حديث المدينة

مفيد فوزي: تتلاطم أمواج الزمن مثل أمواج البحر تماما ولكن هناك أصداف وصدف ترتمى على الشاطىء ويظل يحدثنا بأسرار هذا البحر وليس هذا تأملا رومانسيا لكنه حقيقة فمن المهم أحيانا أن نفتش فى الزوايا والأركان عن هؤلاء الذين أسعدونا يوما ما كان محمد عبد الوهاب يقول إن أعظم ما يقدمه الفنان لشعبه أن يسعده ولعل محمد عبد الوهاب حصل يوما ما على الأسطوانة البلاتينية لأنه أسعد شعبه واحد من الذين أسعدوا هذا الشعب وأعطوه مذاقا جميلا بل غنوا معه وهذا هو أخطر شيىء أن يغنى االناس مع الفنان، هو محمد نوح وقد تساءلت أين محمد نوح ؟ كنت أقلب فى صفحات بعض المجلات وبالتحديد المجلة التى أعمل بها لفت نظرى عنوان من سفينة نوح إلى برج عبد الحليم أتذكر أن عبد الحليم حافظ صديقى الموعود بالعذاب قد غضب من المقال لأنه أحس أنه فى برج بيد أنى كنت أريد أن أقول أنه برج الفن وليس برج الحياة الخاصة وأن سفينة نوح تسير وتشق البحر وخلفها الناس غنى محمد نوح فرشق فى الوجدان غنى للناس للبسطاء كان فى رأسه وفى تكوينه وفى تفكيره سيد درويش العظيم لايمكن بأى حال من الأحوال أن ننسى محمد نوح لهذا تساءلت أين هو الأن ؟ إلا أن عثرت عليه فى حالة صمت وربما سكون فقد أردت أخترق الصمت واثقب هذا السكون فلجأت إلى بيته وأردت أيضا أن أرى أولاده وبناته اللواتى كبرنا والذى كبر أردت أن أعرف حياة هذا الفنان إلى أى مدى هو محاط هو محمد نوح فى حديث المدينة
فاصل
فقرة غنائية للفنان محمد نوح
مفيد فوزي: كابتن هاشم نوح طيار إبن الفنان الكبير محمد نوح هاشم لعب الجيتار لمدة سنتين فى فرقة محمد نوح وأظن أنه أخلص الأن بشدة للطيران التحليق والهبوط هاشم فى أمان تجربة سنتين بالجيتار ما حصلكش حنين ؟
هاشم نوح: كتير أنا علي طول بحن للجيتار وبحن للمزيكا بشكل هايل لما بصحى من النوم ممكن ألعب جيتار شويه
مفيد فوزي:يعنى مازالت ؟
هاشم نوح:أه طبعا
مفيد فوزي:أيه علاقتك بالطيران ؟
هاشم نوح: أقدرأقول لحضرتك هواية فوق ما حضرتك تتخيل هواية أجمل مما يستوعب العقل الواحد لو فضل طول عمره محترف بس هاوى من جواه بيقدر ياخد من الطيران ويديله بشكل لذيذ
مفيد فوزي:أنت عاطفى ؟
هاشم نوح:جدا
مفيد فوزي: أه يعنى أنت لو فيه أزمة عاطفية أنا أحيانا بفكر فى هذا الكلام يعنى أكيد الطيار ولي أصدقاء طيارين ألقى كده فى وضه فى شيىء من الشجن لو فرضنا أنه عنده أزمة عاطفية أقول أيه ؟ لأ ممكن يسرح
هاشم نوح: لأ أن أقول لحضرتك على حاجة أخطر من كده أحنا بتيجى علينا أوقات أول ما بنركب الطيارة بننسى أهالينا يعنى ببنسى إن أحنا لينا أهل وببنسى إن لينا عيشة تانية بره الكابينة الضيقة دى الشغلانة يعنى غالبة علينا بتحتاج مجهود ذهنى كبير جدا فمبيبقاش فى حيزا فى مخنا للتركيز بره الشغلانة دى نمرة 1/ نمرة 2/ أحنا بندرب عليها أنها تاخد 100% من تفكيرنا علشان الغلطة فيها
مفيد فوزي: طبعا خطيرة
هاشم نوح: أه طبعا زى الجراح وزى أى مهنة محتاجة تركيز
مفيد فوزي: على فكرة عايز أقول للسادة اللى بيشوفونا أتعلمت فى علم الحوار إن أنا لم أدير حوار مع طيار ووالده موسيقار إن أنا أكلمه الأول فى الشىء اللى بيحبه اللى هو الطيران علشان أفتح شهيته بعد كده أدخل أقول اللى أنا عايز أقوله لك ما أخطاء محمد نوح ؟
