المقامة الأغنية !!

حكالنا حنفي بن تامر وقال :-
رحت أسأل أبو امنية , اللى غنى أغنية , زمان اسمها ( أنا ليه ) , قولتله : يعني أيه , ( الأغنية الغنية )؟ , بصلي باذبهلال , زي اللى شاف هلال , رمضان فليلة العيد !! , فجأة لقيت البعيد , هرش ف راسه وقال , : الأغنية الغنية , غنية بالكلمات , الحلوة والنغمات , الشيك والمقامات , الموسيقية العربية , .. بتعبر عن الهوية , الموسيقية الشرقية !!
دلوقتي الاغنية , لا ليها طعم ولا لون , الله يكون في عون , اللى بيسمعوها , بيندموا انهم , غصبن عنهم , بالصدفة كدة سمعوها !!
اسمع (صباح) و(عايدة , الشاعر) و(فايدة , كامل) و(شادية) و(وردة) , و(فايزة ) و(أسمهان ) , و(ليلى مراد ) كمان , و(نجاة ) و(نجاح سلام ) , و(سعاد حسني ) يا سلام , لكل واحدة لونها , وعالمها وكونها , وشخصيتها الحلوة , وإحساسها في الغنوة , الناس دول ماتوا ولسه , أغانيهم عايشة ولسه , هتعيش وتعيش كمان , وتدور ويا الزمان !!...وأى مغنا جميل , بيعيش لجيل ورا جيل , ولكل شعب دوره , في المغنا وفولكولوره , النابع منه وفنه , اللى بيعبر عنه !!
الأغنية ميراث , شعبي قيم وتراث , والشعب اللى تراثه , ضايع من ايده وراسه , شعب فحيره يا ولداه , ( من فات قديمه تاه ) !!
دلوقتي يا عزيزي , تسمع أصوات معيزي , بتغني (هاوس) و(روك) , على كام حتة (شيك شوك) , وكام لون انجليزي !! , حتى الغنا بقا (مستنسخ) , ولهذا طعمه مسخ !!
بقا الغنا تهجينات , ما بين حبة جينات , عربية وغربية , بطريقة غريبة غبية !! , منغير علم ولا أصول , والقاعدة بتقول , لنا ان : ( المهجن , من كل الناس مستهجن ) !!
بقت الغنوة التوب , بتتعمل هلي هوب , بطريقة سهلة موت , يادوب (برنامج صوت ) , ومايك حلو و(لاب توب) , ونقطة و(فولوستوب) !!
وزي ما انت عارف , كله بقا استسهال , وعبط واستهبال , ..لاعاد فيه عازف عارف , ولا محترف محترم , كله ترم ترم , كله تفاهه وسماجه , وخبط ورزع وهبد , ومحدش فاهم حد , ولا حدش حاسس حاجة !!
المطربين دلوقتي , مش الحان واصوات , لا بودي جردات , وصور وبوسترات , وبناطيل وبديهات , وتقاليع وقصات , وشخاليع ورقصات , ومفاتن وعضلات !! , تشوف دلوقتي المطرب , تحس انه مش مطرب , تحس انه مصارع , كمان شوية هيصارع , مصارع جوة حلبة , بقوا (جلبة وغلبة ) !!
دولوقتي يا فنان , قول على الفنان , يا مخلف يا معوض , الفنان بيعوض , عنده عقدة نقص , من خلال الفن , والجدل والزن , اه ربنا يشفيه !!! , بروفاته (تحت السلم ) , و(بيرقص على السلم) , لا اللى فوق يشوفوه , ولا اللى تحت ينادوه , محدش سائل فيه !! , زمان كان عندنا , ف بلدنا هنا , فنانيين محترفين , بفنهم معروفين , على مستوى العالم , معمول لهم تماثيل , ولوحات وواخدين , اوسمة ونياشين , على فنهم الأصيل, راح فين دة كله يا عالم ؟!!!
للأسف الفن, فيه اللى علا مات , وساب وراه علامات ,.. ودلوقتي الفن , بقا نحت بقا كله ساهل , بقا للأرزقي والجاهل , بقا ازمة كبيرة ومحنة , بقا كار وحرفة ومهنة , للي مالهش مهنة !!
و(أبو ليفة )لابس ..................البشكير وتمام
قال :( كله بينشف ) ............. بعد الإستحمام
قال : (انا مش صابونج ) .....قال : (قبل الحمام
فيه حاجات لازم اعملها) ...على ريحته يا سلام
كدة لا ليف حد ....................ولا زيف كلام !!!
