..لقاء مفتوح مع الشاعر جمال بخيت

وفي"اللقاء المفتوح" الذى يستضيف فيه المقهى الثقافى أبرز مثقفى ومفكرى مصر التقى جمهور المعرض الشاعر المصري الكبير "جمال بخيت" في ليلة شعرية مميزة حرص جمهور المعرض على حضورها والمشاركة بها للاستمتاع بإلقاء شاعرهم المميز وللحصول على توقيع ديوانه الأخير "دين أبوهم".
قدمت الفنانة المصرية "فردوس عبد الحميد" اللقاء حيث أبدت سعادتها لتقديم مثل هذا الشاعرالحقيقي صاحب المسيرة الوطنية الحافلة والكلمة الصادقة في زمن فقدت الكثير من الأشياء معانيها.
وسط حضور جماهيري وتفاعل واضح بدأ جمال بخيت الأمسية بذهنٍ حاضر حيث تلا جميع القصائد دون العودة إلى أي ورق مطبوع ..
بدأ بقصيدة "تعرف تتكلم بلدي" التي لحنها عمرخيرت وغنتها لطيفة في الفيلم الشهير "سكوت هنصور" للمخرج الراحل يوسف شاهين ثم أنشد القصيدة الطويلة الشهيرة "مسحراتي العرب" التي تستعرض أهم الرموز الوطنية وقيم الوحدة الوطنية والقومية العربية ثم القصيدة الغنائية "واحد اتنين سرجي مرجي" وقصيدة "مش باقي مني" التي غناها "أحمد سعد" في فيلم خالد يوسف الشهير "دكان شحاتة" ثم قصيدة "نعي الجنيه" وقصيدة "ارجع بقى" و"شباك النبي"واختتم الأمسية بقصيدة "دين أبوهم" عنوان ديوانه الجديد الذي وقعه لجموع الحاضرين.. وهى القصيدة التى لاقت استحسان الحاضرين ويقول فى مقطعها الأول:
دين أبونا يا مسلمين
في يقيني
أعز دين
كلمة الحق المبين
كلمة النور الأمين
حكمة يكتبها الإله
فوق جبين الطيبين
دين أبونا يا محمد
إنت سره ومبتداه
إنت إحساسه ومداه
دقة عارفينها ف قلوبنا
لما نخشع للإله
لما نطلب يوم رضاه
لما نركع ..
لما نسجد ..
لما نفرح بالحياة ..
--
دين أبونا إبراهيم
رش جمر النار حنين
ع الخرايط والأماكن
اتولدنا طوافين
ذاكرين
دين أبويا لو مسيحي
رحمة لجل العالمين
نصرة لجل المظلومين
كلمة الحب اللي بايس
الصليب جوه الكنايس
ندهة الأجراس لمريم
والأمان للمجدلية
رحمة ليكو
ورحمة ليّا
المسيح شايل آلامنا
لجل يهدينا السلام
خد أيمن
خد أيسر
العبادة ماهيش كلام
عيش باسم الإنسانية
وانسي ..
نية ..
تدفعك للانتقام
--
دين أبويا
دين إلهي
أينما كان اتجاهي
حتي لو كان دين يهودي
إحنا مش ضد اليهود
موسي ف القرآن .. وليد
يحضنه نيل الخلود
بين إيديه تسعي عصاته
حية ..
وجدودنا شهود
سحرة .. آمنوا برب موسي
انقسم له بحر عاتي
والجبل عرف السجود
رجعت الحية عصايا
حضنت التوراة .. وصايا
اوعي تقتل ..
اوعي تسرق
اوعي تزني
اوعي تقبل بالخضوع
بحر خير الكون يواتي
لما تفرد له القلوع
والجحيم ياكل سنينكو
لو فقير فيكم يجوع
الوصايا هية .. هية
أرتضيها زي ما هي
في ضميري .. وفوق شفاهي
دين أبويا
دين إلهي
أينما كان اتجاهي
حتي لو كان مش إلهي
المجوسي
يترعب م النار ..
ويعبد ..
الإله اللي ف خياله ..