هاشم نوح: أخطاء ؟
مفيد فوزي: أتخضيت كده ليه ؟
هاشم نوح: لأنى أنا عمرى ما فكرت أن أبويا ليه أخطاء
مفيد فوزي: أنا أقولك أنا أبويا لى أخطاء 1/كان قاسيا نحوى وإن علمنى الصلابة 2/ لم يكن يعطينى شيئا من حنانه بل أعطيته لى الأم ولذلك عشت حياتى أبحث عن الحنية هقعد أدعهمولك وليس هذا إنتقاصا من أبويا
هاشم نوح: لالالأ خالص هو أنا بس أنا اللى عمرى ما فكرت يعنى فى أخطاء أبويا ممكن أقول إن أخطاء أبويا عدم إستثمار لنفسه أكتر مما ينبغى
مفيد فوزي: وضح كلامك
هاشم نوح: بمعنى إن الدنيا محتاجة قوة مادية ومحتاجة يعنى أستثمر نفسى أبيع نفسى وأكبر نفسى ماديا
مفيد فوزي: الناس اللى بيشوفونا واحد منهم قاعد أهوه بيقولى هو أقصده أيه ؟
هاشم نوح: بالعكس بابا حب هوايته وشغله أكتر ما حب إن هو يبنى فلوس أو عمارات أو أنه يبنى حاجة مادية يعنى حب الفكر أكتر من المادة
مفيد فوزي: أيه خطأه فى الغنى ؟
هاشم نوح: خطأه فى الغنى وقف بدرى
مفيد فوزي: أيه سبب التوقف ده
هاشم نوح: والله للأسف هو وقف وأنا كنت صغير جدا أنا معرفش هو ليه وقف فى الفترة دى غير كان ليه أحلام تانية أستديوأو حاجة زى كدة
مفيد فوزي: هل أتجه للأستديوهات ومكملش سكة الغنا ؟
هاشم نوح: تقريبا أه تقريبا هو دا اللى حصل
مفيد فوزي: هل ربح من الغناء وحطه فى الأستديوهات أنت بتعتبر دا خطأ ؟
هاشم نوح: أنا بعتبره خطأ
مفيد فوزي: سؤال أخر هل كان ممن الممكن أن يعيش محمد نوح إلى الأن بغناه ؟ يعنى دخلت أصوات غريبة علينا فى الحياة
هاشم نوح: يعنى هقول ده وطبع أنا منحاز حتى لو حاولت إنى أكون مش منحاز أنا منحاز أنا بحب مزيكا أبويا جدا لدرجة أنى أنا لما بقعد أسمعها فى العربية السيديهات القديمة بتاعة لا تنسانا والصبر طيب لحد دلوقتى بسمعها فى العربية مع أصدقائى فيها يعنى حتى الشباب اللى أصغر مننا بيحبوها
مفيد فوزي: بتسمع أبو الليف ؟
هاشم نوح: سمعته أه
مفيد فوزي: بتسمع شعبان عبد الرحيم ؟
هاشم نوح: يعنى سمعت حاجات كتيرة له برده
مفيد فوزي: أيه تقييمك للأول وأيه تقييمك للتانى ؟
هاشم نوح:أبو الليف وشعبان عبد الرحيم يعنى دول ألوان يعنى زى ألوان الطيف فيها أحمر وأزرق وأخضر دول ألوان برده
مفيد فوزي: أنت بتحب مين من الألوان دى ؟
هاشم نوح: للأسف ولا ده ولا ده
مفيد فوزي: تفتكر محمد نوح كان ممكن أيه المرحلة اللى ينطلق إليها بعد ما قدم كل ما تقدم ؟يعنى كان هيفضل برده يغنى وإن كان لما بيقول يا بلد شدى حيلك يا بلد
هاشم نوح: ما هو دا اللى أنا عايز أقوله هو دا اللى أنا قصدى عليه إن هو يعنى موجود فى العصر ده لأن على طول هنفضل فى مشاكل
مفيد فوزي: ولما يصرخ يقولك يا منى عينى ما هو دا صرخة عاطفية فى زمن داس على الرومانسية ولا أنت شايف غير كده ؟
هاشم نوح: لا أنا أنا متفق مع حضرتك تماما ما علشان كده أنا لحد النهاردة يفوت أسبوع أو 10 تيام اقوم مشغل وبترجع السيديهايه تانى فى العربه
مفيد فوزي: واحد من الناس قالى أصله أغتر شويه
هاشم نوح: لا أطلاقا بابا عمره ماكان مغرور
مفيد فوزي: عنده غرور ممكن يون ثقه فى النفس
