الأراجوز

فكر في يوم يعمل أراجوز لأنه كان زهقان
جاب كورة وخيوط وقماش من كل الألوان
كان غرضه يسليه و يونسه يوماتي قبل ما ينام
.
.
وبعد ما خلص صنعته علمه واحده واحده الكلام
قاله قول الحق ماتخافش من أي مخلوق مهماً كان
الظالم مهما كان جبروته هيفضل طول عمره جبان
.
.
اتعلم الأراجوز الحكاوي وبقه فصيح اللسان
ومفيش حد يعمل غلطه أدامه إلا أما كان يتهان
صاحب الأراجوز كان بيه فخور جدا و فرحان
ومهما الناس يشتكوا يقولهم: ده أراجوز غلبان
متغلطوش و هو مايشتمكوش
ولا انتو مش معايا إن الحق لازم يبان
.
.
وفي يوم غلط صاحب الأراجوز غلطه
يعجز عن وصفها اللسان
الأراجوز مقدرش يسكت كعادته
وقاله : صحيح انت صاحبي لكن كده غلطان
أقولك عيوبك ولا تزعل مالحقيقة زي بني الإنسان
.
.
قاله : قول ماتخافش عليك مني كل أمان
صارحه الأراجوز وقاله :
انت اتغيرت كتير يا صاحبي ومبقتش زي زمان
والكل من حواليك كارهك ولأفعالك غضبان
راجع نفسك كويس وإلا هتكون ندمان
( وهتخسر كل اللي بيحبوك واللي كانوا زمان بينصفوك )
والكل فيك بعد كده هيكون شمتان
.
.
اتنرفز صاحب الأراجوز .. غضب ومعجبهوش الكلام
وقاله: إيه اللي مش عاجبك ده أنا كنت طول عمري تمام
غلطاتي غير كل البشر يالا اعترف واضرب لي تعظيم سلام
.
.
رفض الأراجوز يكدب كعادته أو يخدعه بالأوهام
غلطان يا صاحبي بقولك وده عندي آخر كلام
زيك زي كل البشر لما يوسوسلهم الشيطان
وكمان لازم تعترف وتقول أنا غلطان
.
.
صبرت عليك زيادة يا حتة بهلوان
وزي ما عملتك بإيديه ممكن أحطمك
وأدغدغك 100 حتة وأقطعك
.
.
مش مستغرب لأني متعود على أفعالكوا من زمان
غدر وخيانة .. ظلم وإهانة .. خِسه ونداله
من ساعة ما اتطرد آدم وحوا لما كلوا التفاحة
.
.
راح ماسكه من طرطوره وفاكك كل خيوطه
والكوره اللي كات دماغه فشفشها
والله لوكات تتاكل لكنت هقرقشها
.
.
واتدمر الأراجوز المسكين في ثانية
لكلمة حق كان عايز بصدق يقولها !