..والمطربات دلوقتي , مش احساس وتعبير , لاءه ..نوم ع السرير , ب(كومبليزون) حرير , و(لوك) شكله غريب , و(بانيو) مليان حليب , وحمام وبشكير , ..المطربة دلوقتي , تلاقيها عاملة (كليب) , علشان تطلع تحب , واد (موديل) بيبوس فيها , ويشيلها ويجري بيها , بعدين يمسك اديها , بعدين يحسس عليها !! , المطربة دلوقتي :-
( مغنية مع كل ألاتي ..وغانية مع كل فلاتي )) !!
بقا المقياس دلوقتي , مين اكتر واحدة بتعمل , مش شغل راقي جميل , لأ..(عمليات تجميل) , واخبارهم دلوقتي , ..دي صغرت صدرها , ودي كبرت وركها , ودي نفخت شفايفها , ودي غيرت شكل بوزها , واتطلقت من جوزها !! , ودي عاملة فيها بت , ولها فضيحة ع النت , كله سامعها وشايفها !!
دلوقتي تلقى المهرة , بتجري ورا الشهرة , وتتنازل عن كل , تعاليم دينها واخلاقها , وجسمها ومبدأها , من دة إشرب وكل !! , اه فأي حاجة تفرط , علشان تكسب وتقرط , على قرشين من فنها , ودة لأنها , مالهاش راجل يشكمها , ولا كبير يحكمها , تلقى لسانها النهاردة , طوله تمانية يردة !! فجاة تلاقيها تهب , تشتم ف الناس وتسب , والاعلام بقا ينشر , كلامها دة ويفشر , ويقول انها بتحب , وتحترم –هي رخرة - , الآراء الأخرى !! ,
وعل رأي ابن عيل , في كتابه (أيل وريل ):-
مافيش (قصة ع القورة) ...... .لأ ..فيه (جيبة مفتوحة )
مهو راح زمن (الشحرورة ) ...وجه زمن (الشرشوحة )
دول مطربين دول برضه ؟ , كله بقا شبه بعضه!! , تسمع دة زي دة , ولا تعرف دة من دة !! , تسمع دي زي دي , ودي غيرانه من دي , ..المغنا عدى وفات , بقا دلوقتي خلافات , شخصية ومخالفات !! ..
وللاسف هما دول , اللى بيمثلونا , في الخارج ويعرونا , على رأي حسن الفالت , في كتابه (الانصاص قامت , والقوالب نامت ) :-
( مشكلتنا ان سفهائنا في الداخل ..هم انفسهم سفرائنا في الخارج ...وبعد تقلبات الزمن.. اعتلى البلهاء لأنفسهم فوق المنابر ...واختلى البلغاء بأنفسهم في المقابر !! )
بعدين سكت شوية , وقال (وعنيه ف عنيا ) :- , ...والا الغنوة الشعبية , بقت نزلة شعبية , بقت عدوة شبابية, بقت اغنية هابلة , بيغنوها تنابلة , ودي مش غنوة شعبية , دي غنوة لها شعبية , بين ناس هوبل هوطل , فيه فدماغاتهم عطل , فني رافض للفن , الراقي وعاوز زن , ورزع وهبد وخبط , منغير ظبط ولا ربط !! , دة المطلوب والمعروض , يا حبيب قلبي المفروض , الغنوة الشعبية , منسوبة للشعب , بتبين الشعب , ايه احواله الفكرية ؟ , اهتماماته ..أيه هي ؟ , قولتله : اه اهتماماتنا , باينة من اغنياتنا , حط ايده يا , على قلبي يا , عايز اعمل واحد شاي ,ومش عارف ازاى ؟, طلع ما بيعرفش , بيقول وما يعملش , علشان قلبه بيوجعه , وعاوز حد يدلعه , شارب سجارة بني , ودماغي بتاكلني , قال لي : وبانجو وافيون , وخمرة ولا يحزنون , هما يقولوا واحنا نسمع !! , مسخرة على كل لون , الله يكون ف عون , الناس اللى بتسمع !! ..سمعت المهرجانات؟ , ايه هي المهرجانات ؟ , عبارة عن شتيمة , معمولة على تيمة , أدي الغنا (التكنو) , دة ( تكانة ) مش (تكنو) !!
قال حنفي بن تامر : قولتله : يا حرام ع الفن , وفجأة تليفوني رن , بنغمة مهرجان , (السبع بلاطات , واللمة والحارات ) , قولت لأبو أمنية , والمصحف والقران , مش انا اللى عاملها , لموبايلي دة اللي عاملها , الواد ابن الفقرية , بتاع الموبايلات , في مركز الصيانات , قال لي : مش انت اللى عاملها؟ , حتى لو انت اللى عاملها , انت حر ..بلاش لك , إسمع ما طاب لك , وهتسأل ياروح خالتو , عن كل اللى انت سمعته , ( إن السمع والبصر والفؤاد كل اولئك كان عنه مسئولا ) ..ف ياريت بقا تختشي , وفجأة سابني ومشي , وانا مش فاهم فيه ايه , وذنبي ف زعله ايه ...والختام !!!