هاشم نوح: لا لا خالص بابا حتى ثقته فى نفسه ماكنش بيوريها ودى حاجة من الحاجات يعنى برده يعنى لازم الواحد يثق فى نفسه حتى لو سنه صغيرة بابا بالعكس هو بيحب الناس كلها وبيتكلم مع الناس كلها يعنى يعمل أى حاجة فى أى وقت مفيش غرور ولا علو فى النفس ولا أى حاجة من الحاجات دى
فاصل" فقرة غنائية للفنان محمد نوح"
مفيد فوزي: مريم نوح أبنة الفنان الكبير محمد نوح مريم كان ممكن أنها تكون مطربة ناجحة ومؤثرة أولا تملك وسامة جميلة تملك صوت جميل وكان ممكن أنها تبقى من الأصوات الرقيقة الحنونة فى هذا الزمن ربما كانت تثير أحسايس الشجن الرومانسية فى زمن أبو الليف وشعبان عبد الرحيم وأسماء أخرى كنت سامعها وأنا جاى بتقول أنا بهددك أنا هشمت فيك ربنا يهدك يعنى كان ممكن يبقى فيه نجاة الصغيرة مع إحترامى طبعا للجهد أخرى وتبقى قيمة لكنها فضلت الإرتباط والزواج والبعد التام عن الفن ليه يا مريم؟
مريم نوح: هو أنا مبعدتش عن الفن هو الفن اللى بعد عنى
مفيد فوزي: إزاى؟
مريم نوح: مقاييس النجاح اختلفت
مفيد فوزي: بسمعك
مريم نوح: يعنى أنا لما أبتديت أبتدت معايا الدنيا تتغير لأن شركات الأنتاج بقى عندها مشكلة مفيش مبيعات فأصبح النجاح بيحتاج مقومات غير المقومات اللى أنا أتربيت عليها
مفيد فوزي: انتى أتربيتى على أيه ؟
مريم نوح: أنا أتربيت أنوا اللى بيغنى يعنى صوته حلو يعنى أتقان فيه اللى هو بيعمله يعنى البنى أدم يكون حقيقى بيعمل حاجة هو بيحبها أصبح مش هو دا
مفيد فوزي: أصبح ايه ؟
مريم نوح: أصبح رقص وعرى والضحك على الناس يعنى للأسف جزء كبير جدا من المطربين من اللى بيغنوا دلوقتى ما بيعرفوش يغنوا
مفيد فوزي: قوليلى يعنى أيه مابيعرفوش يغنوا؟
مريم نوح: يعنى أصواتهم وحشه ولذلك فى اللايف بتبقى مأساه وطبعا بإستخدام التكنولوجى
مفيد فوزي: فهمى للناس يعنى فى اللايف بتبقى مأساة يعنى لما بيطلع فى حفله بينشذ
مريم نوح: طبعا وعلشان كده معظمهم ما بيغنوش فى الحفلات لايف كلها بتبقى بلاى باك
مفيد فوزي: معظمها بلاى باك ؟
مريم نوح: فيه جزء كبير مش كل الناس طبعا الواحد مايقدرش يعمم بس جزء كبير
مفيد فوزي: أنتى درست مزيكا ؟
مريم نوح: أنا ما درستش مزيكا أنا درست أقتصاد
مفيد فوزي:شيىء جميل لازال صوتك النهاردة بنفس العذوبة اللى كان عليها وشوفناه وسمعناها زمان ؟
مريم نوح: والله أنا بحب الغنا جدا ومازال لحد دلوقتى دى أكتر حاجه بحبها فى حياتى ودى هواياتى لما بتجيلى أى فرصة مابتأخرش أبدا
مفيد فوزي: كان ليكى أغانى خاصة بتاعتك ؟
مريم نوح: لي أغانى خاصة
مفيد فوزي: زى أيه فكرينى
مريم نوح: مع الرباعى أنا عملت ألبوم لوحدى كمان
مفيد فوزي:أشهر غنوه ليكى كانت أيه؟
مريم نوح: كان فيه أنا قلبى معاك ودى كانت من أغاني المعروفة وكنت بغنى دايما لمطربتى المفضله فيروز
مفيد فوزي: طب خلينى اسئلك أكتر هو أنتى لما كنتى بتغنى كان ليكى أثر عند الناس ؟
مريم نوح: متهيأ لى أه
مفيد فوزي: لما الناس كان بيشفوكوا فى الشارع أو فى مكان عام كانوا بيفكروكى بالأغانى؟
مريم نوح: كانوا دايما بيقابلونى بحب وكنت بحس منهم بده
مفيد فوزي: طيب لما كنت فى حفلة من الحفلات كانو بيطالبوكى بأغانى معينة ؟
