دين أبوهم .. اسمه إيه؟

كتب الشاعر جمال بخيت قصيدة لا أرى أصدق منها تعبيرا عما آلت إليه حالنا بعد أن أنشب الأعداء مخالبهم فى لحمنا وبعد أن وصلوا أفواههم بأنبوب يسحب الدماء من شراييننا وبعد أن صار قتل المصريين هو لعبة كل يوم، التى لا يرتاحون إلا بعد أداء مباراة منها أو أكثر قبل النوم.
فى رائعته التى أطلقها تحت عنوان «دين أبوهم اسمه إيه» قال بخيت:
دين أبونا يا مسلمين.. فى يقينى أعز دين
كلمة الحق المبين.. كلمة النور الأمين
حكمة يكتبها الإله.. فوق جبين الطيبين
دين أبونا يا محمد.. إنت سره ومبتداه
إنت إحساسه ومداه
دقة عارفينها ف قلوبنا لما نخشع للإله
لما نطلب يوم رضاه
لما نركع لما نسجد لما نفرح بالحياة
دين أبونا إبراهيم.. رش جمر النار حنين
ع الخرايط والأماكن.. اتولدنا طوافين
دين أبويا لو مسيحى.. رحمة لجل العالمين
نصرة لجل المظلومين
كلمة الحب اللى بايس الصليب جوة الكنايس
ندهة الأجراس لمريم.. والأمان للمجدلية
رحمة ليكو ورحمة ليّا
دين أبويا دين إلهى.. أينما كان اتجاهى
حتى لو كان دين يهودى.. إحنا مش ضد اليهود
موسى فى القرآن وليد.. يحضنه نيل الخلود
دين أبويا دين إلهى أينما كان اتجاهى
حتى لو كان مش إلهى
المجوسى يترعب م النار ويعبد الإله اللى ف خياله
له حرامه وله حلاله
تسمعه ف معبد دعاء.. تلهمه رعشة رجاء
للبقر ناس يعبدوه.. ويدينوا له بالولاء
مش غباء
تعرفوا ليه بيقدسوه؟.. العطاء
دين أبويا أى دين.. فيه عصاة أو خطائين
فيه ملايكة ومؤمنين
فيه ملاذ للعابدين الشاكرين
المشتاقين رغم الضياع لليقين
دين أبويا أى دين
اللى أنا بقى ما اعرفوش
الوحوش.. الكروش
اللى لو طالوا رقابنا بينهشوا ما بيرحموش
دين أبوهم اسمه إيه؟
مين إلهه؟ مين رسوله؟ فين كتابه؟
فيه ملايكة ولا غابوا.. فيه شياطين ولا تابوا؟
لما شافوا التابعين.. شرهم زاد عن جهنم
شر لا يمكن حسابه
اللى داسوا فوق رؤوسنا بالبيادة
اللى مشيوا بالبلاد للبلادة
اللى فتاويهم فساد للعقل يقضى ع العبادة
لوثوا الدم ف عروقنا.. سدوا عين الشمس فوقنا
سرقوا ضوءنا..صادروا نيلنا ودفّعونا تمن وضوءنا
اللى باعوا وطن بحاله.. خضرته وصفرة رماله
بهجته ودمه وعياله.. ثورته ضد احتلاله
دين أبوهم اسمه إيه؟
حد يعرف فيكو دين.. كل أتباعه لصوص أو قوادين
فى المعاصى مولودين.. فى الكراسى مأبدين
فى التفاهة معدودين.. ع البلاهة مسنودين
ع القرف متعودين.. ع الشرف متمردين
اللى يعرف دين كده يقول لى عليه
دين أبوهم اسمه إيه؟