كتب - فرشوطى محمد -الواد زعبولة داير فى البلد وعمال يلسن ويقول حاخلى حمار فرشوطى يعمل اضراب علشان التبن المغشوش اللى بياكله - اشمعنى هو - ولا علشان غلبان يعنى ومن غير مرشحة . قلتله اسكت ياواد يازعبولة هى البلد ناقصة - والحمار قانع وراضى وساكت بلاش تفتح عيناة على الطمع. قال زعبولة : ياعم فرشوطى كله عمال يعمل اضراب اشمعنى هو يعنى دا حتى الأطباء البشريين اشتغلوا فى الازرق. قلت : حقهم يازعبوله - حقهم .! قال: حقهم ايه ياعم فرشوطى انت تعرف ان اكتر دولة فى العالم فيها عيادات خاصة هى مصر - امشى كدا فى الشوارع وشوف العمارات فيها قد ايه عيادات.وشوف الدكتور بيسكع قد أيه فى الكشف . قلت : الحياة اصبحت نار يازعبوله. قال: نار ياحبيبي نار - دا الطمع ياعم فرشوطى الطمع - انا اعرف واحد دكتور عنده 3 عيادات وشغال مدير مستشفى ودخله فى اليوم اكتر من تسعة الاف - والمصيبة ياعم فرشوطى وجدته واقف فى إضراب الأطباء. قلت: وماله يازعبوله وماله البحر يحب الزيادة - والرزق يحب الخفيه - تصدق يازعبولة انا مرة بطنى وجعتنى ذهبت للدكتور كتبلى حبوب منع الحمل. ضحك زعبولة وقال : ايه اللى جري لنا ياعم فرشوطى - جري لنا ايه؟ قلت :المشكلة اصبحت مشكلة ضمائر يازعبولة ،نفوس - وصغارات نفوس. والمصيبة الكبري فى الاستك يازعبوله! قال :الضمائر وعرفناها - انما ايه نظرية الاستك دى ياعم فرشوطى. قلت: رزمة الفلوس بتربطها بأيه؟ قال: بالأستك قلت:ولو حشرت فيها كمان رزمة الاستك حيمانع؟ قال : لأ - حاينمط ويقول هل من مزيد! قلت : اهو احنا اصبحنا مثل هذا الاستك. قال زعبوله ضاحكا دا احنا اصبحنا على كدا رزمة اوجاع ياعم فرشوطى. قلت : كله عايز يلبس الشراب الجديد يازعبولة - ويشد الأستك ويطرقع - وكله على كله على واما تشده ويلسعك قول له . --- فرشوطى محمد صحفى وكاتب ساخر http://farshouty.blogspot.it