مريم نوح: كانوا بيطالبونى كنت بعيد بعض الأغانى فى الحفلات
مفيد فوزي: صوت فيروز بالنسبا لك أيه ؟
مريم نوح: أحلى حاجة فى حياتى اللى بلجأ لها لما بكون فى أى مود أسمعها بحس أنى فى عالم تانى أنا من عشاق فيروز
مفيد فوزي: قابلتيها؟
مريم نوح: لا للأسف لا أتمنى
مفيد فوزي: تمنيتى تشوفيها ؟
مريم نوح: طبعا لأن فيروز قيمة كبيرة جدا فى حياتى
مفيد فوزي: فكرينى كده بحاجة لها
مريم نوح: أغنيها؟
مفيد فوزي: قطعا
اغنية " بإيام البرد وإيام الشتى"
مفيد فوزي: أيه يا مريوم ده مرة لأول أقولك يا مريوم طب فاكرينى بحاجة من أغانيكى الشخصية أغنيتك بتقول ايه؟ أنا معاك
مريم نوح: أنا قلبى معاك
مفيد فوزي: أنا قلبى معاك
مريم نوح: أنا قلبى معاك والروح واياك وهعيش فى هواك وياك أجمل أيام قربلى كمان ننسى الأحزان دا أنا حضن حنان وآمان مليان أحلام هنخاف من بكره نخاف ليه والحب اللى بنحلم بيه وبنجرى عليه بياخدنا قوام
مفيد فوزي: مريم هو أنتى أخدتى قرار من جوزك المحترم أنك ما تغنيش ؟
مريم نوح: لأ خالص بالعكس
مفيد فوزي: يعنى هو موافق أنك تغنى؟
مريم نوح: هو عارف قد أيه الغنا ده بالنسبة الى حاجة مهمة قوى
مفيد فوزي: عمله أيه؟
مريم نوح: بيشتغل فى الإتصالات
مفيد فوزي: فى الإتصالات المفروض يبقى عنده تفكير علمى
مريم نوح: عنده تفكير علمى وتذوق فنى
مفيد فوزي: ودا السبب اللى جمعكم ؟
مريم نوح: أه
مفيد فوزي: يعنى هل هو شافك بتغنى ؟
مريم نوح: أه طبعا شايفنى بغنى لأن إحنا نعرف بعض من 99 من قبليها وأنا بغنى وهو شافنى كتير وأنا بغنى
مفيد فوزي: يعنى قصة الحب بدأت أمتى ؟
مريم نوح: هى أبدت زى ما بيقلوا النظرة الأولى كانت ليها تأثير
مفيد فوزي: من مين من الطرفين ؟
مريم نوح: من الطرفين
مفيد فوزي: هما نظرتان التقيا
مريم نوح: وبعد كده كنا أصدقاء فترة طويلة وتطورت العلاقة بعد كده؟
مفيد فوزي: أه دخلت دفء الصداقة فصارت حبا
مريم نوح وهى من أكتر الحاجات المهمة بينى وبين جوزى أنوا قبل ما نحب بعض أحنا صحاب
مفيد فوزي: ما أخطاء محمد نوح فى الحياة ؟
مريم نوح: أنا بعتبر أنوا أكبر خطأ لمحمد نوح أنوا ما كنش بيهتم بنفسه وبصحته قد ما كان المفروض كانت دايما أولوياته مش كده
مفيد فوزي: ألوياته كانت أيه؟
مريم نوح: أهم حاجه فى حياته شغله وفنه ويأتى بعد ذلك البيت والأولاد والحاجات دى
مفيد فوزي: وأخطائه فى الفن ؟
مريم نوح: أخطائه فى الفن مأدرش نفسه كفايه وبعد بدرى
مفيد فوزي: بعد بدرى
مريم نوح: لأنوا بابا طول عمره مهموم بهموم البلد ومهموم بالناس ودا يعنى كان بيحط عليه عبء
مفيد فوزي: أنتى مهمومه بالبلد ؟
مريم نوح: بالجينات أصبحت مهمومة بالبلد وللأسف دى حاجة متعبة جدا
مفيد فوزي: هل كونك دارسه إقتصاد وعلوم سياسيه وسط الغنا ده ووسط الأجواء دى هل دا خلى الناس اللى فى الأنتاج يكشوا منك ؟
مريم نوح: أعتقد أنوا فيه ناس كتير بتقبل حاجات كتير لأنها محتاجة فلما بيلاقوا حد مش محتاج ماديا أعتقد ومتعلم إلى حد ما فبيبقاله رايى فدا بالنسبالهم بردوا إلى ح ما يعنى
مفيد فوزي: كبرت يا مريم وبقيت ناضجه
فاصل
فقرة غنائية لمريم نوح
مفيد فوزي: سحر كان هدف الوالد محمد نوح أنك تشتغلى فى الإعلام ؟
