سلاح الأهلي العسكري..

بص يا سيدي وما سيدي إلا ربنا .. هل عندك شك إن القاعدة دايما بتقول الدوري من نصيب الأهلي وما غير ذلك خروج عن القاعدة؟ .. لا ما تشكش لأن الطبيعي في مصر إن الدوري أهلاوي .. وإن الأهلي بطل الدوري بدليل إن الأهلي بطل الدوري 38 مرة .. وبطل كأس مصر 35 مرة منهم اتنين مناصفة مع الزمالك وكأس السوبر المصري هو الأكثر حصولا عليها بمعدل 9 بطولات.. يعني الناس مهيئة نفسيا طول الوقت إن الدوري أحمر حتى يثبت العكس.
المقولة التاريخية بين مشجعي الأهلي إن الفريق الأحمر بمن حضر .. معناها إيه العبارة دي .. المعنى الحقيقي للعبارة دي إن أي 11 لعيب بيشاركوا مع الأهلي قادرين على الفوز وتحقيق النصر على أي فريق منافس .. والدليل على الكلام ده موثق تاريخيا ..يوم 5 أغسطس سنة 1985 وعلى ستاد القاهرة الدولي كان موعد مباراة دور الثمانية لبطولة كأس مصر بين الأهلي والزمالك.. قبل الماتش التاريخي ده مجلس إدارة الأهلي قرر إيقاف الفريق الأول بالكامل مع مديرهم الفني محمود الجوهري بسبب مشكلة مش مجال سردها حاليا.. مجلس الإدارة قرر يلعب الماتش أمام الغريم التقليدي بمجموعة من لاعبي فريقي تحت 21 وتحت 19 سنة، ومعهم الحارس أحمد شوبير اللي ما شاركش في تمرد الكبار مع الجوهري.. شوية عيال بالنسبة لنجوم الزمالك .. ناشئين في مواجهة كوارشي وفاروق جعفر وهشام يكن وغيرهم .. المفاجأة إن 11 لاعب ما لعبوش قبل كده فريق أول فازوا على الزمالك 3/2 .. وما أدراك ما الزمالك وقتها .. والمفاجأة الأكبر إن شوية العيال دول فازوا في نصف النهائي على الترسانة واحد صفر وفي النهائي فازوا على الإسماعيلي واحد صفر برضه وحصدوا كأس مصر سنة 1985 بمن حضر.
ليه بقول الكلام ده .. بقوله عشان عاوز أسأل سؤال مهم.. هل يعقل أن كون الأهلي ضامن الدوري ومتفوق تاريخيا على منافسيه إن الأهلي يبطل يبرم صفقات ويدور على أفضل لاعبين في الدوري وفي أفريقيا عشان يتعاقد معاهم .. هل من المنطقي إن الأهلي يكتفي بأي 11 حضر ونستنى الأهلي يفوز بأي 11 لاعب .. الطبيعي إن الأهلي يستمر في جمع أفضل لاعبي الفرق الأخرى .. والمنطقي إن الأهلي يفرغ الأندية الأخرى من لاعبيها .. ويتعاقد مع صفوة لاعبي القارة السمراء .. ومش منطقي إني أكون متفوق وأبطل أجيب أحسن لاعبين لأن المنافس بيخسر كده كده.
خد بالك بقى من النقلة المفاجئة دي .. قبولك إن الأهلي يفضل يتعاقد مع اللاعبين الأمهر والأقوى في الدوري وعدم الاكتفاء بالموجود رغم إنه كده كده بيكسب ..ينطبق بالمللي على موقف القوات المسلحة من التسليح .. ما ينفعش عشان أنا ضمن أقوى الجيوش في الشرق الأوسط أكتفي بالسلاح اللي عنده جوة ويقولك كده كده معنديش عدو ظاهر وحقيقي محتاج كل هذا الكم من التسليح.
كلامي في هذه المنطقة حساس حبتين .. ليه ؟ .. عشان في ناس طول الوقت تطلع تحزق وتقولك هو التسليح اللي بيحصل ده لازمته إيه .. هو إحنا هنحارب .. هي إسرائيل مش موقعة معانا معاهدة سلام .. طب يا أبا جهل منك ليه .. هل معنى إني ضامن دوري أي حرب أدخلها معناه إني أبطل أتعاقد مع أقوى أسلحة الدوريات الأخرى وأبص على الفرق المنافسة عندها إيه وأتطور أكتر منها .. ما ينفعش يبقى الزمالك متعاقد مع ستانلي وأكتفي أنا بعمرو جمال .. يعني ما ينفعش إسرائيل تتسلح بطائرات أمريكية طراز "إف 35" وإنت ما تتسلحش بطائرات معادلة لها "رافال" من فرنسا..يعني ما ينفعش الزمالك يتسلح بأحمد الشناوي في حراسة المرمى وإنت تقف بأحمد عادل عبدالمنعم .. وفي المقابل الميسترال كانت ضرورة في مواجهة الأسطول البحري الإسرائيلي والتركي على اعتبار إن تركيا دولة معادية حاليا حتى لو مش هنقابلها في الدوري.
الأخوة أصحاب الفتوى والهجص الميتافيزيقي .. سيبوا الأهلي يتسلح بأفضل اللاعبين لأنك مش هتفهم أكتر من لجنة الكورة وسيب جيشك يتسلح بأفضل تسليح عالميا لأنك مش هتفهم أكتر من قادة القوات المسلحة .. وزي ما في جندي من أفضل أجناد الأرض فالجندي ده محتاج عتاد يخدمه في معاركه حتى على الأقل في حربه على الإرهاب.. والأهلي بمن حضر برضه وجيشنا بمن خدم.
فوتكوا بعافية..