عندما قال الحسن بن الهيثم للحاكم بأمر الله: أنا عايز كتاكيت "الحلقة الثانية"

وأنا قاعد على القهوة فى انتظار الساعة الثانية عشرة جالى واتس آب من ابن إياس بيقول فيه:
والنبى يا ابن البدوى وانت جاى هاتلى معاك طاجن ملوخية باللحمة بس احرص على أن تخفيه جيدا وألا تطلع منه رائحة الطشة.
أنا قلت إيه اللى جرى لابن إياس أنا كنت باكل أحلى ملوخية بالطشة من إيد ياسمين ملوخية من التى قال عنها الأستاذ إكسلانت كات رئيس تحرير أخبار اليوم الأسبق أن الرئيس الأسبق مبارك محروم من طشتها.
سبت القهوة وطلعت ع الدهان جبت جوزين حمام محشى وطاجن ملوخية ونص ريش ونص كباب وكفتة والعيش والسلطات.
وصلت القهوة يادوب اتناشر إلا خمسة على ما خدت نفسى كان الزمن قد تحول ووجدت نفسى أمام منزل ابن إياس أضرب سقاطة الباب.
هذه المرة فتح ابن إياس بنفسه الباب وأدخلنى سريعًا ونظر خلفى فى الشارع ثم أغلق الباب وقال:
حمدلله ع السلامة يا ابن البدوى
الله يسلمك ياغالى جايبلك جوزين حمام وكباب وكفتة وفتة كوارع حاجة ترم العضم وتشد العصب.
سيبك من ده كله المهم الملوخية
عيب ياغالى طاجن ملوخية باللحمة يستاهل حنكك
فتحنا الأكياس ورفع ابن إياس طاجن الملوخية على بقه ورزع الطاجن فى نفس واحد ثم تجشأ وأمسك كرشه سعيدًا.
صحة وعافية يا معلم بس قولى ما أنت عندك ياسمين كانت بتعمل أحلى ملوخية.
ده قبل ابن المجنونة ما يمنع أكل الملوخية
سمعنا طرقا شديدا على الباب أنا خفت الصراحة وابن إياس اترعب وقالى ربنا يستر أحسن يكون شم ريحة الطشة.
الدق كثر على الباب حتى كاد أن يكسره وأنا قلت بصوت فيه رعب:
هو الأستاذ ممتاز القط بيهجم على أى حد بياكل ملوخية بالطشة ولا ايه؟!
فتحت ياسمين الباب ودخل مجموعة من الجند وقال قائدهم: مولانا الحاكم بأمر الله يريدك حالاً.
ابن إياس قال: سمعًا وطاعة هلم يا ابن البدوى.
قائد الحرس قاله: مين لا مؤاخذة الكابتن؟
ابن إياس رد:
هذا مساعدى.
قال قائد الحرس: يالا بينا
الساعة 1 صباحا كنا نمشى فى شوارع المحروسة والدكاكين مفتوحة والكلوبات المنورة بالشمع فى كل مكان والناس ولا كأنها الضهر.
بسأل ابن إياس: الناس سهرانة ليه؟
زغدنى بكوعه وقالى اخرس مولانا أمر الناس تشتغل بالليل وتنام بالنهار.
وصلنا القصر ودخلنا على رجل طول بعرض لما شاف ابن إياس قام من على كرسيه وسلم عليه باحترام.
بينما انحنى ابن إياس وهو يقول: حيا الله مولانا السلطان.
الرجل بصلى باستغراب فقال ابن إياس:
ده مساعدى ابن البدوى يا مولاى.
وطيت على ايده بوستها وقلت: منور يا عرب
الحاكم تجاهلنى وقال: مالى وكأنى أشم رائحة تقلية بتاع الملوخية؟!
أنا كنت نسيت أدى لابن إياس لبان بالنعناع عشان يغير طعم بقه.
قلت بصوت خفيض: مالها الملوخية ياهندسة؟!
بص لى الحاكم وقال: الخضراوات فيها تيفود يا معلم وأنا لازم أحافظ على الناس فمنعت الخضراوات لغاية ما نشوف حل. أحسنت يا مولاى.
الناس مش فاهمة يا.. اسم الكريم ايه؟!
خدامك ابن البدوى.
الناس مش فاهمة يا ابن البدوى يعنى مثلا الصيف ده حر موت وضربات الشمس كترت خليت الناس تشتغل بالليل وتنام الصبح حفاظًا على حياتهم.
الله ينور عليك يا مولانا.
الحاكم: ما علينا.
أنا بعتلك يا ابن إياس لأن فيه واحد جاى من بغداد بكرة اسمه الحسن بن الهيثم بيقولى عنده فكرة سد يعمله ع النيل عشان يضبط الرى وعايزك تقابله معايا.
أنا قلت بشكل لا إرادى: قصدك السد العالى يا بركة.