سحر نوح: لأ
مفيد فوزي: أنتى كان هدفك أيه؟
سحر نوح: حاليا فى مسألة الإعلام عندى كم من الحاجات اللى جوايا المواضيع اللى جوايا اللى مستفزانى طول الوقت عيزة أتكلم فيها
مفيد فوزي: أيه البرنامج اللى أنتى بتقدميه ؟
سحر نوح: بقدم برنامج أسمه بنات وستات مش فكرة البنات والستات اللى هى الطبيخ والفاشون والجاحات دى أنا بهتم بالقضايا اللى الست والبنت المصريه اللى من خلالها تقدر تبنى أسرة سويه يعنى مش ضد الرجاله أنا مع الرجاله لما نحل مشاكل الستات ونخليها تقرا نفسها أكتر هتقدر تفهم الراجل أكتر فهتعمل أسرة سويه
مفيد فوزي: هل أنتى غنيتى ؟
سحر نوح: غنيت وما غنيتش أنا المفروض معايا دكتوراه فى الأوبرا المفروض أنا أبتدت غنيت ومسلت بس للأسف اللى كنت بحلم بيه مالقتهوش فى الوسط الفنى فقررت أبتعد تماما
مفيد فوزي: محمد نوح
سحر نوح: أصلا أنا لما بتكلم عن بابا بتبقى شهادتى مجروحة بنى أدم مثقف أوى ومخدش حقه أوى متشافش من محمد نوح غير جزء صغير قوى
مفيد فوزي: مين اللى غيرنايين من نوح ؟
سحر نوح: هما عارفين نفسهم أنا مقدرش أقول أى حد معندهوش ثقه فى ثقافته وذكاءه كشخصيه ممكن يبقى غيران منه
مفيد فوزي: هل كان محمد نوح كان ممكن يعمل مسرح سياسى فى مصر ؟
سحر نوح: هو بتاع المسرح السياسى هو قارىء نهم عنده ثقافة مرعبه
مفيد فوزي: خادتى منه أيه يا سحر ؟
سحر نوح: كل حاجة حلوه أتعلمتها فى الدنيا خدتها من بابا
مفيد فوزي: سعيد أنك أشتغلت فى هذا العمل كمقدمة برامج؟
سحر نوح: بيتفرج عليا هو سعيد أنى أنا أنا وشايف إن أنا مش بمثل دور مذيعة سحر دى اللى بتهزر وعندها كم يعنى بسيط من الثقافة
عندها طبيعيه سعيد كمان أنى أنا بدوس بطريقة معينة وبتحط السم فى العسل بطريقه معينة بيتفرج عليا وأكبرناقد ليا
مفيد فوزي: الأنسان كل ما بتكبر مهاماته أو إن صح التعبير أثقاله فى الحياه بيتحول إلى أن يصبح بيتوتى فلم أعد أخرج من البيت كثيرا وأصبحت بس أمارس عملى الذى أحبه زى ما أنتى تفضلتى وقلتلى أنوا أهم حاجة أنوا اللأنسان يكون بيحب مهنته وأصبح محمد نوح بالنسبالى رمز أتابعه ولا يزال أصداء ما يغينيه فى أذنى
سحر نوح: لازم حضرتك تعرف برده إن حضرتك رمز فى حياتى من الناس اللى أثرت فيا شخصيا من الناس اللى أنا بترعب منها وبحترمها ودى حاجة صعب تحصل ممكن واحد بيترعب من حد بس معندوش قدر الأحترام والمحبة حضرت أستاذ كبير قوى فى حياتنا أنا مرة حضرت كتبت عليا كلمة أثرت فيا جدا
مفيد فوزي: فكرينى
سحر نوح: أستمتعت عندما سمعت سحر نوح كلمة أثرت فيا
مفيد فوزي: طب ما تفكرينى بصوتك
سحر نوح: هغنى أغنية أنا بحبها قوى أسمها بشتقلك
مفيد فوزي: مين اللى كاتبها ؟
سحر نوح: عماد حسن وألحان محمد ضياء بشتقلك دايما بشتقلك بشتقلك بعينيا وقلبى بشتقلك بندهلك بندهلك بشتقلك دايما بشتقلك بشتقلك بعينيا وقلبى بندهلك بندهلك لوحد يستاهل حبك أنا بس وقلبى اللى يستاهلك لوحد هيستاهل حبك أنا وبس قلبى اللى أستاهلك بشتقالك دايما بشتقالك أه أه أه بشتقالك
فاصل غنائي لسحر نوح
