طلاب جامعة سوهاج يدعون الأهالي للمشاركة في مليونية (حماية الديمقراطية) في الساعة 12 ظهر اليوم الجمعة بميدان الثقافة

دعا عدد من شباب النشطاء السياسيين في محافظة سوهاج بصعيد مصر، صباح اليوم الجمعة، أهالي المحافظة إلى المشاركة في مليونية "حماية الديمقراطية" اليوم الجمعة 18 نوفمبر، في ميدان الثقافة الساعة 12 ظهرًا، مؤكدين على مشاركتهم من أجل إحياء وتأييد وثيقة الأزهر، وسرعة تسليم السلطة سلميًا للمدنيين.


وتداول عدد من النشطاء على شبكات التواصل الاجتماعي "فيس بوك – تويتر" نموذجًا لما وزعه النشطاء في سوهاج، جاء فيه: (كلنا هننزل يوم 18 نوفمبر).. "علشان:

- حقي لما أتكلم لا أتكهرب ولا أتعذب ولا أترمي في سجن حربي.

- حقي إن قانون الطوارئ يتوقف، وإن الغلابة اللي ما لهومش ضهر تتوقف إحالتهم لمحاكمات عسكرية أسوأ من عهد مبارك.

- حقي إن ابن بلدي في جيشنا يحمي حدودنا مش يحمي صينية التحرير، ولما يضرب يضرب عدوه مش يضرب في أخوه.

- حقي أنه يبقى فيه أمن في بلادي يحمي بيوتنا ومستشفياتنا وطرقنا وينظم مرورنا، مش يعاقبنا على ثورتنا.

- حقي إني ألاقي تعليم جيد، ولما أتخرج ألاقي وظيفة جيدة.

- حقي إن يبقى الحد الأدنى للأجور 1200 جنيه بحكم محكمة يتنفذ، وإن الحد الأقصى للأجور برضه يتنفذ، مش يبقى موظفين مرتباتهم لحد دلوقتي مليون جنيه في الشهر.

- حقي إني أتكلم، بس الأهم إني أتسمع.

وعلشان نحقق كل ده، معًا لإحياء وثيقة الأزهر، وتسليم السلطة للمدنيين.


وفي نهاية المنشور قال النشطاء في محافظة سوهاج: "أنا مش براهن على الناس العادية أو أي أحزاب أو تيارات سياسية، ولكن براهن على طالب مصر المجدع". موقعين على تلك المنشورات تحت اسم "حركة طلاب جامعة سوهاج".