رد الحاكم: واش عرفك؟!
تدخل ابن إياس فقال: مساعدى له دراسات فى المياه.
نظر إلىّ الحاكم قائلًا: هل هذا صحيح يا ابن البدوى؟!
أيوه يامولانا أنا اكتر واحد بيفتح التلاجة ويملى القزايز فى مصر.
إذن ستصبح مساعدًا لابن الهيثم ومسئولًا أمامى عن تنفيذ السد.
وأنا مال أمى يامولانا هو صاحب الاقتراح يلبس أنا مالى!
قضى الأمر قولت لى الكابتن اسمه إيه؟
ابن البدوى يا مولاى.
السلطان خرج وقعدت مع ابن إياس نتكلم.
عرفنا أن ابن الهيثم جاى الساعة 12 بالليل وأن الحاكم بأمر الله هيخرج بنفسه من باب الفتوح عشان يقابله فى ميدان روكسى اللى كان صحرا أيامها.
وقفت أنا وابن إياس الساعة بقت واحدة بالليل والحاكم مظهرش.
خدت ابن إياس عند زيزو نتانة طلبنا 12 كبدة و12 مخ و8 سجق وأربعة سكلانس وقعدنا نضرب فيهم على ما بسلامته يظهر.
سألت ابن إياس تفتكر يا ابن إياس يا اخويا هو طالع ليه يقابل الحسن ابن الهيثم بنفسه.
كان موقع الطحينة على جلابيته وحاشر نص فينو فى بقه وبيشاور عايز يشرب
جبتله اسبيروسباتس رزعها على بق واحد واتكرع بصوت سمعه كل أهالى الحسينية وقال
لامؤاخذة يا ابن البدوى
لامؤاخذة مين فضحتنا ياجدع
تجاهل قولى وأشار بيده مولانا الحاكم الشهادة لله بيقدر العلم والعلماء
سمعنا صوت خيول وموكب الحاكم ظهر وشاور وهو على حصانه
هاتلى 4 كبده وأربعه سجق وخلى نتانة يكتر الشطة
اديت اللفة لمولانا السلطان اللى قعد يعض فيها لغاية ما عدينا نفق العباسية
ولقيته بيتلفت حواليه ابن إياس قاله فيه حاجة يامولانا
الحاكم رد وقاله نار فى صدرى ياجدع واضح أن زيزو مغيرش الزيت اللى بيعمل بيه الكبدة من سنتين ابقى فكرنى اشنقه لما ارجع ضربت إيدى فى جيبى لقيت كيس مالوكس اديته للحاكم
جرب ده يامولاى
إيه ده ياشقيق
دى أعشاب من بلاد الهند هتريحك لو تناولتها
ضرب الكيس وبعدها مسك صدره وقال الجماعة الصينيين دول عليهم حاجات ياجدع أحسنت يا ابن البدوى تسلم ياكبير
قبل ما نوصل روكسى لقينا راجل راكب جمل وجاى من طريق جسر السويس
4 من الحراس قابلوا الرجل فتشوه وشافوا البطاقة كان الحسن ابن الهيثم فعلًا
وبعد السلام وللتحيات
الحاكم قاله هذا ابن البدوى عينته مساعد لك
قلت له نورت ياعم هيثم وإن شاء الله ليلتنا قشطة بالصلاة ع النبى
الحكم اصر يعزمنا ع الأكل فى القصر بتاعه وجاب 140 بيتزا من فطاطرى الأمور
طبعا اضطررت آكل تانى والحاكم قال تريح وبكرة بالليل تاخد ابن البدوى وتطلع على أسوان
خدنا ابن الهيثم معانا بيت ابن إياس وابن الهيثم ماسك صدره وبيقول حرقان نار
غالبا آثار ال 12 بيتزا اللى ضربهم لوحده
اديته واحدة سبيروسباتس وقلت له ارفعها على بق واحد ياعم هيثم
الراجل كان منشكح وهو عمال يتكرع ويرد عليه ابن إياس بتكريعة أجمد منها
وكأن الاتنين بيعزفوا فى أوركسترا القاهرة الفلهارمونية
المهم تانى يوم بعد 12 بالليل
اخدنى ابن إياس أنا وابن الهيثم وطلع ع النيل
سالته على فين يابركة قاللى هنركب صندل عشان نوصل أسوان
قلت له ياعم تعالى نطلع رمسيس ناخد قطر النوم 9 ساعات نبقى فى أسوان
وما هو قطار النوم يا ابن البدوى
بصلى ابن إياس محذرًا فقلت ولا حاجة ياعم هيثم ده هزار
وصلنا أسوان بعد تلت أيام سفر فى النيل
طلعنا عند الشلالات وأول ما ابن الهيثم شاف شكلها قعد يقول
شقى عمرى
شقى عمرى ضاع
الملاحة والملاحة