مفيد فوزي: محمد نوح طب أيه أقول عن محمد نوح ؟ أقول أيه ؟ أقول عبارة واحده بس محمد نوح راشق فى وجدان كل مصرى خلصت العبارة وساتجه إلى محمد نوح محمد نوح عايز أعرف شهادتك على الفن فى مصر الأن وهبدأ فى المزيكا شايف المزيكا ماشية أزاى ؟
محمد نوح:ماشية بحاجتين حاجة للعين وحاجة للتقليد
مفيد فوزي: مين اللى ليه الغلبة؟
محمد نوح: التانية
مفيد فوزي: يعنى كأنه فيه أصوات مقلدة كتير
محمد نوح:أه
مفيد فوزي: هل بتعتقد أنه فيه حالات نشاذ كتيرة فى الغنا ؟
محمد نوح: النشاذ معدش هو المهم نشاذ الصوت معدش مهم المهم الكتلة على بعضها الفنان كتلة على بعضها يعنى أنا شايف فيه ألفاظ كتير متعجبنيش أنا
مفيد فوزي: كنت هقولك الكلمة فى هذا الزمن أيه ؟
محمد نوح: يعنى لما أسمع فنان محترم بيقول خليها تاكلك يعنى الكلمة دى ما بتريحنيش
مفيد فوزي: صناعة المطرب فى مصر الأن يعنى أم كلثوم أعطت فى يوم من الأيام مثل مذهل للغناء ومحمد عبد الوهاب الذى كان يركب حمارا ليغنى شيىء خطير الأن صناعة المطرب؟
محمد نوح:صناعة المطرب يعنى صناعة غريبة جدا يا أستاذ مفيد نحن نعيش فى عصر أنت النهاردة
مفيد فوزي: ما بتفتحش راديو علشان الناس بتغنى؟
محمد نوح:لأ ما بفتحش
مفيد فوزي: هل الأصوات اللى كانت فى زمنك إلى حد ما يعنى جميلة يعنى بعتقد أنه صوت هانى شاكر صوت مدحت صالح أصوات حلوة لكن معتدش موجودة ولها حضور
محمد نوح:لأن الغنوه دلوقتى يا أستاذ مفيد تتشاف مش بتتسمع إنما هينتج نتيجة الانهيار ده لابد أن تقف مصر على أقدامها مرة أخرى
مفيد فوزي: دا أمل ؟
محمد نوح:أه
مفيد فوزي: شايف الموسيقى التصويرية أزاى ؟
محمد نوح: الموسيقى التصويرية نوعين يا أستاذ مفيد يا أما مزيكا فى العالم أوبجكتيف يا سابجكتيف عن الموضوع مش معقول تبقى موسيقى تصويرية عن فيلم عازف بالعود هو البطل وأسمع أورجان المعادل الموضوعى مفيش ده دا مش موجود
مفيد فوزي: ودا مختفى ليه ؟
محمد نوح:لأنه شكل ما درسهوش
مفيد فوزي: طيب الراجل المحترم عمر خيرت أحب أعرف رأيك فيه؟
محمد نوح:عمرو كويس أنا أول واحد أنتج له
مفيد فوزي: جمال سلامة أعتقد أنه مزيكته كويسه
محمد نوح:أه أنا أعتقد أنه مزيكته الغير تجارية كويسة
مفيد فوزي: رمزى يسي
محمد نوح:رمزى يسي أحد أبنائى
مفيد فوزي: هانى مهنى أنت شايف شكله أيه ؟
محمد نوح:جميل بس جميل
مفيد فوزي: يعنى أيه جميل دى أنا اشايف أنو جميل دى مجاملة
محمد نوح:لأ يعنى هو مفيش جديد
مفيد فوزي: أنت شايف أن زمن عبد الحليم حافظ لم يفرز أصوات ليها قيمة ؟
محمد نوح: زمن عبد الحليم حافظ الدنيا عبارة عن كولاج من كله زمن عبد الحليم حافظ كانت الودن أساسية إنما الجداد لأ طبعا
مفيد فوزي: ومعاهد الموسيقى تقول عليها أيه ؟
محمد نوح:كويسه فيه شباب طالع كويس منها ودا الأمل فى بكره
مفيد فوزي: هل مريم كان ممكن تستمر فى الغنا ؟
محمد نوح:لأ أنا منعتها بجد يا أستاذ مفيد أنا خفت عليها زى ما خفت حضرتك على بنتك يعنى كما خفت أنت على حنان
مفيد فوزي: معلش دا شيىء جميل بس أنا أحب أعرف خفت من ايه؟
محمد نوح: خفت من أنى أنا بعد العمر ده يعنى ألوث نتيجة إشاعة نتيجة صور
مفيد فوزي: بس أنت فنان يا محمد يعنى عشت الفن بكل حذافيره وعرفت معنى الإشاعة وشفت الوشاية وعشت دا كله وكنت صلبا سحر أديت لها فرصة أنها تشتغل مقدمة برامج
