ليه شفيق

لماذا يجب ان نختار شفيق ؟؟! ^_^
~~~~~~~~~~~~~~~~~~
طبعا لازم نختار شفيق و لاسباب كتي...يييييييييييييييير ..
اولا .. شفيق طيار و احنا جربنا الطيارين و ارتحنا معاهم و عارفين ان ضربتهم ما بتخيبش ..
... ثانيا .. شفيق كان مع الثوار و كان مصر يجيب لهم بونبون وحلويات و هما فى الميدان و ده اكبر دليل على حنية قلبه .. يعنى ممكن ينزل مع التموين المدعم كيس بونبون و باكو لبان .. قمة الرفاهيه ..
ثالثا .. بصراحه الراجل عليه طقم بلوفرات مالهوش حل .. واحنا نطول رئيسنا يبقى شيك و روش روش طحن ..
رابعا .. واضح انه راجل بركه و له كرامات .. الوحيد اللى تظلمه اتقبل و لامجلس شعب و لا قانون عزل
خامسا .. احنا تلاتين سنه بنتعاطى مبارك فعلشان نتخلص منه بدون اعراض جانبيه المفروض نخفف الجرعه لكن ما نغيرش الصنف و هو من ريحة الحبايب ..
سادسا .. الراجل ده اقسم بشرفه قبل موقعة الجمل بيوم ان الثوار ما حدش هيمسهم و جت الجمال و الحصنه الخونه وهاجموا الثوار .. وطبعا عملوا كده من وراءه يبقى لازم ياخد فرصته فى انه يعاقب كل الجمال والحصنه اللي فى البلد ويجيب حق الثوار منهم .. يعنى ممكن مثلا يغير اسم الحصان لحمار والجمل يبقى فلوكة الصحراء بدل سفينه وبكده يبقى خدنا حق الشهدا و المصابين و خلصنا ..
سابعا .. هو حاليا مش متجوز .. يعنى مش هيجيب لنا مرات اب تكدر الشعب و تقص له شعره و تمسكنا مقشات نكنس ونمسح فى الشوارع ..
واهم حاجه عنده الكاريزما اللى خنقونا بيها تسألونى يعنى ايه كاريزما اقول لك يعنى اول ما تشوفوه دقات قلبك تزيد وعينك تزغلل ونفسك تغم عليك ..
اظن بعد كده ماحدش يقول لى شوفى البرنامج الانتخابى بتاعه ولا مشروعه ولا حاجه من الكلام الفاضى ده .. هو الريس ايه غير كاريزما وجنتله وشوية بروفلات ..
منقول