يا عيييييينى .. محدش افتكره حتى بوردة دبلانة ؟!

كل سنة وكل مصرى طيب .. كل اكتوبر وانتم بألف خير .. كل ذكرى نصر ومصر حاضنة ولادها .. وزارعة بساتين ورد فى جناين ارضها اللى اتروت بدم الشهدا.. شهداء يونيو واكتوبر ويناير ..
هذه المقدمة الرومانسية قد لا تكون ضرورية على فكرة ..
لكن انا بصراحة بالف وأدور وأراوغ لانى عايز اكلمكم فى موضوع خطر على بالى النهاردة الصبح وانا باتفرج على احتفالات اكتوبر وعمال اعد فى باقات الزهور اللى بتتحط على قبر الجندى المجهول وكمان عروض الطيرات اللى فى سماء وسط البلد .. حاجة جميلة جدا ، لكن فى وسط الفرحة والفرجة شريط ذكرياتى سف .. لف .. رجع سنة كاملة لورا .. اكتوبر 2010 لما كان حسنى مبارك رئيس مصر .. سيبك من ان هو نفسه اللى كان بيبقى عريس الليلة .. اول ضربة جوية فتحت باب الحرية .. والنسر المصرى شق السما .. واخترناك .. وروحه سمحة صافى القلب يا كفر مصيلحة .. الى اخر الكلام اللطيف اللى كتبه شعراء كبار ولحنه ملحنون كبار .. كلهم دلوقتى بيلعنوا سلسفيل الراجل وبيطلعوا فى التليفزيون باعتبارهم هم اللى اشعلوا شرارة الثورة والهبوا حماس الجماهير زى ما حضراتكم عارفين .. وبالمناسبة انا والله لا ألوم عليهم لانهم بجد معذورين .. يعنى مكانش ينفع خالص ان حد منهم يتكلف بانه يعمل حاجة لمبارك فى مناسبة اكتوبر ويرفض .. خلينا واقعيين .. لكن نفسى بس لما يتكلموا يقولوا كده .. يقولوا كنا مكرهين .. كان غصب عننا .. لكن ماتقولش كلام ملوش معنى ..
المهم لما شريط ذكرياتى سف .. ولف .. لقيت خيالى سارح لغاية المركز الطبى العالمى حيث يرقد الرجل الذى ظللنا فاهمين من اول ما اتولدنا لغاية من كام شهر انه البطل الرئسى لحرب اكتوبر وان اللى معاه كانوا كومبارس .. وبعدين بعد الثورة عرفنا انه كان واحد من القادة .. فيه زيه كتير وفيه ناس عملوا اكتر منه لكنه كان طول الفترة اللى كان فيها رئيس كان سارق الفرح .. طيب .. تفتكروا فيه حد جت له الجرأة السنة دى انه يفتكره حتى بوردة دبلانة؟
حاولت اعرف من المركز الطبى العالمى لكن محدش بل ريقى بمعلومة .. وبصراحة ملاقيتش ان المسألة تستاهل انى اروح لحد هناك علشان اعرف بطريقتى .. ليه بقى ؟
لان كل واحد حر .. اللى عايز يبعت ورد يبعت ورد واللى خايف مايبعتش .. بس السؤال اللى انا بجد مش لاقيله اجابة : هو الراجل ده بعد مايموت حايكون برضه من ضمن بروتوكولات الاحتفال باعياد اكتوبر ان المسئولين يزوروا قبره ويحطوا عليه ورد ولا لأ ؟
وساعتها كام واحد ممكن يروح يزوره ويفتكرله مرة غنوة يوم سمعناها سوا ؟
محمد عبد الله