محمد نوح:هى خدت الفرصة فى بيتها أنا متدتهاش
مفيد فوزي: لأ يعنى قصدى سمحت لها ما هو دا جزء أيضا من الوسط الإعلامى وله نفس الشىء ومع ذلك ما خفتش على سحر
محمد نوح:علشان كبيرة وعاقلة وأنا ولادى لما بدأوا كانوا أطفال خفت خفت يعنى قفلت عينى على أنى أدفع بهم فى هذا المجال وهى دلوقتى أستاذ فى الجامعة الأمريكية وسحر خدت دكتوراة فى المزيكا فى الأوبرا ولم تخرج على الأوبرا ودا فشل وزارة الثقافة لأن سحر تبقى دكتوراة فى الأوبرا ومصعدتش على الأوبرا ولا مرة وهاشم أختار يكون طيار أنا راضى بكده الحمد لله
مفيد فوزي: هل خذلتك صحتك على أنك تكمل مشوار الغناء ؟
محمد نوح: أه الصحة يعنى انهارت فجأة
مفيد فوزي: أيه سبب إنهيارها إذا ما كانش ده يضايقك؟
محمد نوح: لأن حالة القلب عندى سيئة جدا
مفيد فوزي: أنا أعتقد أن القلب بسبب صدمات الحياة هل واجهتك صدامات فى الحياة ؟
محمد نوح: أه الصدامات عالية بس الحمد لله أنا راضى يعنى سعيد ومبسوط وألحمد ألله ولادى كويسين وبخير يعنى كده أموت وأنا مرتاح
مفيد فوزي: صوابعك ما بتكلكش على البيانو ؟
محمد نوح:ماعدش فيه قوة
مفيد فوزي: بمعنى؟
محمد نوح:معدش فيه توافق عضلى يعنى أمسك العود معرفش أعزف
مفيد فوزي:لكن ودانك بعافية ؟
محمد نوح: ما هو ودانى زى عينيا يعنى أنا قدرتى على الرؤية يعنى
مفيد فوزي: أنا أخدت بالى لما جيت تقعد بتقول فين فلان؟ ما أنا قدامك
محمد نوح: ما أنا مش شايف كويس جالى جلطة مأثرة على النظر
مفيد فوزي: من كام سنه وأنت فى حالة صمت ؟
محمد نوح: من 10 سنين
مفيد فوزي: بعد أن ملأت الدنيا مجدا وغناءا ووصل الأمر أنك كنت بتروح تشد حيل البلد فى الأستاد فى الكورة وتقف وسط الناس وتغنى شد حيلك يا بلد
محمد نوح:أه وشدت حيلها
فاصل
فقرة غنائية للفنان محمد نوح
مفيد فوزي: وصل الامر أنك أنت لما كنت بتقول يامصر كانت الناس بتحس أنها بتصرخ معاك بتغنى معاك
محمد نوح: يامفيد دا جميل وأنت معلش سيبنى أنا أقولك عليك كلمة أنت من أول الناس اللى حسوا بيا وساعدونى وأنا فاكر عبد الوهاب قالك أيه وأنا فاكر أنت كنت متبنى محمد نوح أزاى فمش بنسالك ده أبدا أبدا أبدا لأنه أنت ساهمت فى حركة النهضة اللى قامت أنا ما بنسالكش دا أبدا ومازالت أحبك حبى لأبويا وعمى وخالى وأبنى وعمرى يا مفيد يا فوزى أنا معتبرتكش أحد أبنائى يعنى طول عمرى أحس فيك بالذكاء المفرط وربنا يديك الصحة ويشفيك ويعافيك أنت وبنتك حنان اللى هى تعتبر بنتى اللى شلتها وهى صغيرة
مفيد فوزي: أيه أخطاء محمد نوح إذا أردت أن تعترف بيها قدام الناس ؟
محمد نوح:أخطائى والله كنت صادقك مع نفسى
مفيد فوزي: الصدق مع النفس خطأ
محمد نوح: أه بضيع الأنسان يعنى ما حاولتش أخدع نفسى ولا أخدع الناس أنا ألحمد ألله
مفيد فوزي: طب أنت بتنصح هاشم بإيه مش بتقوله خليك صادق مع نفسك ؟
محمد نوح: أه أنا بقول لهاشم يا بنى يا هاشم عمرى الأشياء ما تعطى الأنسان قيمة لاساعة كويسة ولا أكل كويس اللى بيعطى الأنسان قيمة نفسه يعنى عود أم كلثوم دا يبقى غالى لأن دا العود اللى عزفت عليه أم كلثوم يعنى الأشياء ما بتعطتيش قيمة أنت اللى بتعطى قيمة للحاجة يعنى الميكرفون بيشتغل فى أيد مفيد فوزى بياخد قيمته من مفيد فوزى