وحبيبتى ملو الطراحة
يانهار أسود
يانهار أسود
أنا مكنتش فاكرها كده
وقعد يعيط ويجيب تراب من ع الأرض ويحط على دماغه
ابن إياس قاله مولانا هينفخنا
أنا مسكته وهديته
امسك نفسك ياعم الدفاس وانت يا أبو دقشوم قصدى يا ابن إياس ليها حل
ليها حل أن شاء الله
الراجل وطى على إيدى باسها وقالى والنبى تقولى أعمل إيه
قلت له مفيش غير الكتاكيت
بص لى ابن الهيثم وابن إياس بتعجب وفى نفس واحد قالا يعنى إيه
كتاكيت
بصيت لابن الهيثم وقلت له يعنى تعمل زى ما عبفتاح القصرى لما عمل فى فيلم «لو كنت غنى» وراح ناكش شعره وقال:
كتاكيت أنا عايز كتاكيت وعمل فيها أهبل
يعنى تقبلها عليا يا ابن البدوى أعمل أهبل وأنا فى السن ده
قلت له خلاص يامعلم روح لمولانا الحاكم وقوله موضوع سد أسوان فكس يامعلم
وتفتكر مولانا الحاكم هيعمل إيه
هنا تدخل ابن إياس فى الحديث وقاله ولا حاجة هتقلع سلبوتة ويركبك حمار بالمقلوب والجند هيجلدوك لغاية ما يبان لك أصحاب ابن الهيثم قال كتاكيت ابن البدوى ارحم
ابن إياس قال على بركة الله
أول ما نوصل بص فى السقف واعمل نفسك لا سامع ولا فاهم وسيب الباقى على ابن البدوى
رجعنا من أسوان وأنا ساحب ابن الهيثم من إيده وابن إياس سانده من ضهره وهو عمال يقول
كتاكيت أنا عايز كتاكيت
مولانا الحاكم نظر إلىّ مستفسرًا ماله الزبون
أبدًا يامولانا أول ما وصلنا أسوان دخل كهف يعمل زى الناس لما خرج منه بقى كده
الحاكم هز رأسه وقال يبقى الزبون اتلبس
ابن إياس أمّن على كلامه وقال هو ذاك يامولاى
الحاكم قال خده يا ابن إياس شوفله شقة مطرحين وعفشة ميه وأنا هدفع تمنها وليه خادم يخدمه وراتب شهرى
ياخسارة دى دماغة كانت ألماظات
خدنا ابن الهيثم وخرجنا وأول ما بعدنا عن قصر الحاكم وطى على ايدى باسها وقال أنقذتنى يا ابن البدوى
إحنا اخوات ياعم هيثم متقولش كده
رحنا عند ابن إياس وأول ما دخلنا ابن الهيثم بص للمكتبة منبهر وطلع كتاب يقرا فيه وقال الخط صغير جدًَا يا ابن إياس يا خويا والضوء ضعيف
طلعت من جيبى نظارة القراية اللى شاريها من العتبة بخماشر جنيه واديتهاله
لبسها وزاد انبهاره
ماهذا يا ابن البدوى
دى نضارة يامعلم احكيلك قصتها بعدين
يصيت لابن إياس وقلت أخوك مجهد من الرحلة يا زميلى
ضحك ابن إياس ونادى ياسمين
نزلت من الحرملك لابسة الترنج بتاع هيفاء وهبى الجامد ده وبدلال وهى بتبصلى قالت نعم يامولاى
خدى سيدك ابن البدوى واعدى له الحمام
طلعت السلم جرى وأنا أقول
بحبك يا ابيض

الحاكم بأمر الله -4
نزلت الصبح أفطر مع ابن إياس وابن الهيثم وجسمى فاكك من بعضه وياسمين بتخدم علينا وتقدم الفطير والعسل والقشطة وأنا عمال أمسك عضلاتى المفكوكة زى عادل إمام فى فيلم الأفوكاتو وأبص لياسمين ونضحك وأقول الله يخرب بيتك ياعطية قصدى يا ياسمين
ابن إياس قاللى إيه الأخبار
رديت عليه البت ياسمين دى عود البطل الصراحة
ابن إياس ياسمين مين ركز مع أمى بقولك هنعمل إيه فى ابن الهيثم
قلت له ولا حاجة ابن الهيثم يعمل فيها استنجالينا ويبص فى السقف ويكلم الحيطة لغاية مانشوف حل
ابن الهيثم قال دى حاجة تزهق يا ابن البدوى
ياعم الحاج سايس أمورك
طب عايز الكتب بتاعتى معايا
ابن إياس قال أنا جبتلك أوضة وصالة وعفشة ميه جنب سيدنا الحسين ونقلت الكتب هناك
