دراسة مقارنة في علم الزواج عند الشباب.. في تلك الأيام الهباب!

في رأيي الشخصي إن الشباب في مصر ما عندهمش خبرة كافية للتعامل في موضوع الحب والارتباط والجواز ده، يعني إحنا كولاد وبنات في مرحلة الثانوية العامة بنبقي مستنيين بفارغ الصبر إننا ندخل الجامعة وكل واحد بيبقي في أول يوم جامعة عامل زي المجنون وهو نازل من البيت ولابس زي ما بيقولوا الحتة اللي علي الحبل ومستني بقي يحصل الموقف اللي في خياله مع الإنسان اللي طول عمره مستنيه.. بلاقي الشباب والبنات مستنيين موقف تعارف يحصل زي بتاع تيتانك.. وطبعا أول ما بيروح الجامعة بيتصدم ويكتشف إن مفيش أي حاجه من اللي اتخيلها دي هتحصل.. والمشكلة إن الشباب والبنات في مصر بيبقي خيالهم واسع وحالم ومش منطقي يعني كل ولد بيحلم ببنت جميله ومؤدبه وروشة ومتعلمة وشيك ودمها خفيف وكل بنت بتحلم بولد وسيم ورياضي وذكي ومثقف ومش بعيد يبقي غني وهيتجوز بعد ما يتخرج بشهرين
المهم بعد ما بتعدي مرحلة الأحلام اللي مش بتتحقق دي بيبتدي الشاب والبنت يدخل دوامة ما بعد الجامعة سواء الجيش والشغل بالنسبة للولد أو البيت والشغل بالنسبة للبنت.. وفي المرحلة دي بتزيد مظاهر الكبت والاحتياج عند الكل يعني عند الولاد والبنات وطبعا ده نظرا لأن سنهم كبر نسبيا ولازم يكون فيه شريك للحياة.. البنات بتبتدي تتنازل عن حلم الحب والارتباط ويبتدوا يدوروا علي جوازة صالوناتي يكون فيها العريس غني!
وفي المقابل بيبتدي الشاب يغرق في دوامة الشغل والهروب من الوضع المحبط ده عن طريق الحشيش أو الهيء والبيء مع أي بنت منحرفة.. ما علينا بعد كده بتبتدي كل بنت تدور علي أي فرح أو كورس أو بتنجان مهبب تروحه لعل وعسي تتكل علي الله وتلاقي العريس أبو شنب الغني اللي للأسف بيبقي أكبر نسبيا في السن أو من جيل تاني، يدوبك عشان يبقي لحق يكون نفسه.. بعد الهري ده كله بنلاقي تسعين في المية من الشباب المصري الصاعد الواعد متجوز صالوناتي ومش عن حب ومطلوب منه إنه يعيش سعيد مع حد ما شافوش ولا يعرفه كويس قبل الجواز بس طبعا بيضحك عليه بالكذبة بتاعت الحب بيجي بعد الجواز.. طبعا أنا ما وصلتش لمرحلة ما بعد الجواز الصالوناتي عشان أعرف أتكلم عنها بس في تصوري(مش في رأيي المرة دي ) إنها بتبقي مملة ورتيبة وممكن يحصل فيها مطبات كتيرة زي مثلا إن الراجل يحب واحدة غير مراته أو الست تحب راجل غير جوزها وده لازم بيحصل لأن الحب زي الإنفلونزا لازم بيجي للإنسان من وقت للتاني.
الحل بقي في وجهة نظري هو إن الأهالي تبطل تقفيل مخ وتشيل الصدا من علي أفكارها في كل حتة في العالم الشباب بيكون ما عندوش فلوس زي حالاتي كده إهيء إهيء اهيء بس الفرق إن في الدول دي بيسمحوا للشباب إنه يبدأ حياته بعلاقات لحد أما يتجوز ويستقر. طبعا أنا مش باقول نخليها سداح مداح ونقضيها بس فيها إيه لو تم تسهيل مطالب الجواز ونبدأ بالحد الأدني وكمان الشباب يبتدوا يشتغلوا في سن صغيره من بعد الثانوي ونفكنا من التفكير بتاع عيب أشتغل في سنترال وعيب أبيع جرايد والكلام الفاشل ده، بعد كده الشاب يخلص دراسة ويتوكل ويجيب شقه إيجار جديد إيجار قديم مش إيجار خالص مش مهم المهم يبقي شقه وخلاص.
لو ده حصل أفتكر إن شباب وبنات مصر المحروسة هيبقي عندهم نسبة من الخبرات تساعدهم إنهم يختاروا الأحسن في حياتهم.
طبعاً الكلام ده مش هيتنفذ وإحنا هنفضل زي ما إحنا بس إن شاء الله هنرقع الجزاير إتنين ونلعب ماتش فاصل ونكسبهم ونروح كاس العالم سنة 2014 في البرازيل يحيينا ويحييكم ربنا!!