كلام داز عليه الوقت و الفوت

انت كلام , كلام داز عليه الوقت و الفوت
انت كلام بلا رجلين و لا يدين لا صباعتين و لا وجه و لا روح و لا خيال
اه يا هداك الكلام المرصع , راه داز عليه البحر شرب منوا , نشفوا ليه رجليه
البحر عاق , فاق
و احنا خليتينا في القصدير , نقرقبوا الناب, الزريعه و الشونكوم , بقات لينا في الفوم
كلامك داز عليه الوقت ما بقى ينفع في الميزان
و كالك |احنا راه حنا , واخا أحنا , غير أحنا , دراري نعطيهم جوج فرنك , نعمر ليهم الكفة , و جوج بيضات , طرف بارد ديال الخبز
أه يا سيدي
كلام واش من كلام , عمر الكفاف لراسك , خلي عليك هاد بنادم
راه دمعتوا طاحت
راه كلاموا ما بقى يبان , تغبر عليه الزمان
واش من كلام يا هداك مول الكلام
تبيع و تشري , تقزب الصايه , الصايه كانت واحد اليوم طويله مجرجره في الأرض , لي حط عليها رجلوا , ما حس ببرد
و لتغطى بيها , بات في الأمان , لي حتما فيها , حتامي ببلادوا و دواروا
اه يا مول الكلام المزوق ,
كوليا , شحال من زواقه فيه
كوليا , شحال من قصديرة مصديه عامره بيه
كوليا , شحال , من قزانه و صابونه , زيزواة تدبح بها الناس , حتى ما يبقى دم , يسيل
الناس في قجورا الوقيد ساكنين , الناس في هداك الدوار , بلا ما بلا عش بلا ضوا ‘ راهم من تقوبا تطلوا خايفين
اه يا بوا الكلام , كلام و سياسه , مزوقه بجبان كولبان
كلام و سياسه ملونه بعطرية العطار , و أش حال قدك ما تبيع
واش قدك ما يشريوا
كوليا يا بو الكلام , هدر و تكلم, خلي اليوم كلام رزين
موزون على الميزان بالكيلوغرام و بالدقيقه و بالحساب
راهم كلهم عرفوا كلامك, واخا تعيا ما تكول
واخا تعيا ما تعمر الكفاف
يا مول الكلام
باناصا الأسطورة