رحلة إلى العصر الحجرى فى " الجلف الكبير " !

الجلف الكبير .. عمرك سمعت عن المكان ده ؟ أكيد معظمنا ولا يعرف عنه حاجة رغم أن كثير من السياح يأتون لمصر عشان رحلات السفاري هناك .. عموماً تعالوا نعرف أكثر من مجدي كمال الدين – منظم رحلات سفاري ..
منطقة الجلف الكبير تبعد عن القاهرة حوالي 1600 كيلو .. يعني أكثر من 10 ساعات سفر و هو مكان يتوسط جبل العوينات على الحدود المصرية الليبية السودانية و قريب جدا من الوادي الجديد .
المكان طبعا تحفة لأنه مليان صخور رملية و فوهات بركانية قديمة جدا و وديان عميقة و اكثر حاجة تميز المكان هو سلاسل بحر الرمال الأعظم .
للأسف منطقة الجلف الكبير سياحياً لم تأخذ حقها فى الشهرة ... و رحلتنا للجلف الكبير تبدأ من واحة الداخلة عبر مكان اسمه " ابو بلاص " و على فكرة ابو بلاص دي أسمها ليه قصة و هي ان القوافل الليبية زمان كانت بتحمل في الأواني الفخارية المياه و الوقود .
و من ابو بلاص يتجه السياح بالسيارات ال 4x4 الي منطقة بحر الرمال الأعظم و هناك يجدوا العديد من أشكال و مظاهر حياة الأنسان القديمة مثل الطبخ على النار و النوم داخل الكهوف .. ده غير الرسومات على الصخور من الاف السنين .
لو كنت من محبي الكهوف هتلاقي هناك كهف المستكاوي و ده جواه اكثر من 2000 صورة من نقوش و رسوم الأنسان الأول و ده طبعا غير الوديان هناك اللي اهمها " وادي عبد الملك " و " وادي بخيت " و داخل الوديان دي اثار فرعونية قديمة جدا ... المكان هناك يستاهل المغامرة و ياريت تجربوا بأنفسكم .