سمعت خبط ع الباب هيثم رمى الفطيرة وبص فى السقف وابن إياس فتح لقى جنود الحاكم بيقولو له هات ابن البدوى وتعالى كلم مولانا
دخلنا عليه القصر لقيته لابس جلابية سمنى مقطعة وشعره منكوش وبيبص فى السقف زى ابن الهيثم
قلت له مسا مسا ياعم السلاطين
الراجل مردش
ابن إياس ركبه خبطت فى بعضها وهو بيقولى مولانا ماله
الحاكم بص ناحيتنا وقال
الهانم بتقرطسنى مدوراها من ورايا وماشية شمال وفاكرانى مش هعرف
قلت له بصوت عالى ماعاش اللى يقرطسك يا غالى
بص ناحيتى بغضب وقال أنا قرطاس فاهم قرطاس
يامولانا ما يصحش قرطاس مين بس
لقيته زعق وقال بقولك أنا قرطاس وراح منادى ياعزت
عزت ده السياف
قاله نعم يامولاى
قاله أنا قرطاس وابن البدوى بيقولى لأ
عزت طلع السيف من جنبه
رحت صارخ ب أعلى صوت انت قرطاس وعيل بقرون يامولانا
الحاكم رد أيوة كده
عزت دخل السيف
والحاكم قال اختى ست الملك مدوراها من ورايا فاتحة خمارة خمسة باب وأنا نايم على ودانى
أنا لازم أغسل عارى واشرب من دمها
ياعزت اعطى سيفك ل ابن البدوى
وبص وقالى
عايزك تجيبهالى حتت محدش يعرف يلم جتتها
قلت له يامولاى أنا مش بتاع سيوف ودم أنا آخرى أبلغ عنها مباحث الآداب
الحاكم قال لو رفضت تنفيذ الأمر سوف أقتل صديقك ابن إياس
لقيت ابن إياس وطى على رجلى يبوسها وقال
أنا عارف إنك واطى وهتبعنى
حطيت السيف فى حزام البنطلون الجينز ومشيت وأنا بفكر هعمل إيه مع ابن المجنونة اللى عايزنى أقتل ست الملك قلت أبيع ابن إياس وخلاص
وأنا ماشى قدام باب النصر وتحديدًا عند زيزو نتانة لقيت حنطور وقف جنبى وواحدة مطلعة دماغها وبتقولى
الحلو منين؟
رديت بشكل تلقائى من المنصورة
الست رقعت ضحكة رقيعة وقالت باين عليكى يابيضة ماتيجى
آجى فين
تيجى ونجيب مليجى
قلت فى عقل باللى والله مولانا الحاكم عنده حق لما منع النساء من الخروج الستات توحشت
لقيت اتنين ستات حبشيات نزلوا من الحنطور وشالونى دخلونى الحنطور غصب عنى وبدأ يجرى
فيهم واحدة كانت بتبص لى زى بصة الأستاذ حمدى الوزير لمدام هدى رمزى
أنا بسرعة قفلت زراير القميص وقعدت اشتم
كلاب. وحوش
كلاب بشرية
وحوش آدمية
وصلت قصر والستات نزلونى قدام ست شبه الأستاذة نادية الجندى لما كانت بصحتها
قالت لى ارمى سيفك وفك الزرار اللى خانق بيه رقبتك متخافش محدش هيعملك حاجة
خايف من جوز الستات دول يا نجمة الجماهير
ولية من الحبشيات زغدتنى وقالت تحشم إنت فى حضرة مولاتنا ست الملك
ست الملك قالت لى من الآخر يا ابن البدوى أخويا الحاكم هبت معاه جامد وتقريبا اتجنن وعايزاك تخلصنى منه
يامولاتى إنتم فاهمينى غلط أنا راجل صحفى أجاهد بالقلم
ست الملك قالت وماله غزه بقلم مسموم فى رقبته
ياحاجة ماليش فى القتل
أنا آخرى أكتب مقال أبهدل فيه أمه
خسارة يا ابن البدوى مع إنك كان ممكن تجلس إلى جوارى ع العرش
ونجيب مليجى برضه
بصت ناحية جوز الستات الحبشيات طول بعرض بعضلات وشاورت بإيدها:
خلصونا الليلة دى.
وبصت لى وانت يا ابن البدوى.
قلت لها أنا رايح أجيب مليجى.
جريت على بيت ابن إياس أول ما شافنى عمل زى محمود عبدالعزيز فى فيلم الكيف والملاحة والملاحة وحبيبتى ملو الطراحة قلت له ما تقلقش ست الملك بعتت اللى يغز مولانا الحاكم.
منمناش طول الليل والصبح سمعنا منادى أن مولانا الحاكم خرج إلى مرصده بالمقطم وهو يركب حماره وأن الحمار عاد ومعه عباءة الحاكم وعليها آثار دماء.
3
4
5
6