غلوشيات رمضانية #13 رمضان.. يكتبها عبدالله غلوش:اللي فرحان في الأهلي أنه دخل في 6 أهداف طيب فيه فرق دخل فيها 6 في ماتش..فوق مستوي الشبهات:أنا مش فاهم مراد مكرم صابر ومستحمل نجلاء بدر كل ده ليه الحقيقة

#13رمضان
- الاهلي مش اول فريق في العالم يتغلب بره ارضه او جوه ارضه مش فاهم المناحه دي كلها ليه؟
- حضرتك بتبقي سايق وانت قاعد في تكييف ومش مركز من الصيام ، فما بالك باللي بيلعب في حر ورطوبه ونسبة اكسجين زي دي.
- اكرامي مش مسئول غير عن الجول الاول بس ، لكن اللي يضايقك انه شايل فرص اخطر من الكورة اللي دخلت فيه دي بكتير.
- في مؤلف كان عامل مسلسل قبل رمضان علي طول ومصر كلها اشادت بيه ، ومن اول يوم في رمضان الكل بيشتمه وينتقده لمجرد انه شارك في جريمة كتابة جزء جديد من مسلسل مهم.
- اللي اقصده ان مشكلتنا في مصر عموما اننا مش بنشوف غير تحت رجلنا بس ، بننسي اي حاجة كويسه لمجرد انه لاعب او مدرب مكنش موفق في ماتش.
- اللي بيتريق ان الاهلي دخل في 6 اهداف في ماتشين ، احب افكره ان في فرق كبيرة دخل فيها 6 في ماتش واحد ومسمعناش صوتهم وقتها.
- اضعف لاعيبه الاهلي النهارده كان رامي ربيعه ، وحجازي معذور لانه راجع من اصابه طويله والجول التاني من تسلل واضح.
- عتابي الوحيد علي مارتن يول انه كان لازم يغير حسام غالي مش لانه مكنش في مستواه ، ولكن لانه مش هايلعب ماتش الاسماعيلي الجاي وكنا علي الاقل محتاجين يكون بين بديله وباقي الفريق نوع من التجانس والتفاهم اكتر من كده.
- رمضان صبحي لازم يحترف لو عايزين نحافظ علي لاعب ممكن يكون ثورة قومية للبلد دي ويرفع سقف طموحات شبابها اكتر من النني وصلاح.
- الخلاصة مارتن يول كويس واللاعيبه كويسة والاهلي احسن فريق حاليا في مصر وافريقيا والعبرة بالخواتيم.
- النهارده اتأكدت من مقولة جدي الله يرحمه ، الاهلي لما بيبقي وحش كل حاجة في الدنيا بتبقي وحشه ، وبالتالي حلقات مسلسلات رمضان كلها تقريبا كانت مملة ومفيهاش اي جديد بالنسبة لي.
- فوق مستوي الشبهات .. انا مش فاهم مراد مكرم صابر ومستحمل نجلاء بدر كل ده ليه الحقيقة.
- بالمناسبة ، وصل بينا الحال لدرجة ان واحدة تتصل بالدكتور سعد الهلالي النهارده في الراديو تقوله ، هو انا ممكن امسك المصحف واقرأ القران من غير طرحة زي ما حماة نجلاء بدر عملت في مسلسل يسرا من يومين؟
- اللي بيقول علي نيللي كريم كئيبة اكيد مش متابع فردوس عبدالحميد في الاسطورة.
- جريمة شغف .. جميلة عوض تجسد شخصية مدمنة مخدرات ، للسنة التانية علي التوالي.
- اعتقد ان تجربة منير في "المغني" هاتخلي عمرو دياب يلغي من حساباته فكرة الاقتراب من دراما رمضان نهائيا.
- سبحان الله ، في نفس اليوم اللي محمد مرسي اخد فيه 40 سنة سجن ، طلع علينا مع جماعته من 4 سنين الفجر عشان يعلن فوزه بانتخابات الرئاسة.
- لو في حد يستاهل جايزة الابداع والتميز السنة دي ، تبقي مناصفة بين صاحب فكرة برنامج الصدمة ومبتكر الشخصيات الكارتونية في الفواصل الاعلانية لقناة mbc مصر.
- ونوس .. اللي حصل بين محمد شاهين ونبيل الحلفاوي في حلقة النهارده طبيعي بالنسبة لابن شايف من اول رمضان 3 عيال بيتخانقوا عشان ابوهم سايب لهم فيلا بجنينة واحدة.
- اللي بيسرقوا البوستات والافكار علي الفيس بوك وينسبوها لنفسهم ، عاملين زي الصحفيين اللي بينشروا البيانات الصحفية اللي بتتبعت علي الايميلات ويكتبوا عليها انفراد.
- السنة اللي فاتت هاني رمزي عمل اعلانات قطونيل والسنة دي قطونيل سبونسر مسلسله الاذاعي "مؤذي الزناتي" علي نجوم fm.
- محمد طارق ابن ماجد المصري في "الخانكة" ، وعمرو إمام شقيق عمرو سعد الكفيف في "يونس ولد فضة" من افضل الوجوه الجديدة في دراما هذا العام.
- الحب هو اكتر شخص تحس معاه بالامان وتحس معاه بالعجز في نفس الوقت .. عمرو يوسف "جراند اوتيل".
- لو كل واحد في الداخلية ساب شغله لمجرد انه ظلم حد او ارتكب تجاوزات ، البلد هاتخرب .. طارق لطفي "شهادة ميلاد".
- كل ما تيجي مصيبة ، اعرف ان وراها خير علي طول .. هالة صدقي " ونوس".
- ربنا يرحمك يا امي ويرحم امهاتنا جميعا ويخلي امهاتكم يارب.