مفيد فوزي: السيدة منى الفاضلة هى آخر زوجاتك هل أنت شاعر أن مشوار الزواج فى عمرك كان لم يصادف هواك ؟
محمد نوح:الحمد لله أنا تزوجت 3 مرات مره وأنا طالب
مفيد فوزي: تماما تقييمك للزوجة دى أيه ؟
محمد نوح:أنسانه طيبه وخيرة أنا كنت مقبل على الحياة والتعليم ودودة كتب
مفيد فوزي: وهى
محمد نوح: وهى كان حظها سيىء فى الحته دى
مفيد فوزي: الزوجة التانية
محمد نوح: الزوجة التانية هى مراتى
مفيد فوزي:حضرتك قلت 3 مرات
محمد نوح:التالتة دى كانت يعنى فترة من حياتى وأنتهت
مفيد فوزي:قد أيه أستمرت التالته ؟
محمد نوح: أستمرت حوالى 10 سنين
مفيد فوزي: لما بتحس أنوا الناس تزحف إلى حيث تغنى وبعدين بتطلع أنت تغنى بكل ما أوتيت من قوة ويكاد يكون المسرح الغنائى على أيديك ويكاد يكون المسرح السياسى أيضا أنت شاركت فيه ثم الغناء من زمن سيد درويش أنت جسدته مره أخرى لا تشتاق له ؟ فى تعبير فى الأنجليز اللى يقولك أيه الكف عن هذا الحلم ؟
محمد نوح: أه
مفيد فوزي: يعنى كفيت عن الحلم الأنسان ممكن يكف عن الحلم أحيانا
محمد نوح: أنا دلوقتى يا أستاذ مفيد يعنى بصدق شديد وصلت لسن عاوز أموت وأنا مرتاح مش عايز أتعذب يعنى بصدق شديد يعنى بتمنى أن حياتى تخلص وأنا كده منش عايز أى حد ولا مساعدات ولا أى حاجة أنا بتمنى
مفيد فوزي: هل بتخاف من المرض ؟
محمد نوح: لأ
مفيد فوزي: كان نجيب محفوظ دايما يقولى أنا لا أخشى من الموت ولكنى أخاف المرض هل المرض بيعذبك؟
محمد نوح: قوى قوى قوى أنك تحس أنك متألم ومش عارف تخلص من الألم
مفيد فوزي: هل قلت كل ما تريد عشت كل ما تريد حتى تطلب الموت ؟
محمد نوح: أنا مش طالبه محدش بيطلب الموت بيطلب الراحة
مفيد فوزي: أنت حاسس أنك بتتعذب ؟
محمد نوح: أه أنا حاسس أنى بتعذب أه
مفيد فوزي: أنا شايف الأسرة كلها حواليك
محمد نوح: أه طبعا
مفيد فوزي: يعنى حاطينك على رموش العين
محمد نوح:وأكتر وأكتر
مفيد فوزي:من أعظم 5 موسيقيين فى مصر مروا بتاريخ هذه البلد ؟
محمد نوح:أعظم 5 فيه تصورى فؤاد الظاهرى ثم أندريا رايزر ثم أحد العباقرة بس أسمه الراجل اللى كان بيعزف بيانو
مفيد فوزي: مدحت عاصم
محمد نوح: مدحت عاصم أربعة كل المجددين دلوقت
مفيد فوزي: لم تذكر لا كمال الطويل ولا محمد الموجى ولا بليغ حمدى
محمد نوح: بليغ أه
مفيد فوزي: بليغ فى الخمسة أكتر أكتر من كمال الطويل
محمد نوح:اه أكتر من كمال الطويل
مفيد فوزي: دى شهادتك؟
محمد نوح: لأن كمال الطويل ميلودى عمل يعمل خط تر رار را كده لكن بليغ حاول يجدد شويه معلش أنا أسف دول عباقرة فى الموسيقى الشرقيه لكن الموسيقى المتعددة اللى هى الصوت جنب الصوت
مفيد فوزي: هل كان إنحيازى لعبد الحليم حافظ كأجمل نبرة وأجمل صوت فى ذلك الزمن تعديا على الواقع ؟
محمد نوح: لأ كان جزء غريب وحميد من الواقع
مفيد فوزي: حضرتك تقابلت مع عبد الحليم حافظ
محمد نوح:أنا طبعا عرفته فى الأخر
مفيد فوزي: هل أحمد عدويه دخل منطقة رأسك ؟
محمد نوح:لأ
مفيد فوزي: هل شعبان عبد الرحيم دخل منطقة رأسك ؟
محمد نوح: لأ
مفيد فوزي: هل أبو الليف دخل منطقة رأسك ؟
محمد نوح: مين أبو ألليف ؟