ليه حرامه .. وليه حلاله
تسمعه ف معبد دعاء
تلهمه .. رعشة رجاء
للبقر ناس يعبدوه
ويدينوله .. بالولاء
مش غباء
تعرفوا ف البقرة إيه بيقدسوه ؟!
العطاء
--
دين أبويا
أي دين
فيه عصاة أو مخطئين
بس ف نهاية المطاف
فيه ملايكة .. ومؤمنين
والرضا للصابرين
والهنا للصالحين
فيه ملاذ للعابدين الشاكرين
المشتاقين
رغم الضياع
لليقين ..
دين أبويا ..
أي دين
اللي أنا بأه ما اعرفوش
الوحوش .. الكروش
اللي لو طالوا رقابينا
بينهشوا مابيرحموش
دين أبوهم
اسمه إيه ؟!
اللي داسوا فوق رءوسنا بالبيادة
اللي مشيوا بالبلاد .. للبلادة
اللي فتاويهم فساد للعقل يقضي علي العبادة
اللي مسحوا من الآيات معني الشهادة
لوثوا الدم ف عروقنا
سدوا عين الشمس فوقنا
سرقوا ضوءنا
صادروا نيلنا .. ودفّعونا تمن وضوءنا
دين أبوهم اسمه إيه ؟!
اللي باعوا وطن بحاله
خُضرته .. وصُفرة رماله
نسوته .. وشهوة رجاله
بهجته .. ودمه .. وعياله
خطوته وسنين نضاله
ثورته .. ضد احتلاله
دين أبوهم اسمه إيه؟!
اللي فتحوا القلب لخيول العدو
اللي حبسوا العقل
في زنازين جنون
اللي حاصروا الكرم والتين والزيتون
دين أبوهم اسمه إيه ؟!
مين إلهه ؟!
مين رسوله ؟!
فين كتابه ؟!
فيه ملايكة ؟! ولاّ غابوا
فيه شياطين ؟! ولا تابوا
لما شافوا التابعين
شرهم زاد عن جهنم
شر .. لايمكن حسابه
دين أبوهم اسمه إيه ؟!
حتي فرعون اللي صدق
إنه من نسل الإله
واللي قال إنه الإله
كان بيبني الأهرامات
للممات قبل الحياة
كان له بعث ويوم حساب
كان له دولة ..
حضور ..
إدارة ..
كان منارة
ترشد الكون
للحضارة ..
كان له جيش فارض وجوده
كان محارب بين جنوده
واما يتجاوز حدوده
كان له رب يغرقه
وينقذ يهوده
حتي فرعون اللي صدق إنه من نسل الإله
واللي قال انه الإله ..
كان له كهنة ف العلوم
يقروا ف كتاب الكواكب
يرصدوا سير النجوم
يفتحوله سكك .. بيبان
في سراديب الزمان
ويقولوله إزاي يدوم
حنطوه .. خلدوه
بالمعاني والمباني والرسوم
كانوا كهنة مؤمنين
خلوا كلمة مصر .. دين
حاضرة ف العهد القديم
حاضرة ف العهد الجديد
حاضرة ف القرآن حضور
الآيات فيها تدور
مُفردة عز وجلال
مُعلنة .. وبين السطور
تخترع ثانية وشهور
تخترع شعر وبحور
حتي فلاحها الفصيح
شكوته بتشع نور
إيه يامصر ؟!
إيه يا أرض الطيبين
اللي حكموا ف الزمان دا
يبقوا مين ؟!
دين ابوهم
اسمه إيه ؟!
حد يعرف فيكو دين
كل اتباعه لصوص أو قوادين
ف المعاصي مولودين
ف الكراسي مأبدين
ف التفاهة .. معدودين
ف السفاهة .. مفرودين
ع البلاهة .. مسنودين
للشراهة .. مُجندين
ع القرف .. متعودين
ع الشرف .. متمردين
ع الوطن .. متنمردين
بالخيانة .. موحدين
اللي يعرف دين كده
يقوللي عليه ..
دين أبوهم
اسمه إيه ؟!؟