزير المالية يوسف بطرس غالي اللي سرق مصر والمصريين وكمان سب لهم الدين، الأمنية الثالثة لصديقي المسطول: احترام الحشاشين وعدم القبض عليهم وعندكم دولة هولندا عبرة وموعظة في احترام الحشاشين وعدم القبض عليهم وحبسهم مع أن القانون لايعاقب شارب الخمر الذي يعاقبه الله وشارب الحشيش فسوف يسامحه الله إن شاء الله.
رابعة الامنيات للمسطول الذهاب إلي لبنان وبالتحديد في جنوب لبنان وذلك لألتقي برمز المقاومة للحشاشين في العالم العربي الزعيم نوح زعيتر زعيم الحشاشين في العالم العربي واللي مش عارف مين نوح زعيتر ده أوعده أن أكتب له الاسبوع القادم مين نوح زعيتر ده؟
خامس أمنية للمسطول أن يفوق المصريون من الغيبوبة والغفلة اللي همه فيها علشان يقدروا يختاروا رئيسهم اللي هيحكمهم في انتخابات الرئاسة في السنة اللي جاية 2011 ما احنا خلاص بقينا في سنة 2010 دلوقتي وسألت صديقي المسطول انت حتختار مين لرئاسة الجمهورية من الخمسة الاسماء اللي جايه دول:
1 الرئيس حسني مبارك 2 جمال مبارك لو ما انزلش الرئيس مبارك 3 ومحمد البرادعي 4 عمرو موسي 5 أحمد زويل.
نظر لي صديقي المسطول وقال لي أجاوبك الاسبوع القادم مع الخمس الامنيات الباقية اللي حاكتبهم في المقالة اللي جاية إن شاء الله.