عسيلي في الجورنال

أولا سلامات عليكوا، ثانيا ومبدئيا كده لمن لم يقرؤوني من قبل، أنا بكتب بلسان عامي فصيح، ولبيان الفرق بين ما هو عامي وما هو فصحى لما هكتب بالفصحى بشكل الكلام للتوضيح، وأحيانا الكتابة العامية بتجبرني إني أكسر بعض قواعد اللغة كسرا صريحا واضحا، فأرجو إن ده مايثيرش حفيظة حضراتكم، أنا لا أراه عيبا بما إننا بنعمله كل يوم طول ما إحنا بنتكلم بعاميتنا المصرية الخاصة اللي أنا شخصيا في حالة غرام دائم بيها، وده اللي بيخليني مش قادر أتخلى عنها حتى وأنا لأول مرة بكتب في جورنال وخصوصا لما يمتلئ الجورنال ده بأسماء لها قامة وهامة وأقلام بليغة على أقل تقدير. ثالثا: ندخل في الموضوع بقه.
كيف نختار الرئيس؟
هل نختار رئيس عشان نظيف اليد مثلا؟ هو إحنا أكيد مش حنختار رئيس للجمهورية عارفين إنه حرامي لكن أنا بشكل شخصي مش عايز رئيس نظيف اليد!؛ أنا عايز المصريين يبنوا نظام للحكم يضع كل مسؤول في الدولة من كبيرهم لصغيرهم تحت الرقابة الدائمة والمحاسبة المستمرة، عشان ماحدش أصلا يبقى عنده فرصة إنه يبقى قذر اليد! الدولة مالهاش دعوة بضماير الناس، الدولة ليها دعوة بكل أفعالهم اللي بتأثر على الدولة أو على أي من مواطنيها.
طب نختار رئيس عشان متدين ويعرف ربنا مثلا؟ المنطق اللي ورا الفكرة دي مفهوم يعني، على أساس إن اللي يعرف ربنا ده حيتقي فينا الله. لكن بالنسبالي أنا برضه مش هو ده؛ ما أنا طول عمري بشوف ناس مخلصين جدا في العبادة وعندهم دقون وزبايب صلاة وبيذكروا الله كثيرا وبيقولوا السلام عليكم ورحمة الله وبركاته بس مابيعملوش شغلهم كويس مثلا، ديكتاتوريين مثلا، ما بيعرفوش يسمعوا مثلا، فاكرين نفسهم بيملكوا الصواب وحدهم مثلا، فكرهم متحجر مثلا، ما يعرفوش عن العالم مثلا، ما يفهموش في بناء الدول مثلا، مش مؤمنين بالديمقراطية وإن ادعوا عكس ذلك مثلا. لأ لأ لأ، أنا ما ليش دعوة خالص بعلاقة ذلك السيد الرئيس بربنا، ده موضوع بينه وبين ربنا، وبعدين إحنا ما عندناش أصلا وسيلة نقيم بيها تلك العلاقة! يبقى نحشر نفسنا في الموضوع اللي لا يخصنا ده ليه؟ والله لو كان من سيحكم مصر والمصريين في المستقبل تنطبق عليه الشروط العملية اللي نقدر نقيمها، وبعدين طلع كمان راجل يعرف ربنا، أهلا وسهلا، أنا شخصيا أبقى سعيد خالص بالحكاية دي. بس أنا مش عايز رئيس مصر يبقى بيرأسها عشان فاكر نفسه لما يقعد يقول أنا أريد شرع الله حيدخل الجنة، أنا عايز رئيس يحكمنا عشان يقدر يساعدنا في إننا نبني مستقبل نبقى فيه أمة عظيمة زي ما كنا في كثير من الأيام.
طب تفتكروا نختار رئيس طيب وحنين مثلا عشان فقراء مصر الكثيرين يلاقوا أخيرا من يحنو عليهم بعد ما ذاقوا الأمرين؟ لكن الفقرا مش عايزين حنية، الفقرا عايزين خطة توجد موارد نعرف نحسن بيها ظروف حياتهم ونحل مشاكلهم ونخلي ولادهم يعيشوا حياة أحسن من اللي هم عاشوها.
طب هل صحيح نسمع كلام الناس اللي بيقولوا لازم الرئيس يبقى ركب ميكروباصات وكل كشري وفول من عالعربية واتمرمط وكده؟ في الحقيقة لما الواحد يبص على أي دولة أو حتى مؤسسة في الدنيا حيكتشف فورا إن ده كلام فارغ! بيقولوا «أصله لازم يبقى عارف الناس عشان يعرف يدير مشروع حياتهم» مع إن كل شركات الدنيا الكبيرة تقريبا، اللي فيه منها ميزانياتها وحجم موظفيها أكبر من دول كتير، من يأخذ فيها القرار ويدير شؤونها بيبقى راجل خواجة! اللي بيحاول يصلح مشاكل ويحط خطط مش محتاج يبقى عايش في قلب المشاكل دي. فعلا كلام فارغ، بل بالعكس بقه، أنا مش عايز واحد عاش في المجاري عشان يصلح مشكلة المجاري، أنا عايز رئيس عاش في جناين عشان يبقى فاهم إحنا عايزين نوصل لإيه.
طيب نختار رئيس عنده كاريزما شخصية وشكله كده وطريقة كلامه يوحوا بالزعامة وقوة الشخصية؟ أعتقد إن تاريخ عبد الناصر وأنور السادات -رحمهما الله- علمنا كويس إن ده مش كفاية أبدا، بل إن ضرره قد يكون وبسهولة أكبر من نفعه. طظ في القدرات الخطابية والتصقيف اللي بييجي بعدها، عايزين رئيس مش عايز حد يصقفله، عايز بس يشتغل عشان يغير في مصير مصر إلى الأحسن. أنا مش عايز رئيس عنده كاريزما شخصية، أنا عايز حد زي Bill Gates كده! شكله محاسب أو مدرس بس عنده خطة وعنده رؤية وعايز ينجح وعنده من القدرات ما يمكنه من النجاح..
عايز رئيس بيعرف يشتغل مع الناس، وبيعرف يسمعهم وبيعرف يغير رأيه، عايز رئيس بيعرف يقول أنا غلطت وعنده قدرة أنه يصلح أخطاءه.
عايز رئيس حازم ولما بيقرر يعمل حاجة بيصر عليها للآخر.

عايز كمان رئيس متعلم، مش تعليم من بتاع الشهادات ده، عاوز رئيس تعليمه فتح مخه ووسع مداركه وساعده في إنه يطور طريقته في التفكير، عايز رئيس متعلم عشان يقدر يحل المشاكل من جدورها، مش من اللي باين منها. عايز رئيس فاهم يعني إيه تخصص، فاهم يعني إيه الرجل المناسب في المكان المناسب، مش رئيس يختار اللي بيحبه ولا اللي بيثق فيه ولا اللي عشرة عمره. عايز رئيس يقدر!
مطلوب رئيس.. بيعرف