جوزك على ما تعوديه..رضا الزوجة عن خروجة الأصحاب أهم من الخروجة نفسها

رضا الزوجة عن خروجة الأصحاب أهم من الخروجة نفسها، عزيزى الرجل لو فى يوم كده قررت إنك تنزل مع أصحابك أو تخرج ولاقيت إن مراتك مش موافقة أوى على الخروجة وبتتكى لك على السين، يبقى ساعتها اقصر الشر يا ابنى وأقعد فى البيت، الخروجات اللى زى دى لو مش بنية صافية حتلاقى الدنيا اتشقلبت عليك من كل حتة، متفهمش إه اللى بيحصل.
صحبك يتعب ويروح المستشفى مثلا وتقضوا الخروجة كلها فى المستشفى مع الدكاتره والمحاليل، يحصل حادث وتضطروا تقضوا اليوم فى قسم الشرطة علشان تقفلوا المحضر، حاجات من هذا القبيل. فالأضمن والأحسن للطرفين أنهم يكونوا هما الاثنين راضيين عن الخروجة تجنبًا للمشاكل.
ويا سلام بقى لو كانت سفرية مع أصحابك وهى مش موافقة أو حاسة إنك سايبها لوحدها مع العيال، ده ممكن يقوم حرب فى المكان اللى أنت مسافر فيه، رضا الزوجة عن مثل هذه السفريات يعد الفيزا لدخول البلد،حاجات غريبة تحصل لو هى مش راضية لدرجة إنك تتمنى لو مكونتش فاتحتها أصلا فى الموضوع. عزيزى الرجل أخرج واتفسح وسافر بس.
راضى ست الكل اللى قاعدة فى البيت بالعيال بدل ما نزورك كلنا فى المستشفى.
رضا الزوجة فى مثل هذه الحالات كرضا الأم بالظبط، لكن لو الموقف بالعكس بتكون الدنيا أهدى بكتير، أولا لأن الزوجات أصلا نادرات جدًا فى مثل هذه الطلبات، وكمان أغلب الأزواج مش بيكونوا فاضيين من الشغل علشان يقعدوا مع الأولاد.
نصيحه لوجه الله.. راضى مراتك بخروجة أو كلمتين حلوين لو لاقيت نفسك حتخرج وهى نفسها تنزل بس مش عارفة لارتباطات الأولاد، ساعتها حتدعى لك تنبسط من غير ما تتكا على السين.
على فكرة إحنا طيبين أوى وبيضحك علينا بسهولة بس انتوا بتكسلوا تعملوا مجهود فى إرضائنا.