آه يا حكومة

آه والآه مره ومكتومة
قبلك كنا من المحدودة
بعدك صرنا من المعدومة
آه ياحكومة آه ياحكومة
آه ياحكومة اسم الله عليكى
ألف سلامه لننى عنيكى
انتى خلعتى وشيلتى إيديكى
وللا دخلتى ف سابع نومة
آه ياحكومة آه ياحكومة
ياللى شعارك عك وليس
عال وألسطه وكله كويس
آه يا حكومة آه يا حكومة
أما حكومة صحيح شغالة
سايبه شارعنا ف أحسن حالة
ألف مطب وطن زبالة
فوضى بايد فنان مرسومة
آه يا حكومة آه ياحكومة
مين ع الشعب المليان طيبة
دعا ربنا يرميه ف مصيبة
ويوقعه فى إيدين هليبة
تبقى نصيبه وليه مقسومة
آه يا حكومة آه يا حكومة
من نوابك شوفنا نوايب
من أفعالك قلنا عجايب
م المضروب ح تلمى ضرايب
بايخه النكته ومش مفهومة
آه يا حكومة آه يا حكومة
روحتى وبعتى الغاز بخسارة
ولمين بعتى لأسوأ جارة
ليه وازاى وبأى أمارة
تاخدى بتمنه بذور مسمومة
آه يا حكومة آه يا حكومة
على مايشرع سيدنا الشارع
العيان رميتيه فى الشارع
والغلبان فى الفقر يصارع
وانتى تباتى الليل متخومة
آه يا حكومة آه يا حكومة
وبيوت سيبتى الناس تبنيها
باعت قوتها وسكنت فيها
وأما سألنا ليه تهديها
قلتى الرخصه ماهش مختومة
آه يا حكومة آه يا حكومة
كله بيكتب ومفيش قارى
مانتى رشيده وجنسك آرى
كلنا حمير وشربنا مجارى
ومفيش مره تلبى عزومة
آه يا حكومة آه يا حكومة
وعشان وشك حلو علينا
بنسيب أزمه التانيه تجينا
ايه بتخبى الأيام لينا
كوكتيل فيرس أو جرثومة
آه يا حكومة آه يا حكومة
حظك كدا يا حكومة معانا
واحنا تملى بنرمى بلانا
ايه تعملى والمولى ادانا
عين بصاصه وايد مخرومة
آه يا حكومة آه يا حكومة
طمع المصرى هو دا عيبه
يسمع اسمك يمسك جيبه
بكره العيش بالقسط نجيبه
ونشوف ناس م العيش محرومة
آه يا حكومة آه يا حكومة
شاعر غنائى مقيم بالنمسا