فيديو.. مرتضى منصور: «الأهلي لعب وحش.. وجاب عيال تشتم بألفاظ بذيئة»

اعترف المستشار مرتضى منصور، رئيس نادي الزمالك، أن فريقه لعب بشكل سيء في مباراته، الثلاثاء الماضي، أمام الأهلي، فيما اعتبر أن الأخير أيضًا كان أداءه سيئًا، مشيرًا، على جانب آخر، إلى أن مجلس إدارة الأهلي «مكنش متحضر».
وقال «منصور»، في مداخلة هاتفية مع برنامج «مساء الأنوار»، على قناة Ten، مساء الأربعاء: «ده ماتش أنا قلت قبل الماتش دي مباراة كرة قدم فيها توفيق وعدم توفيق فيها فائز ومتعادل وخاسر، ربنا موفقش امبارح وإن شاء الله الماتش الجي هناخد الدوري، الأهلي لعب وحش والزمالك لعب وحش، يمكن من أسوء المباريات التي حصلت في تاريخ الناديين، فرصتين استغلهم اللاعب مؤمن وجاب بيهم جونين، لكن لا الأهلي جه الماتش امبارح ولا الزمالك كان موجود في ماتش امبارح، ما عدا اللاعب اللي جاب الجون وكوفي لاعب الزمالك».
وأضاف: «لكن الفريقين كان فيه عدم اتزان لسبب أنا مش عارفه لغاية دلوقتي لكن في النهاية اليوم عدى على خير، طبعًا كان فيه تخوف إن يحصل نوع من الاشتباك لأن كان فيه تمهيد قبل كدة من بعض المواقع اللي هتخرب الدنيا، احنا اتعاملنا بشكل محترم وراقي جدًا مع مجلس إدارة النادي الأهلي، مجلس إدارة النادي الأهلي، مع احترامي ليه، مكنش متحضر في حضور المحافظ طبعًا كان موجود والسيد مدير الأمن اترقى النهاردة».
وتابع: «المفروض ده ماتش كورة، إحنا قاعدين والمفروض اللي يدخل يسلم على اللي قاعد، ولو أنا كنت دخلت متأخر كنت سلمت على مجلس الإدارة كله، إحنا مش في معركة إحنا ناديين كبار، لكن هم دخلوا مسلموش على حد، بيزيدوا التأثر، يعني إحنا لما اتشتمنا في التدريب قبل الماتش في مختار التتش أقدر أنا أجيب 50 ألف يقعدوا يشتموا محمود طاهر في التدريب اللي جي، بس أنا مش هعمل كدة، لأن احنا نادي محترم ومتحضر، ومش هنحاسب نادي كبير زي النادي الأهلي عشان رئيسه للأسف الشديد حرض الجماهير إنها تشتمني وتشتم النادي بتاعي، لكن في النهاية أنا بقولك لو أنا كنت دخلت أنا اللي متأخر كنت سلمت على محمد عبدالوهاب وطاهر والمجموعة دي كلها، طاهر الشيخ».
واستطرد: «هم للأسف دخلوا فاكرين إن احنا داخلين في معركة حربية مع بعض، ألفاظ بذيئة اتقالت من عيال جيبنهم، الماتش كان فيه جماهير، ده أنا مش هتكلم فيه دلوقتي لأنه مش عايز أقول حجج إنه الجماهير السبب، لا أنا فريقي كان وحش جدًا جدًا، ودي مش حجة، لكن بقول لجماهير الزمالك دي مباراة وعدت».